ហេតុផលយ៉ាងពិសេស ដែលតារាសិចស៊ី អាលីយ៉ា ទៅគាំទ្រ ពេជ្រ សីហា ដល់សង្វៀន

2015-05-05 13:35:30
ប្រវត្តិ

2015-05-05 13:35:30
ចំនួនមតិ 0 | ចំនួនចែករំលែក 0

ចន្លោះមិនឃើញ

តារាសម្ដែង និងជាឌីជេដ៏ល្បីមួយរូបកញ្ញា អាលីយ៉ា បានទៅគាំទ្រកីឡាករប្រដាល់ ពេជ្រ សីហា ដល់សង្វៀនអាស៊ីអាគ្នេយ៍កាលពីយប់ថ្ងៃអាទិត្យ ទី៣ ខែឧសភាកន្លងទៅ។ ហេតុអ្វីបានជាតារាសម្តែងដ៏ល្បីរូបនេះទៅគាំទ្រកីឡាករដល់សង្វៀន?

អាលីយ៉ា ដែលមហាជនស្គាល់ថាជាតារាសម្ដែង និងតារាម៉ូដែលល្បីសិចស៊ីម្នាក់ប្រាប់ Sabay ថា មានហេតុខ្លះៗដែលកញ្ញាទៅគាំទ្រ ពេជ្រ សីហា ដល់សង្វៀនប្រកួតគឺ ទីមួយ ពេជ្រ សីហា ជាមិត្តភ័ក្តិរបស់មិត្តជិតស្និទ្ធរបស់កញ្ញាម្នាក់។ ទីពីរ ពេជ្រ សីហា ក៏ជា Friend មួយរូបនៅក្នុងគណនី Facebook របស់នាង។ ទីបីកីឡាករប្រដាល់ម្នាក់នេះធ្លាប់ធ្វើកិច្ចការមួយចំនួនដែលពាក់ព័ន្ធនឹងការងាររបស់នាង និងទីបួនកញ្ញាគ្រោងរៀបចំឲ្យ ពេជ្រ សីហា បានសម្ដែងក្បាច់គុនប្រដាល់នៅក្នុងខ្សែភាពយន្តនៅពេលកញ្ញាមានម្ចាស់ឧបត្ថម្ភនាពេលខាងមុខ។

កញ្ញារៀបរាប់ទៀតថា កញ្ញាចូលចិត្តហាត់ល្បុក្កតោ និងប្រដាល់ ពីព្រោះកីឡានាំមកនូវអត្ថប្រយោជន៍ច្រើន។ «កីឡាធ្វើឲ្យយើងឃ្លាតឆ្ងាយពីអំពើអបាយមុខផ្សេងៗដូចជាគ្រឿងញៀនជាដើម។ កីឡាជាឱសថ និងជាថ្នាំទិព្វដ៏សក្ដិសិទ្ធិជួយដល់អ្នកមានវិបត្តិផ្លូវចិត្ត បញ្ញាសុខភាព។ ចំពោះនាងខ្ញុំវិញ ខ្ញុំស្រលាញ់កីឡា ហើយខ្ញុំត្រូវតែគាំទ្រអ្នកកីឡា ព្រោះកុំទុកពេលទំនេរឲ្យអត់ប្រយោជន៍ ទោះជាមិនមែនជាអ្នកសិល្បៈ ក៏ខ្ញុំគាំទ្រដែរ»។

អាលីយ៉ា បន្ថែមថា តាមពិតទៅកញ្ញាស្ទើរតែដាច់ចិត្តឡើងប្រកួតម្តងៗទៅហើយនៅពេលកញ្ញាបានហាត់ប្រដាល់ ហើយកីឡាករនៅក្លិបជាមួយ ពេជ្រ សីហា ជំរុញលើកទឹកចិត្តឲ្យឡើងប្រកួត។

«មានរឿងគួរឲ្យអស់សំណើចដែរ ពេលខ្ញុំទៅហាត់ប្រដាល់ ពួកគាត់ជំរុញឲ្យខ្ញុំឡើងប្រកួត ពួកគាត់ថា ឡើងវ៉ៃទៅ ធ្វើឲ្យល្បី ប្លែកពីគេ តែខ្ញុំគិតខ្លាំងមែនទែន ព្រោះជាតារាសម្តែង តារាម៉ូដែល បើឡើងវ៉ៃទៅ បែកមុខ បែកមាត់ ធ្វើម៉េចទៅការងារសិល្បៈ»។ អាលីយ៉ានិយាយ។

ឌីជេ អាលីយ៉ា (រូបថត អាលីយ៉ា)

មិនត្រឹមតែប៉ុណ្ណោះការទំនាក់ទំនងរាប់អានជាមួយកីឡាករប្រដាល់ទាំងនោះ ក៏ជាផ្នែកមួយជួយធ្វើឲ្យពួកគាត់មានអារម្មណ៍សប្បាយរីករាយ និងមានកម្លាំងចិត្តបន្តអាជីពប្រដាល់របស់ពួកគាត់។ អាលីយ៉ា និយាយថា ៖«មិនមែន ខ្ញុំស្គាល់តែ ពេជ្រ សីហា ទេ ខ្ញុំកីឡាករជាច្រើនទៀត ហើយខ្ញុំបានស្និទ្ធស្នាលគ្នាជាមួយពួកគាត់ ធ្វើឲ្យពួកគាត់សប្បាយរីករាយ ព្រោះខ្ញុំជាអ្នកសិល្បៈ ហើយរាប់អានពួកគាត់»។

ការទំនាក់ទំនងរបស់ឌីជេ អាលីយ៉ា ជាមួយ ពេជ្រ សីហា ត្រូវបានគេដឹងជាទូទៅនៅពេលតារាស្រីរូបនេះបានទៅគាំទ្រផ្ទាល់ដល់សង្វៀនប្រដាល់ទូរទស្សន៍អាស៊ីអាគ្នេយ៍ដែលជាកន្លែងប្អូនប្រុសរបស់ ពេជ្រ សុផាន់ បានយកឈ្នះកីឡាករមកពីប្រទេសថៃកាលពីថ្ងៃអាទិត្យកន្លងទៅ៕

អត្ថបទ៖ ជាន ចាន់រ៉ា