ភ្លេចៗ​ខ្លួន ពាន​កំពូល​ទ្វីប​អាស៊ី AFC Champions League 2015 ឈាន​ដល់​វគ្គ​ពាក់​កណ្ដាល​ផ្ដាច់ព្រ័ត្រ​ហើយ។ ៤ក្រុម​ចុង​ក្រោយ ដែល​​ត្រូវ​ប្រជែង​គ្នា​យក​ពាន​រង្វាន់​នេះ គឺ​ក្រុម​ជើង​ឯកឆ្នាំ​២០១៣ Guangzhou Evergrande របស់ចិន, ក្រុម​ជើង​ឯក​រងឆ្នាំ​ចាស់​មក​ពី​​​អារ៉ាប៊ីសាអ៊ូឌីត Al-Hilal, ក្រុមជើងខ្លាំង​ជប៉ុន Gamba Osaka, និង​ក្រុម​ល្បី​របស់​អារ៉ាប់រួម Al-Ahli។

ក្នុង​ជើងទី២ វគ្គ​៨ក្រុម​ចុង​ក្រោយ​ យប់​មិញ​នេះ ក្រុម​ជើង​ខ្លាំង​ជប៉ុន Gamba Osaka បាន​ទម្លាក់​ជើង​ខ្លាំង​កូរ៉េខាងត្បូង Jeonbuk Motors ៣-២ ខណៈ​ជើង​ទី​១ ក្រុម​ទាំង​២​ ស្មើ​គ្នា ០-០។ ក្នុង​ការ​ប្រកួត​នេះ ក្រុម​ភ្ញៀវ​របស់​កូរ៉េខាងត្បូង បាននាំមុខ​តាំង​ពី​នាទី​១៣ តែ​ត្រូវ​ម្ចាស់​ផ្ទះ​ជប៉ុន​ដាក់​២​វិញ នៅ​នាទី​១៤ និង​៧៦។ Jeonbuk បាន​បន្ត​ក្ដី​សង្ឃឹម ដោយ​តាម​ស្មើ​នៅ​២នាទី​មុន​ចប់​ការ​ប្រកួត (បើ ស្មើ ២-២ Jeonbuk ជាប់ ដោយ​គិត​តាម away goals) តែ​នៅ​នាទី​៩០​ទៅ​ហើយ Gamba បាន​ស៊ុត​គ្រាប់​ទី​៣​ ឡើង​ទៅ​ជួប​​ Guangzhou Evergrande។

​ចំណែក Al-Ahli ដែល​ឈ្នះ​ក្រុម​អ៊ីរ៉ង់ Naft Tehran ១-០ កាល​ពី​ជើង​ទី​១ បាន​បន្ត​ឈ្នះ ២-១ ទៀត​​ក្នុង​​ដី​ខ្លួន​ឯង ជើង​ទី​២​យប់​មិញ។ ជ័យជម្នះ​នេះ ធ្វើ​ឲ្យ​ Al-Ahli ត្រូវ​ឡើង​ប៉ះ​ក្រុម​លេខ​២ឆ្នាំ​ចាស់ Al-Hilal។

២គូ​​ផ្សេង​ទៀត​ក្នុង​វគ្គ​៨​ក្រុម​ចុង​ក្រោយ ដែល​បញ្ចប់​កាល​ពី​យប់​ម្សិលមិញ គឺ Guangzhou Evergrande ស្មើ ក្រុម​ជប៉ុន Kashiwa Reysol ១-១ (ជើង​ទី១ Guangzhou ឈ្នះ ៣-១) ឯ Al-Hilal ស្មើ​ក្រុម​កាតារ Lekhwiya ២-២ (ជើង​ទី​១ Al-Hilal ឈ្នះ ៤-១)។

  ចុច​អាន៖ កីឡាករ​កំពូល​អឺរ៉ុប​ទាំង​៧ ជាប់សែស្រឡាយ​អាស៊ីអាគ្នេយ៍

ដោយ៖ សុវត្ថិ រូបភាព៖ fifa