ហ្វូតសាលជម្រើសជាតិ ជាប់លេខ៤ពីរដង នៅ AFF Futsal

2014-12-19 21:22:55
ប្រវត្តិ

2014-12-19 21:22:55
ចំនួនមតិ 0 | ចំនួនចែករំលែក 0

ចន្លោះមិនឃើញ

តាំងពីពានរង្វាន់ជើងឯកហ្វូតសាលអាស៊ាន AFF Futsal Championship បង្កើតឡើងដំបូងក្នុងឆ្នាំ២០០១មក ក្រុមជម្រើសជាតិហ្វូតសាលកម្ពុជា ធ្លាប់ចូលរួមប្រកួតចំនួន៣ដង ក្នុងនោះទទួលបានចំណាត់ថ្នាក់លេខ៤ចំនួន២ដង ហើយម្ដងទៀតត្រូវធ្លាក់ត្រឹមវគ្គជម្រុះតាមពូល។

សហព័ន្ធកីឡាបាល់ទាត់កម្ពុជា បញ្ជូនក្រុមជម្រើសជាតិទៅប្រកួតប្រជែងដំបូងនៅឆ្នាំ២០០៣ ដែលប្រារព្ធឡើងនាទីក្រុង Kauntan ប្រទេសម៉ាឡេស៊ី មាន៦ប្រទេសចូលរួម ដោយមានតែ១ពូលប៉ុណ្ណោះ។ ក្រោយការប្រកួតវិលជុំក្នុងពូល ក្រុមឈរកំពូលតារាង និងលេខ២ ត្រូវប្រកួតគ្នាដណ្ដើមជើងឯក ឯក្រុមលេខ៣ត្រូវប៉ះក្រុមចំណាត់ថ្នាក់លេខ៤ក្នុងពូល ដើម្បីរើសយកក្រុមលេខ៣ប្រចាំព្រឹត្តិការណ៍។

ក្រុមហ្វូតសាលជម្រើសជាតិកម្ពុជាប្រកួតកន្លងមក

ក្រោយ៥ប្រកួតក្នុងពូលបានបញ្ចប់ ក្រុមលេខមួយថៃមាន១៥ពិន្ទុ មានសិទ្ធិប្រជែងយកពានជាមួយម៉ាឡេស៊ីដែលកាន់១២ពិន្ទុ។ ចំណែកក្រុមមាន៩ពិន្ទុក្នុងដៃឥណ្ឌូណេស៊ី ត្រូវប្រកួតដណ្ដើមលេខ៣ទល់នឹងកម្ពុជាដែលទទួលបាន៣ពិន្ទុ។ តាមការពិត ប្រ៊ុយណេ និងហ្វីលីពីន ក៏មាន៣ពិន្ទុដែរ តែមានគ្រាប់សំណល់តិចជាងកម្ពុជា ហេតុនេះក្រុមទាំង២ គ្មានសំណាងបន្តដំណើរទៅវគ្គបន្ទាប់ដូចកម្ពុជាឡើយ។

យ៉ាងណាមិញ ជម្រើសជាតិកម្ពុជា បានត្រឹមទទួលចំណាត់ថ្នាក់លេខ៤ប៉ុណ្ណោះ ក្រោយបរាជ័យប្រផុតប្រផើយ ៣-៥ ក្រោមថ្វីជើងឥណ្ឌូណេស៊ី ខណៈថៃបំបាក់ម៉ាឡេស៊ី ៤ – ០ គ្រងជើងឯកជាលើកទី២។

អ្នកស៊ុតចូលទីច្រើនជាងគេឲ្យកម្ពុជា គឺកីឡាករ ចាន់ វាសនា (១២គ្រាប់) ហើយតិចជាងកីឡាករស៊ុតបញ្ចូលទីច្រើនជាងគេប្រចាំព្រឹត្តិការណ៍ (Top Scorer) របស់ថៃ Joe Nuengkord ត្រឹម២គ្រាប់ប៉ុណ្ណោះ។ ជាមួយគ្នានេះដែរ ចាន់ អរុណរ័ត្ន ស៊ុតបាន៧គ្រាប់ កៅ គីរី ៤គ្រាប់ ឯក សុវណ្ណារ៉ា ៣គ្រាប់ ទុន ឌីម៉ង់ ២គ្រាប់ និង១គ្រាប់ទៀតដោយកីឡាករ គឹម ច័ន្ទប៊ុនរិទ្ធិ។

២ឆ្នាំក្រោយ មក ក្នុងការប្រកួត AFF Futsal Championship 2006 នៅបាងកក ប្រទេសថៃ ជម្រើសជាតិកម្ពុជាឡើងដល់វគ្គពាក់កណ្ដាលផ្តាច់ព្រ័ត្រម្ដងទៀត ក្រោយឈរលេខ២ក្នុងពូល B តែត្រូវថៃលត់យ៉ាងចាស់ដៃ ១៩ – ១ ហើយបន្ដចាញ់មីយ៉ាន់ម៉ា ១០ – ២ ក្នុងជំនួបដណ្ដើមចំណាត់ថ្នាក់លេខ៣។ កាលនោះ ជម្រើសជាតិថៃគ្រងជើងឯកលើកទី៤ជាប់ៗគ្នា ដោយយកឈ្នះ ឥណ្ឌូណេស៊ី ១០-៣ វគ្គផ្ដាច់ព្រ័ត្រ។

ខកខានមិនបានចូលរួម៦ឆ្នាំ ពោលនៅឆ្នាំ២០១២ កម្ពុជាឈរលេខ៤ម្ដងទៀត តែមិនមែនប្រចាំព្រឹត្តិការណ៍ឡើយ គឺលេខ៤ក្នុងពូល B ដែលរួមមាន៥ក្រុម។ លើកនេះជម្រើសជាតិធ្វើមិនបានល្អដូច២លើកកន្លងមកឡើយ ព្រោះត្រូវម៉ាឡេស៊ីសំពង ៨-០ ក្នុងថ្ងៃប្រកួតបើកឆាក បន្តចាញ់ទាំងសោកស្ដាយ ៥-៦ ទល់នឹងមីយ៉ាន់ម៉ា និងបរាជ័យម្ដងទៀត ក្រោមថ្វីជើងវៀតណាម ១-៤ តែស្ដារមុខមាត់វិញបានខ្លះ ក្រោយបំបាក់ក្រុមបាតពូលហ្វីលីពីន ៩-៥ ក្នុងជំនួបចុងក្រោយ។

សម្រាប់ការប្រកួត AFF Futsal Championship ២០១៣ និង២០១៤ កម្ពុជាមិនបញ្ជូនកីឡាករទៅចូលរួមនោះទេ៕

អត្ថបទ៖ រស់ កាណាល់