- 2015-04-27 18:01:44
- ប្រវត្តិ
អតីតអ្នកប្រដាល់កម្ពុជា១០រូបស្ថិតក្នុងចិត្តអ្នកគាំទ្រដល់សព្វថ្ងៃ
- 2015-04-27 18:01:44
- ចំនួនមតិ 0 | ចំនួនចែករំលែក 0
អតីតអ្នកប្រដាល់កម្ពុជា១០រូបស្ថិតក្នុងចិត្តអ្នកគាំទ្រដល់សព្វថ្ងៃ
ចន្លោះមិនឃើញ
ទោះជាកាលពីជាង១០ឆ្នាំមុន សង្វៀនប្រដាល់មិនសូវសំបូរបែបដូចបច្ចុប្បន្ន ក៏កីឡាករប្រដាល់កម្ពុជាជាច្រើនរូបបានសាងកេរ្តិ៍ឈ្មោះល្បីរន្ទឺនៅក្នុងវិស័យកីឡាប្រដាល់ក្បាច់គុនបុរាណខ្មែរ។ ថ្ងៃនេះ Sabay សូមលើកយកអតីតអ្នកប្រដាល់១០រូបនេះដែលមានកេរ្តិ៍ឈ្មោះបោះសំឡេងទូទាំងប្រទេស និងនៅលើឆាកអន្តរជាតិថែមទៀត។
១- អេ ភូថង លោក អេ ភូថង កើតនៅភូមិ នាងកុក ឃុំ បាក់ខ្លង មាន ស្រុក មណ្ឌលសីមា ខេត្តកោះកុង។ ឆ្លងកាត់បទពិសោធន៍លើសង្វៀន១៩០ដង ឈ្នះ ១៨៥ដង ចាញ់៥ដង និងឈ្នះសន្លប់ : ៤០ដង កីឡាករកម្ពុជារូបនេះឈ្នះខ្សែក្រវាត់ក្នុងស្រុកជាច្រើនគ្រឿង និងខ្សែក្រវាត់ពិភពលោក ISKA នៅឆ្នាំ២០០៣។ សព្វថ្ងៃលោកកំពុងធ្វើជាគ្រូបង្ហាត់ អាជ្ញាកណ្តាល និងចៅក្រមប្រកួត ព្រមទាំងចិញ្ចឹមកុមារកំព្រាមួយចំនួនផងដែរ។
អេ ភូថង
២- ឡឹក វិបុល ឡឹក វិបុល ដែលមានប្រភពចេញពីក្លិបប្រដាល់ពន្លឺសាមគ្គី ក្នុងខេត្តបាត់ដំបងបានក្លាយជាជើងខ្លាំងប្រដាល់ក្នុងប្រភេទទម្ងន់៥៧គីឡូក្រាមស្ទើរគ្មានគូប្រៀប។ លោកធ្លាប់គ្រងខ្សែក្រវាត់ជាច្រើនគ្រឿង និងប្រកួតអន្តរជាតិក៏ច្រើន។ អ្នកស្នេហាប្រដាល់កម្ពុជាឲ្យរហស្សនាមថា កែងឆេះ ដោយសារអតីតកីឡាកររូបនេះពូកែប្រើកែងដ៏មុតស្រួចដើម្បីផ្តួលដៃគូ។ បន្ទាប់ពីចូលនិវត្តន៍កាលពីប៉ុន្មានឆ្នាំមុន ឡឹក វិបុល បានក្លាយជាមន្ត្រីយោធាម្នាក់នៅខេត្តព្រះវិហារ ហើយជីវភាពរស់នៅក៏កាត់តែប្រសើរ។
៣- ផៃ ប៊ុនជឿ ជើងខ្លាំង ផៃ ប៊ុនជឿ បានបាត់មុខឈឹងពីប្រភពសង្វៀនប្រដាល់ ប៉ុន្តែលោកអ្នកប្រហែលជាចាំមិនភ្លេចទេពីសមត្ថភាពរបស់កីឡាកររូបនេះ។ កីឡាករដែលពីសមាគមកីឡាប្រដាល់ក្រសួងមហាផ្ទៃធ្លាប់ប្រកួតបានជាង៥០ដងប៉ុណ្ណោះ ប៉ុន្តែត្រូវបានគេស្គាល់ថា ជាកីឡាករដែលពូកែទាត់ និងរហ័សរហួន។ ដៃគូដ៏ស្វិតស្វាញរបស់គេគឺឡឹក វិបុលដែលការប្រកួតរបស់គេតែងតែទទួលបានការចាប់អារម្មណ៍ខ្លាំងពីមហាជន។
វីដេអូ៖ ផៃ ប៊ុនជឿ ប្រកួតនឹងកីឡាករបារាំង
៤- នួន សូរិយា នួន សូរិយា កើតនៅថ្ងៃទី០៥ ខែមករា ឆ្នាំ១៩៨០ នៅជំរំសាយធូ។ បន្ទាប់មកលោកបានមករស់នៅជាមួយក្រុមគ្រួសារនៅខេត្តកំពង់ចាម។ ស្នាដៃក្នុងអាជីពប្រដាល់ សូរិយា ធ្លាប់គ្រងបានខ្សែក្រវាត់៤ខ្សែរួមមាន ខ្សែក្រវាត់ស៊ីម៉ង់ត៍ខ្លា ខ្សែក្រវាត់ខារ៉ាបាវ និងខ្សែក្រវាត់អន្តរជាតិចំនួន២។ លោកបានឈប់ពីប្រដាល់ក្រោយពេលលោកបានចេញទៅរស់នៅសហរដ្ឋអាមេរិកដើម្បីផ្សព្វផ្សាយក្បាច់គុនបុរាណខ្មែរ និងធ្វើការនៅលើទឹកដីអាមេរិកផងដែរ។
៦- នួន ភិរម្យ កើតនៅភូមិឃ្មួញ សង្កាត់ឃ្មួញ ខណ្ឌឫស្សីកែវ ក្រុងភ្នំពេញ លោក នួន ភារម្យបានក្លាយជាកីឡាករប្រដាល់ដ៏ល្បីល្បាញទាំងនៅប្រទេសកម្ពុជា និងប្រទេសថៃ។ មុនចូលនិវត្តន៍ពីប្រដាល់ដើម្បីក្លាយជាចៅក្រម និងអាជ្ញាកណ្តាល លោកធ្លាប់ប្រកួតបានជិតមួយពាន់ដង។ លោកធ្លាប់ឈ្នះមេដាយសំរឹទ្ធិពីកម្មវិធីពានស្តេចថៃ King Cup ឆ្នាំ១៩៩៦ និងមេដាយប្រាក់ឆ្នាំ១៩៩៧។ ឆ្នាំ១៩៩៦ នួន ភិរម្យជាប់ជាជើងឯកពានរង្វាន់សម្ដេច ហ៊ុន សែនទូទាំងប្រទេស ព្រមទាំងពាន និងខ្សែក្រវាត់ក្នុងស្រុកជាច្រើនទៀត។
៧- ភិន សុផល អតីតជើងខ្លាំង ភិន សុផល ត្រូវបានគេស្គាល់ឈ្មោះក្រៅថា ឃួន ចាន់រិទ្ធិ មកពីក្លឹបប្រដាល់កងរាជអាវុធហត្ថក្រុងភ្នំពេញ។ កីឡាកររូបនេះកើតនៅឆ្នាំ១៩៧៨នៅភូមិតំណាក់ហ្លួង ឃុំវត្តគរ ខេត្តបាត់ដំបង។ មហាជនបានចាប់អារម្មណ៍រូបគេខ្លាំងនៅពេលប្រកួតដណ្តើមខ្សែក្រវាត់វគ្គផ្តាច់ព្រ័ត្រជាមួយ អូត ភូថង។ ពេលនោះសុផលត្រូវបានភូថងវាយឲ្យសន្លប់ធំ ហើយបន្ទាប់មកក៏បាត់មុខពីសង្វៀនប្រដាល់រហូតដល់សព្វថ្ងៃ។
វីដេអូ៖ ភិន សុផល ប្រកួតនឹងកីឡាករអាមេរិក
៨- ពេជ្រ ប៊ុនធឿន ពេជ្រ ប៊ុនធឿនបាត់ឃ្លាតឆ្ងាយពីសង្វៀនប្រដាល់ជាច្រើនឆ្នាំមក បន្ទាប់ពីសាងកេរ្តិ៍ឈ្មោះល្បីរន្ទឺក្នុងពិភពប្រដាល់ខ្មែរ។ សម្រាប់រយៈពេលនៃអវត្តមានពីពិភពប្រដាល់ កីឡាករម្នាក់នេះត្រូវបានគេដឹងថាជួបរឿងមិនល្អជាច្រើនក្នុងនោះធ្លាប់ចូលអប់រំនៅមណ្ឌលបន្សាបគ្រឿងញៀន និងធ្លាប់ត្រូវបានជនទំនើងមួយក្រុមវាយទៀតផងកាលពីថ្ងៃទី១៤ មីនា ឆ្នាំ២០០៤។ កាលពីចុងឆ្នាំ២០១៤កន្លងទៅ ប៊ុនធឿនបានវិលមកកាន់សង្វៀនជាថ្មីដោយបានឡើងសង្វៀនប៉ុន្មានប្រកួត ប៉ុន្តែមិនទទួលបានលទ្ធផលឡើយ។ សព្វថ្ងៃរូបគេកំពុងក្លាយជាគ្រូបង្ហាត់នៅក្លិបប្រដាល់ពន្លឺសាមគ្គីខេត្តបាត់ដំបង។
៩- ឡោ សំណាង ឡោ សំណាងជាអតីតកីឡាករប្រដាល់ល្បីឈ្មោះម្នាក់កាលពីជាង៥ឆ្នាំមុនដែលអ្នកស្នេហាប្រដាល់ស្រុកខ្មែរស្គាល់យ៉ាងច្បាស់ថា រហ័សរហួន និងមានស្នៀតប្រយុទ្ធល្អមួយកំផ្លេក្នុងនោះកណ្ដាប់ដៃ ទាត់ ធាក់ និងកែង។ ថ្វីត្បិតថា រូបគេបានអង្រួនសង្វៀនប្រដាល់មួយរយៈពេល និងឃ្លាតឆ្ងាយពីពិភពប្រដាល់ទាំងវ័យក្មេង ប៉ុន្តែកេរ្តិ៍ឈ្មោះរបស់គេដិតជាប់ក្នុងចិត្តអ្នកស្នេហាប្រដាល់ជានិច្ច។
១០- ធន់ សុភា ធន់ សុភា ជាកីឡាករប្រដាល់ម្នាក់ដែលមានកេរ្តិ៍ឈ្មោះបោះសំឡេងទូទាំងប្រទេសតាមរយៈសមត្ថភាពនៃការប្រកួតប្រកបដោយបច្ចេកទេស និងស្មារតីល្អ។ ចាប់ផ្ដើមឡើងសង្វៀនឆ្នាំ១៩៩៦ រូបគេធ្លាប់ឈ្នះខ្សែក្រវាត់៣ខ្សែ។ អតីតកីឡាកររូបនេះធ្លាប់ប្រកួតបានជាង១០០ដង និងប្រកួតអន្តរជាតិបាន២៥លើកដែលមានតែ២លើកប៉ុណ្ណោះដែលចាញ់លក្ខណៈអន្តរជាតិ។ បច្ចុប្បន្ន ធន់ សុភា បានក្លាយជាគ្រូបង្ហាត់ គណៈកម្មការប្រកួត និងជាអាជ្ញាកណ្តាល បន្ទាប់ពីចូលនិវត្តពីអាជីពប្រដាល់កាលពីចុងឆ្នាំ២០១០៕
អត្ថបទ៖ ជាន ចាន់រ៉ា
