ប្រវត្តិ បែ មករា ធ្លាប់ជាអ្នកចាត់ការនៅថៃមុនពេលជោគជ័យនៅបឹងកេត

2018-05-03 02:43:00
ប្រវត្តិ

2018-05-03 02:43:00
ចំនួនមតិ 0 | ចំនួនចែករំលែក 0

ចន្លោះមិនឃើញ

លោក បែ មករា ជាអតីតអ្នកចាត់ការរបស់ក្លឹបបាល់ទាត់កំពូលភ្នំពេញក្រោន។ លោកបានជួយឲ្យក្រោន លើកពានរង្វាន់មិត្តហ្វូនខេមបូឌានលីកឆ្នាំ២០០៨ និង២០១០។ លោកក៏បានជួយឲ្យក្រោនឈ្នះពានរង្វាន់សម្ដេច ហ៊ន សែន ឆ្នាំ២០០៨ និង២០០៩ផងដែរ។ ឆ្នាំ២០១១ លោកបានមកធ្វើជាអ្នកចាត់ការបឹងកេតដែលជួយឲ្យក្លឹបនេះឈ្នះជើងឯកលីគកម្ពុជា៣រដូវកាល។

លោក បែ មករា

បន្ទាប់ពីក្រោនទទួលបានជើងឯកមិត្តហ្វូនខេមបូឌានលីគឆ្នាំ២០១០ លោក បែ មករា ក៏បានចាកចេញទៅកាន់តួនាទីជាអ្នកចាត់ការនៅក្លិប Mukdahan FC រយៈពេល៣ខែ រួចក៏ចាកចេញពីក្លិប Mukdahan FC ទៀត ដោយសារតែក្លឹបជួបវិបត្តិហិរញ្ញវត្ថុ។ ក្រោយមកលោកបានទៅបំពេញការងារនៅក្លិប Samut Sakhon FC ក្នុងនាមជាទីប្រឹក្សា។ តើរឿងរ៉ាវជីវិតបែបណាទើបធ្វើឲ្យលោកអាចក្លាយជាអ្នកចាត់មានឈ្មោះបោះសំឡេងនៅក្នុងពិភពបាល់ទាត់ខ្មែរ និង ធ្លាក់ដល់ប្រទេសថៃបែបនេះ?

ជីវិតផ្ទាល់ខ្លួន

លោក បែ មករា កើតនៅថ្ងៃទី ០៧ ខែមករា ឆ្នាំ១៩៧៩ នៅម្ដុំ ផ្សារអូរឫស្សី រាជធានីភ្នំពេញ។ លោក មករាមានកម្ពស់១,៧៥ម៉ែត្រ។ ឪពុកឈ្មោះ ថោង មុន្នី ជាអ្នកបញ្ចូលសំឡេងខ្សែភាពយន្តក្នុងអំឡុងទសវត្សរ៍ឆ្នាំ៩០ នៅស្ថានីយទូរទស្សន៍ប៉ុស្តិ៍លេខ៥។ ម្ដាយឈ្មោះ ជា ទីន ជាមេផ្ទះ។ លោកមានបងប្អូនបង្កើត៥នាក់ដែលក្នុងនោះស្រី៣នាក់ និងប្រុស២នាក់។ លោកជាកូនទី២ក្នុងគ្រួសារ។ បងស្រីទី១ ឈ្មោះ ជាតិ ចិន្តា, ប្អូនប្រុសទី៣ឈ្មោះ មុនី ជេដ្ឋា, ប្អូនស្រីទី៣ មុនី ពុំធារ៉ាក់ និង ប្អូនស្រីពៅ មុនី ដារីយ៉ាន។

លោក បែ មករា

កម្រិតវប្បធម៌

គ្រួសារនៅភ្នំពេញ លោក បែ មករា បែរជាទៅសិក្សាថ្នាក់បឋមសិក្សានៅឯស្រុកកៀនស្វាយ ខេត្តកណ្តាលវិញ។ ការរៀននៅស្រុកកៀនស្វាយគឺស្នាក់អាស្រ័យនៅជាមួយជីដូន។ បន្ទាប់មកថ្នាក់អនុវិទ្យាល័យ និងវិទ្យាល័យ យុវជន មករា បានផ្លាស់មកសិក្សានៅសាលាបាក់ទូក។ ឆ្នាំ១៩៩៦ ជាឆ្នាំដែលប្រឡងជាប់ថ្នាក់មធ្យមសិក្សាទុតិយភូមិ។ ក្រោយមក លោកបានប្រឡងជាប់ ហើយ ចូលរៀននៅសាលាមធ្យមសិក្សាបច្ចេកទេសដែលមានទីតាំងនៅក្រោយសាកលវិទ្យាល័យជាតិគ្រប់គ្រង(ពីមុន)។ នៅឆ្នាំ១៩៩៩ លោកបានបញ្ចប់ថ្នាក់បរិញ្ញាបត្ររងនៅសាលានេះ។ ឆ្នាំ១៩៩៩-២០០១ ជាឆ្នាំដែលលោកបានទៅបន្តការសិក្សានៅសាកលវិទ្យាល័យភូមិន្ទភ្នំពេញដោយចាប់យកជំនាញបរិញ្ញាបត្រគ្រប់គ្រងពាណិជ្ជកម្មអន្តរជាតិ។ ទីបំផុត លោកបានប្រឡងជាប់ជាស្ថាពរនៅឆ្នាំ២០០១។

ការចាប់ផ្ដើមលេងបាល់ទាត់

បែ មករា មិនមែនជាអ្នកដែលបានហ្វឹកហាត់កីឡាបាល់ទាត់ដូចកីឡាករមួយចំនួនឡើយ ប៉ុន្តែការស្រឡាញ់របស់កុមារាម្នាក់នេះបានដិតជាប់នឹងអារម្មណ៍ជានិច្ច។ ថ្វីបើមិនបានហ្វឹកហាត់ត្រឹមត្រូវ ប៉ុន្តែ បែ មករា តែងតែលេងបាល់ទាត់ជាញឹកញាប់ជាមួយមិត្តភ័ក្ដិនៅសាលាតាំងពីតូចមក។ លុះដល់ធំពេញវ័យក៏លោក មិនបានចូលលេងឲ្យក្លឹបអាជីពណាមួយឡើយនៅក្នុងស្រុកខ្មែរ។

លោក បែ មករា ពេលនៅក្លឹបថៃ

ការបង្កើតក្លឹបឆ្នាំ២០០២

ដោយសារតែចិត្តអន្ទះសាចង់ឃើញភាពរីកចំរើននៃវិស័យបាល់ទាត់នៅក្នុងស្រុក លោក បែ មករា និងបងថ្លៃ ឈ្មោះ ថាន់ លក្ខិណា ដែលជាប្រធានទីផ្សារនៅស្ថានីយទូរទស្សន៍អាស៊ីអាគ្នេយ៍បានបង្កើតក្រុមបាល់ទាត់មួយក្រុមនៅឆ្នាំ២០០២។ ពេលនោះលោកកំពុងបម្រើការនៅក្រុមហ៊ុនឯកជនមួយនៅម្ដុំចម្ការដូង។ ក្រុមនេះស្ថិតនៅក្រោមការគ្រប់គ្រងរបស់លោក និងបងប្រុស។ ការបង្កើតក្រុមនេះមិនទាន់មានគោលដៅថាត្រូវធ្វើទៅមុខទៀតឬយ៉ាងណានោះទេ តែជាការបង្កើតដើម្បីលេងជាលក្ខណៈមិត្តភាព សាមគ្គីភាព និង ដើម្បីសុខភាពប្រចាំថ្ងៃរវាងបុគ្គលិកក្រុមហ៊ុនជាមួយគ្នានិងក្រុមហ៊ុនផ្សេង។ ដល់ឆ្នាំ២០០៣ បងថ្លៃរបស់លោក និងរូបលោកផ្ទាល់បានប្ដូរឈ្មោះក្រុមទៅជា Khmer Empire។

ទោះបីជាប្ដូរឈ្មោះក៏ដោយ កីឡាករទាំងអស់មិនទទួលប្រាក់បៀវត្សរ៍នោះទេ។ រហូតដល់ឆ្នាំ២០០៤ លោកបានចាប់ផ្ដើម ហៅកីឡាករល្អៗមួយចំនួនឲ្យចូលរួមក្រុម ដូចជា គិត ធារិទ្ធ និង ហៅ សុជាតិ ចូលរួម។ ក្នុងឆ្នាំដដែលនោះក្រុមរបស់លោកបានចូលរួមលេងស្ម័គ្រចិត្តក្នុងក្របខ័ណ្ឌ ក២។

បន្ទាប់មកទៀតលោកកាន់តែបែកគំនិតវែងឆ្ងាយ ហើយក៏បានដាក់ពាក្យទៅកាន់សហព័ន្ធកីឡាបាល់ទាត់កម្ពុជាដើម្បីចូលរួមលេងលីកកម្ពុជាដែលមាន៦ក្រុម។ សហព័ន្ធកីឡាបាល់ទាត់កម្ពុជាក៏បានយល់ព្រមតាមការស្នើសុំនេះ។ បន្ទាប់ពីបានចូលរួមលេងក្នុងលីគ ក្រុម Khmer Empire បានជាប់ចំណាត់ថ្នាក់លេខ២ក្នុងឆ្នាំ២០០៤ បន្ទាប់ពីក្រុមកីឡារិទ្ធជាប់លេខ១។ ក្នុងអំឡុងពេលដែលក្រុមរបស់លោកលេង លោកមានតួនាទីជាកីឡាករផង និងអ្នកគ្រប់គ្រងផង។

លោក បែ មករា ពេលនៅក្លឹបភ្នំពេញក្រោន

ឈ្មោះ Phnom Penh Empire

ក្រុមរបស់លោក បែ មករា មានឈ្មោះថា Khmer Empire។ ចំណែកឯក្រុមដែលមានលោក លី សុភ័ក្រ ជាប្រធានក្លឹបនោះឈ្មោះថា Phnom Penh United។ នៅឆ្នាំ២០០៨ ក្រុមទាំងពីរបានរួមបញ្ចូលគ្នាដោយដាក់ឈ្មោះថ្មីថា Phnom Penh Empire ដែលស្ថិតក្រោមការគ្រប់គ្រងរបស់លោក ហុក សុចិត្រា ជាអ្នកចាត់ការ ហើយលោក បែ មករា ជាអ្នកចាត់ការរង។ ក្រុមឈ្មោះថ្មី Phnom Penh Empire ឈ្នះពានរង្វាន់សម្ដេចហ៊ុន សែនដោយផ្ដួលក្រុមព្រះខ័នរាជ ១-០។ គ្រាប់ជ័យជម្នះរបស់ក្រុមស៊ុតដោយកីឡាករ Anucha Chuaisri ។

ឈ្មោះ Phnom Penh Crown

ឆ្នាំ២០០៩ ពីPhnom Penh Empire ត្រូវបានប្ដូរម្ដងទៀតទៅជាក្រុមភ្នំពេញក្រោន (Phnom Penh Crown)ដល់សព្វថ្ងៃដែលទទួលបានការឧបត្ថម្ភពី កាស៊ីណូក្រោន(Crown Casino)ហើយកាលនោះក្រុមនេះបានបញ្ចប់ទៅក្នុងលំដាប់ថ្នាក់លេខ៤ក្នុងតារាង តែក្រុមបានឈ្នះពានរង្វាន់សម្ដេចហ៊ុន សែនជាលើកទី២ដោយបានយកឈ្នះលើក្រុមណាហ្គាខប១-០។ គ្រាប់ជ័យជម្នះរបស់ក្រោនរកបានដោយកីឡាករ កែវ សុខង៉ន។ ពេលនោះជាពេលដែលលោក បែ មករា បានក្លាយជាអ្នកចាត់ការតែម្ដងបន្ទាប់ពីការចាកចេញរបស់លោក ហុក សុចិត្រា។

លោក បែ មករា

ឆ្នាំ២០០៩ដដែលនោះ លោក បែ មករា មិនអាចនាំឲ្យភ្នំពេញក្រោនឆ្លងដល់ជុំបន្តនៃពានរង្វាន់ AFC President’s Cupឡើយ បើទោះបីជាឈ្នះក្រុម Bhutan’s Yeedzinក៏ដោយ តែក្រុមនេះបានចាញ់ពីរប្រកួតក្នុងចំណោមបីប្រកួត។ ឆ្នាំជាមួយគ្នានោះ ក្រោនបានយកឈ្នះក្រុម Young Lions ក្នុងពាន Singapore Cup និងបានឆ្លងដល់វគ្គ១/៨ផ្ដាច់ព្រ័ត្រតែធ្លាក់ក្រោមស្នាដៃក្រុម Bangkok Glass មកពីប្រទេសថៃ។

ឆ្នាំ២០១០ លោកបានជួយឲ្យ ភ្នំពេញក្រោន ក្លាយជាម្ចាស់ជើងឯកពានរង្វាន់មិត្តហ្វូនខេមបូឌានលីគដោយបានយកឈ្នះក្រុម ព្រះខ័នរាជ ៤-៣ក្នុងវគ្គផ្ដាច់ព្រ័ត្រ។ ឆ្នាំនោះដែរ ក្រោន គួរតែទទួលបានពានរង្វាន់សម្ដេចហ៊ុន សែនលើកទី៤ តែត្រូវភ្លាត់ស្នៀតចាញ់ក្រុមក្រសួងការពារជាតិក្នុងលទ្ធផល ២-៣ទៅវិញ។

ក្រោយចេញពីភ្នំពេញក្រោនឆ្នាំ២០១០

បន្ទាប់ពីជួយឲ្យ ភ្នំពេញក្រោន ឈ្នះពានរង្វាន់មិត្តហ្វូនខេមបូឌានលីគ២០១០ លោក បែ មករា បានទៅកាន់តួនាទីជាអ្នកចាត់ការ របស់ក្រុម Mukdahan FC នៃប្រទេសថៃរយៈពេលបីខែ។ ការទៅដឹកនាំក្រុម Mukdahan FC ដោយសារតែលោកមានទំនាក់ទំនងល្អជាមួយថ្នាក់ដឹកនាំនៅទីនោះ គួបផ្សំនឹងបទពិសោធរបស់លោកដ៏ជោកជាំនៅកម្ពុជា។ បន្ទាប់មកទៀត លោកចេញទៅបំពេញតួនាទីជាទីប្រឹក្សាក្លឹប Samut Sakhon FC រហូតដល់ចុងខែវិច្ឆិកាឆ្នាំ២០១១។

លោក បែ មករា លោកគ្រូ ហៅ សុជាតិ និងគ្រូជំនួយ

ពានរង្វាន់កិត្តិយស

ក្នុងនាមជាអ្នកគ្រប់គ្រងក្រុម ភ្នំពេញក្រោន លោកបានជួយឲ្យក្រុមនេះឈ្នះពានរង្វាន់មិត្តហ្វូនខេមបូឌានលីគពីរសម័យកាល គឺឆ្នាំ២០០៨ និង ២០១០។ ឈ្នះពានរង្វាន់សម្ដេច ហ៊ុន សែន មួយសម័យកាលឆ្នាំ២០០៨។ លោកបាននាំក្រោនឲ្យឈ្នះជើងឯកក្នុងកម្មវិធី 4 Team Tournament នៅថៃឆ្នាំ២០០៩ ដែលមានបួនក្រុមចូលរួម។ ក្រុមទាំងនោះមាន Mukdahan FC, ឡាវ, Loeicity និង ភ្នំពេញក្រោន។

អ្នកចាត់ការក្លឹបបឹងកេត*

ដើមខែធ្នូ ឆ្នាំ២០១១ នេះ លោក បែ មករា បានចូលកាន់តំណែងជាអ្នកចាត់ការរបស់ក្លឹប បាល់ទាត់បឹងកេត ដើម្បីដឹកនាំក្រុមក្នុងយុទ្ធនាការនៃពានរង្វាន់សម្ដេច ហ៊ុន សែន ឆ្នាំ២០១២ និងមិត្តហ្វូនខេមបូឌានលីគ។ លោកក៏ជាបុគ្គលសំខាន់ម្នាក់ជួយបឹងកេតឈ្នះជើងឯកលីគកំពូលកម្ពុជាបាន៣ដងហើយគឺឆ្នាំ២០១២ ២០១៦ និង២០១៧។ ចំណែកឆ្នាំ២០១៣ និង២០១៤បឹងកេតបានជើងឯករង ខណៈឆ្នាំ២០១៥បានត្រឹមចំណាត់ថ្នាក់លេខ៣។

បឹងកេតឈ្នះជើងឯកលីគកម្ពុជាឆ្នាំ២០១៧

ដំណាក់កាលលំបាកបំផុត

បន្ទាប់ពីបឹងកេតឈ្នះជើងឯកលីគឆ្នាំ២០១៧ ម្ចាស់ក្លឹបដែលជាថៅកែចម្ការកៅស៊ូបានដកខ្លួនចេញពីក្លឹបដែលបន្ទុកធ្លាក់ទៅលើលោក បែ មករាទទួលរ៉ាប់រងដោះស្រាយជាមួយក្រុមទាំងមូល។ រយៈពេលប្រហែលជា៥ខែដំបូងនៃរដូវកាល២០១៨ លោកជួបការលំបាកខ្លាំងបំផុតដែលស្ទើរឈានដល់ការរំលាយចោលក្លឹបទៅ។ សំណាងល្អ លោកទទួលបានម្ចាស់ឧបត្ថម្ភពី Cambodia Beer សម្រាប់ទឹកប្រាក់១០ម៉ឺនដុល្លារអាមេរិកដើម្បីដោះស្រាយប្រាក់ខែដល់បុគ្គល និងកីឡាករទាំងអស់។ សម្រាប់ប្រាក់ឧបត្ថម្ភនេះមិនធ្វើឲ្យគ្រប់គ្រាន់ដើម្បីទ្រទ្រង់ក្លឹបរហូតចប់រដូវកាលឡើយ។

លោក បែ មករា ដេកគិត ដើរគិតគ្រប់ពេលវេលាដើម្បីរកមធ្យោបាយជួយក្លឹប។ លោកបានប្រាប់ថា ការគិតរបស់លោកដើម្បីជួយក្លឹបគឺច្រើនជាងអ្វីដែលលោកបានគិតដល់គ្រួសារប្រពន្ធកូន។ ពេលខ្លះមានបញ្ហាជាមួយប្រពន្ធកូន និងកន្លែងធ្វើការផ្សេងទៀត ព្រោះតែលោកខំប្រឹងចំណាយពេលវេលាច្រើនលើសលប់ដើម្បីជួយសង្គ្រោះបឹងកេត។ ទីបំផុតលោកបានធូរទ្រូងដោយលោកបានជួប លោកស្រី ពុទ្ធ ធីតាដែលចូលខ្លួនមកអភិវឌ្ឍក្លឹបបឹងកេតបន្តចាប់ពីឧសភា ឆ្នាំ២០១៨ទៅ។

អ្នកចាំទីបឹងកេត ស៊ូ យ៉ាទី លើកពានលីគកម្ពុជាឆ្នាំ២០១៧

បទពិសោធកន្លងមក

លោក បែ មករា ពិតជាមានបទពិសោធជោកជាំនៅក្នុងវិស័យបាល់ទាត់ទាំងនៅប្រទេសកម្ពុជានិងនៅប្រទេសថៃ។ លោកបានចែករំលែក បទពិសោធតាម Sabay ថា ក្លិបបាល់ទាត់មួយអាចដំណើរការណ៍ទៅយ៉ាងរលូនគឺពឹងផ្អែកនៅលើចំណុច៣សំខាន់ៗ។ ចំណុចទី១ មានគ្រឹះហិរញ្ញវត្ថុរឹងមាំ ទី២ ត្រូវមានរចនាសម្ព័ន្ធច្បាស់លាស់ និងទី៣ គ្រូបង្វឹកនិងកីឡាករត្រូវមានទិសដៅតែមួយ។

ចំណុចទី១ មានន័យថា ហិរញ្ញវត្ថុពិតជាដើរតួយ៉ាងសំខាន់ក្នុងការជួយគាំទ្រដល់ក្លឹបដើម្បីអភិវឌ្ឍធនធានដូចជាកីឡាករ និងហេដ្ឋារចនាសម្ពន្ធសម្ព័ន្ធនានាជាច្រើនទៀត។ ចំណុចទី២ រចនាសម្ព័ន្ធច្បាស់លាស់គឺសំដៅទៅលើការគ្រប់គ្រងបែបរដ្ឋបាល និង មានគណៈកម្មការត្រួតពិនិត្យត្រឹមត្រូវរបស់ក្លឹបដើម្បីគាំទ្រដល់ដំណើរការក្លឹប។ ចំណុចទី៣ គ្រូនិងសិស្សត្រូវតែដើរផ្លូវរួមគ្នា មានន័យថា ត្រូវតែមានគោលដៅរួមគ្នា និងសាមគ្គីភាពក្នុងក្រុមទើបទទួលបានជោគជ័យ។ ប្រសិនបើសិស្សមិនស្ដាប់គ្រូ ឬប្រកាន់និន្នាការស្អប់គ្នានៅក្នុងក្លឹប នោះក្លឹបពិតជាមិនអាចដើរទៅមុខបានឡើយ។

ការងារបាល់ទាត់ លោក បែ មករា ក៏មានការងារជាជំនួយការអគ្គនាយកក្រុមហ៊ុនឯកជនមួយដែលលោកទទួលបានប្រាក់ខែសមរម្យ។ ក្រៅពីនោះលោកធ្លាប់ជាជាភ្នាក់ងារ(Sport Agent)នាំចេញនាំចូលកីឡាករកម្ពុជា-ថៃ។ ការងារនេះ លោកអាចរកកម្រៃបានខ្លះពីការនាំចេញកីឡាករពីស្រុកខ្មែរទៅលេងនៅប្រទេសថៃ។ លោក បានបញ្ជាក់ថា កីឡាករដែលលោកបាននាំទៅលេងនៅប្រទេសថៃមាន ស៊ិន ដាលីន, កែវ សុខង៉ន, និង Julious ជាដើម។ ចំណែកឯការងារមួយទៀត គឺលោកជាអ្នកនាំចូលអីវ៉ាន់ផ្សេងៗពីប្រទេសថៃមកលក់នៅស្រុកខ្មែរនៅហាងមួយចំនួនផងដែរ។

បច្ចុប្បន្នលោក បែ មករា កំពុងយកចិត្តទុកដាក់ពង្រឹងក្លឹបបឹងកេតឲ្យក្លាយជាក្លឹបអាជីពពិតប្រាកដ និងលេចធ្លោមួយនៅតំបន់។ ជាពិសេសលោកនឹងរៀបចំក្លឹបឲ្យពេញលក្ខណៈស្របតាមគោលការណ៍របស់សហព័ន្ធបាល់ទាត់ទ្វីបអាស៊ី បន្ទាប់ពីទទួលបានគ្រួសារលោកស្រី ពុទ្ធ ធីតាចូលរួមអភិវឌ្ឍជាម្ចាស់ភាគហ៊ុនធំ៕

អត្ថបទ៖ ជាន ចាន់រ៉ា