កីឡាករ Liverpool ៥នាក់ ដែលនឹងអស់អនាគតជាមួយក្លឹប ឆាប់ៗនេះ

2017-02-06 23:07:00
ប្រវត្តិ

2017-02-06 23:07:00
ចំនួនមតិ 0 | ចំនួនចែករំលែក 0

ចន្លោះមិនឃើញ

ក្រុមហង្សក្រហម Liverpool បានធ្លាក់ទម្រង់លេងខ្លាំងមិនធ្លាប់មាន នៅឆ្នាំ២០១៧នេះ។ តាំងពីចូលឆ្នាំថ្មីមក ពួកគេមិនទាន់ស្គាល់ពាក្យថា "ឈ្នះ” មួយប្រកួតនៅឡើយទេ នៅក្របខ័ណ្ឌ Premier League ខណៈដែល៥ប្រកួតចុងក្រោយ ស្មើ១ និងចាញ់៤ដង។

ជាមួយនឹងទម្រង់លេងធ្លាក់ចុះនេះ ក្លឹបអាចនឹងរុះរើក្រុមក្រោយចប់រដូវកាលនេះ។ Sabay សូមបង្ហាញជូនកីឡាករ៥នាក់ ដែលនឹងអស់អនាគតជាមួយក្លឹប Liverpool ក្នុងពេលឆាប់ៗ៖

១. ខ្សែការពារ Mamadou Sakho

កីឡាករសញ្ជាតិបារាំង វ័យ២៦ឆ្នាំរូបនេះ ពុំមានឱកាសបានលេងឲ្យក្រុម Liverpool រដូវកាលនេះទេ បន្ទាប់ពីមានរឿងរ៉ាវជាច្រើនដូចជា ត្រូវ UEFA ពិន័យដោយសង្ស័យប្រើប្រាស់សារធាតុហាមឃាត់ កាលចុងរដូវកាលមុន និងមានរឿងជាមួយអ្នកចាត់ការ Jurgen Klopp កាលប្រកួតមិត្តភាព មុនបើករដូវកាលនេះ។ Sakho បានចាកចេញទៅលេងឲ្យក្រុម Crystal Palace ក្នុងលក្ខខណ្ឌខ្ចីជើង កាលខែមករា ប៉ុន្តែ Klopp អាចនឹងលក់រូបគេចេញតែម្ដង ក្រោយចប់រដូវកាលនេះ។

២. ខ្សែបម្រើ Lucas Leiva

ខ្សែបម្រើការពារ សញ្ជាតិប្រេស៊ីល វ័យ៣០ឆ្នាំរូបនេះ ជាកីឡាករម្នាក់លេងឲ្យហង្សក្រហម ច្រើនឆ្នាំជាងគេបំផុត ក្នុងចំណោមកីឡាករបច្ចុប្បន្ន។ Lucas លេងឲ្យ Liverpool តាំងពីឆ្នាំ២០០៧ ប៉ុន្តែរូបគេអាចនឹងចាកចេញ ក្រោយចប់រដូវកាលនេះ ព្រោះមិនសូវបានបង្ហាញខ្លួនជម្រើសដំបូង ហើយ Liverpool ក៏ត្រូវការកីឡាករថ្មីកម្រិត World Class ក្នុងតំបន់មួយនេះផងដែរ។

៣. ខ្សែប្រយុទ្ធ Daniel Sturridge

Sturridge ធ្លាប់ជាកំពូលខ្សែប្រយុទ្ធម្នាក់ នៅ Premier League កាលជំនាន់ចាប់ដៃគ្នាជាមួយអតីតមិត្តរួមក្រុម Luis Suarez។ ប៉ុន្តែក្រោយមក រូបគេបានជួបបញ្ហារបួសញឹកញាប់ រហូតធ្លាក់ទម្រង់លេងខ្លាំងមកដល់បច្ចុប្បន្ន។ កីឡាករជម្រើសជាតិអង់គ្លេសរូបនេះ បានធ្លាក់តំណែងជម្រើសដំបូងនៅក្រុមហង្សក្រហម ដូច្នេះរូបគេអាចនឹងរកផ្លូវចាកចេញ ពេលចប់រដូវកាលនេះ។

៤. អ្នកចាំទី Simon Mignolet

អ្នកចាំទី ជម្រើសជាតិបែលហ្សិក វ័យ២៨ឆ្នាំរូបនេះ ត្រូវបានអ្នកគាំទ្រជាច្រើនរិះគន់ ដោយសារមានកំហុសជាច្រើនលើកច្រើនសារ និងធ្វើឲ្យ Liverpool បាត់បង់ពិន្ទុជាច្រើន ដោយសារកំហុសផ្ទាល់ខ្លួនរបស់គេ។ បញ្ហាអ្នកចាំទីសម្រាប់ក្រុម Liverpool អាចនឹងទិញចូលអ្នកចាំទីថ្មី រដូវកាលក្រោយ ខណៈដែល Mignolet អាចចាកចេញ ប៉ុន្តែអ្នកចាំទី Loris Karius អាចនៅបម្រុង។

៥. ខ្សែការពារ Alberto Moreno

ខ្សែការពារឆ្វេង សញ្ជាតិអេស្ប៉ាញ វ័យ២៤ឆ្នាំរូបនេះ បានធ្លាក់តំណែងជម្រើសដំបូងទៅ James Milner ដោយសារចុងរដូវកាលមុន រូបគេបង្កកំហុសជាច្រើន ដូចជាប្រកួតផ្ដាច់ព្រ័ត្រ UEFA Europa League ជាដើម ដែលធ្វើឲ្យអ្នកគាំទ្រច្រឡោតខឹង មិនអាចលើកលែងបាន។ ដោយសារមិនមានឱកាសលេងជម្រើសដំបូង Moreno អាចនឹងចេញ ក្រោយចប់រដូវកាលនេះ៕

ប្រែសម្រួល៖ វិន ជីវ័ន្ត | ប្រភព៖ Sport SK, The Sun