- 2015-07-28 13:20:15
- ប្រវត្តិ
ខ្សែបម្រើប៉ូលិស អ៊ុល រ៉ាវី សន្សំប្រាក់ជិត៥ឆ្នាំទើបទិញម៉ូតូបានមួយគ្រឿង
- 2015-07-28 13:20:15
- ចំនួនមតិ 0 | ចំនួនចែករំលែក 0
ខ្សែបម្រើប៉ូលិស អ៊ុល រ៉ាវី សន្សំប្រាក់ជិត៥ឆ្នាំទើបទិញម៉ូតូបានមួយគ្រឿង
ចន្លោះមិនឃើញ
ខ្សែបម្រើរបស់ក្លិបអគ្គស្នងការដ្ឋាននគរបាលជាតិ(ប៉ូលិស) អ៊ុល រ៉ាវី មានលទ្ធភាពទិញម៉ូតូបានមួយគ្រឿងសម្រាប់ជិះផ្ទាល់ខ្លួន បន្ទាប់ព្យាយាមសន្សំប្រាក់អស់រយៈជិត៥ឆ្នាំក្នុងនាមជាកីឡាករបាល់ទាត់ម្នាក់។
អ៊ុល រ៉ាវី បានឲ្យដឹងថា រូបគេចំណាយពេលជិត៥ឆ្នាំដើម្បីសន្សំប្រាក់បាន១៣០០ដុល្លារអាមេរិក ដើម្បីទិញម៉ូតូមួយគ្រឿងសម្រាប់ធ្វើដំណើរទៅហ្វឹកហាត់បាល់ទាត់។ តាំងពីចាប់ផ្ដើមចូលលេងបាល់ទាត់មកដល់ពេលនេះ ប្រាក់ដែលរូបគេសល់ពីការចាយក្នុងមួយខែយ៉ាងច្រើនសល់ត្រឹម៧០ទៅ៨០ដុល្លារអាមេរិកតែប៉ុណ្ណោះ។
ខ្សែបម្រើជម្រើសជាតិអាយុក្រោម២៣ឆ្នាំរូបនេះបន្តថា ប្រាក់ខែនៅក្លិបក្នុងមួយខែបាន៣៥០ដុល្លារអាមេរិក។ ចំណែកការចំណាយលើថ្លៃផ្ទះ ទឹកនិងភ្លើងក្នុងមួយខែចន្លោះពី៨០ទៅ៩០ដុល្លារអាមេរិក។ ក្រៅពីនេះនៅថ្លៃចាយវាយប្រចាំថ្ងៃ ម្ហូបអាហារ ខណៈភរិយារបស់គេទើបនៅជាប់ដៃជាមួយកូនតូចនៅឡើយដែលមិនទាន់អាចចេញធ្វើការបាន ដូច្នេះបន្ទុកក្នុងគ្រួសារត្រូវពឹងផ្អែកទាំងស្រុងលើប្រាក់ខែរបស់គេ។ ម្យ៉ាងទៀត ម្ដាយរបស់គេក៏ជួបការលំបាកដោយសារជាស្ត្រីមេម៉ាយ។
អ៊ុល រ៉ាវី បាននិយាយថា ៖«ខ្ញុំចាប់លេងបាល់តាំងឆ្នាំ២០១០។ ខ្ញុំព្យាយាមចាយសន្សំសំចៃដោយក្នុងមួយថ្ងៃចាយតែលើម្ហូបអាហារបន្តិចបន្ទួច ដើម្បីទុកប្រាក់ខ្លះសន្សំទិញម៉ូតូ ហើយក៏ទិញបានមួយគ្រឿង តម្លៃ១៣០០ដុល្លារអាមេរិក។ ទម្រាំទិញម៉ូតូនេះបាន ខ្ញុំចំណាយពេលសន្សំប្រាក់ជិត៥ឆ្នាំ។ ក្នុងមួយខែច្រើនណាស់សល់ត្រឹម៧០ឬ៨០ដុល្លារ បើកូនឈឺទៀត ខែខ្លះអស់ គ្រួសារខ្ញុំមិនហ៊ានហូបអីឆ្ងាញ់ញឹកញាប់ទេ»។
រយៈពេលចុងក្រោយនេះ អ៊ុល រ៉ាវី មិនបានបង្ហាញខ្លួនឲ្យក្រុមប៉ូលិសសម្រាប់ការប្រកួតលីកបាល់ទាត់កម្ពុជាឡើយដោយសារមានរបួសដៃ។ បច្ចុប្បន្នរូបគេកំពុងសម្រាកព្យាបាលរបួសដៃ បន្ទាប់ពីជួបគ្រោះថ្នាក់ចរាចរណ៍កាលពីពេលកន្លងទៅ ហើយគេនឹងត្រូវអវត្តមានមិនអាចជួយក្រុមប៉ូលីសរហូតដល់ពាក់កណ្ដាលខែក្រោយ។ ការចំណាយសម្រាប់ការព្យាបាលរបួសនេះ ក្លិបបានជួយចេញទាំងស្រុង៕
អត្ថបទ៖ ស្រី សុវណ្ណដារ៉ា
