ថោង ខុន៖ កម្ពុជា មិនសំពះសុំមេដាយពីបណ្ដាប្រទេសដទៃទេនៅស៊ីហ្គេម២០២៣

2018-12-25 07:02:31
កីឡាផ្សេងៗ

2018-12-25 07:02:31
ចំនួនមតិ 0 | ចំនួនចែករំលែក 0

ចន្លោះមិនឃើញ

ឯកឧត្ដមបណ្ឌិត ថោង ខុន រដ្ឋមន្ត្រីក្រសួងទេសចរណ៍ និងជាប្រធានគណៈកម្មាធិការជាតិអូឡាំពិកកម្ពុជា(NOCC) បានបញ្ជាក់យ៉ាងច្បាស់ថា នៅឆ្នាំ២០២៣ កម្ពុជានឹងមិនសំពះ អង្វរសុំមេដាយពីបណ្ដាប្រទេសដទៃ ដូចករណីម្ចាស់ផ្ទះមុនៗធ្លាប់ធ្វើនោះទេ។

កិច្ចប្រជុំស្ដីពីរបាយការណ៍វឌ្ឍនភាព Sea Games 2023 កាលពីព្រឹកមិញនេះ មានការចូលរួមយ៉ាងច្រើនកុះករពីសំណាក់សហព័ន្ធកីឡានានានៅកម្ពុជា ដើម្បីរៀបចំខ្លួនធ្វើយ៉ាងណាឱ្យទាន់ពេលវេលាដើម្បីធ្វើជាម្ចាស់ផ្ទះក្នុងព្រឹត្តិការណ៍ស៊ីហ្គេម២០២៣។ ក្នុងឱកាសនោះដែរ ឯកឧត្ដមបណ្ឌិត ថោង ខុន បាននិយាយយ៉ាងច្បាស់ថាកម្ពុជាត្រូវការមេដាយមាសឱ្យបានច្រើនបំផុតក្នុងនាមជាម្ចាស់ផ្ទះ។ ដូច្នេះហើយ សហព័ន្ធដែលមានសក្ដានុពលទាំងអស់ត្រូវរៀបចំខ្លួនឱ្យបានល្អបំផុត។

ឯកឧត្ដម បានបន្ថែមថា៖ “បញ្ហារបស់យើងគឺធ្វើមិចឱ្យមានមេដាយមាសច្រើន មិនមែនលាដៃទៅសុំគេទេ។ ខ្ញុំដាច់ហើយ ២០២៣ហ្នឹង មិនទៅសំពះអង្វរគេ សុំមេដាយមាសដូចកន្លែងដទៃទេ។ ខ្ញុំមានការឈឺចាប់ច្រើន ត្រង់ថាខ្ញុំបានទៅចូលរួមស៊ីហ្គេមនៅប្រទេសមួយចំនួន កន្លែងខ្លះយើងត្រូវឈ្នះ តែគេសុំយើងឱ្យចាញ់វិញ ដោយសារគេត្រូវការមេដាយ។ មានបញ្ហាជាច្រើន ប៉ុន្តែខ្ញុំអត់ចង់បានបញ្ហាហ្នឹងទេ យើងត្រូវធ្វើជាម្ចាស់ផ្ទះដោយមោទនភាព ត្រូវខិតខំប្រឹងប្រែងដោយខ្លួនឯង”។

ឯកឧត្តមបណ្ឌិតយល់ឃើញថាកម្ពុជានៅមានឱកាសច្រើនទៀតក្នុងការរៀនសូត្រ ហើយកម្ពុជាក៏លែងលំបាកទៀតដែរ ដោយសារតែគ្រប់ប្រភេទកីឡាទាំងអស់ សុទ្ធតែត្រូវការរាជរដ្ឋាភិបាលយកចិត្តទុកដាក់ ក៏ដូចជាក្រសួងអប់រំ យុវជន និងកីឡាជាដើម។ នៅពេលខាងមុខ កម្ពុជានឹងបង្កើត ភូមិអ្នកកីឡា មួយទៀត ដើម្បីអភិវឌ្ឍឱ្យកាន់តែល្អ៕

អត្ថបទ៖ មុន្នីរម្យ