កៅ បុរី បានម៉ូតូថ្មី១គ្រឿងក្រោយជួយឱ្យស្នងការត្បូងឃ្មុំលើកពានភូមិភាគកំពង់ចាម

2024-03-14 06:55:00
បាល់ទះ

2024-03-14 06:55:00
ចំនួនមតិ 0 | ចំនួនចែករំលែក 0

ចន្លោះមិនឃើញ

ក្រោយជួយឲ្យក្រុមកីឡាបាល់ទះស្នងការដ្ឋាននគរបាលខេត្តត្បូងឃ្មុំ ឈ្នះជើងឯកពានភូមិភាគកំពង់ចាម WURKZ Special Volleyball Cup 4x4 ឆ្នាំ២០២៤កាលពីពេលថ្មីៗនេះ កៅ បុរី ដែលជាអ្នកប៉ះសេឆ្នើមនិងជាប្រធានក្រុម ត្រូវបានលោកឧត្ដមសេនីយ៍ទោ ម៉ុន មាគ៌ា ស្នងការនិងជាប្រធានកីឡាបាល់ទះនៃស្នងការដ្ឋាននគរបាលខេត្តត្បូងឃ្មុំ ឧបត្ថម្ភម៉ូតូហុងដាឌ្រីម១គ្រឿងជាការលើកទឹកចិត្ត។

កៅ បុរី និងលោកឧត្ដមសេនីយ៍ទោ ម៉ុន មាគ៌ា

ជាមួយរង្វាន់លើកទឹកចិត្តដ៏ធំនេះ កៅ បុរី បានបង្ហាញអារម្មណ៍សប្បាយរីករាយជាខ្លាំង និងបានប្ដេជ្ញាចិត្តខំប្រឹងប្រែងបន្ថែមទៀតនៅការប្រកួតធំនៅរាជធានីភ្នំពេញ។

បើតាមការបញ្ជាក់ពីអតីតអ្នកប៉ះសេក្លឹបបញ្ជាការរដ្ឋានអង្គរក្ស ការផ្ដល់ជូនម៉ូតូហុងដាឌ្រីមឆ្នាំ២០២៤ដ៏ថ្មីសន្លាងនេះ គឺដោយសារតាំងពីបង្កើតក្រុមកកីឡាបាល់ទះស្នងការខេត្តត្បូងឃ្មុំ រូបគេពុំដែលបានទទួលប្រាក់ឧបត្ថម្ភបន្ថែមពីលើឡើយ ចំណែកកីឡាករក្មេងៗពួកគេទទួលបានជាហូហែរ។

បុរីបានពន្យល់ថា ៖"បាទបង! គាត់ថាតាំងពីកកើតក្រុមកីឡាម៉ោ គាត់អត់ដែលបានអីឱ្យខ្ញុំអ៊ី ដោយសារក្មេងៗមានប្រាក់ឧបត្ថម្ភពីលើចឹងទៅ ហើយខ្ញុំអត់មានទេ ជួយហ្វឹកហាត់និងដឹកនាំក្រុមរហូតតាំងពី២០២២មក ហើយគាត់ថាលុយកាក់គាត់មិនដែលឧបត្ថម្ភ អ៊ីចឹងគាត់ឧបត្ថម្ភសរុបឱ្យខ្ញុំចឹងទៅ»។

ក្លឹបបាល់ទះស្នងការដ្ឋាននគរបាលខេត្តត្បូងឃ្មុំ កាលពីថ្ងៃទី១០ ខែមីនា ឆ្នាំ២០២៤កន្លងទៅបានយកឈ្នះលើស្នងការដ្ឋាននគរបាលខេត្តកំពង់ចាមក្នុងលទ្ធផល ២សិតទល់១សិតនៅវគ្គផ្ដាច់ព្រ័ត្រលើកពានភូមិភាគប្រចាំខេត្តកំពង់ចាម Wurkz Special Volleyball Cup 4x4 ឆ្នាំ២០២៤។

បើនិយាយពីប្រវត្តិជួបគ្នារវាងស្នងការខេត្តត្បូងឃ្មុំ និងស្នងការខេត្តកំពង់ចាមចំនួន៣លើកកន្លងមក ស្នងការខេត្តកំពង់ចាមចាញ់ទាំង៣លើកពោលការប្រកួត៦ស្មើនៅពានរង្វាន់សម្ដេចក្រឡាហោម ស ខេង ឆ្នាំ២០២២ ការប្រកួតសម្ពោធតារាងស្នងការខេត្តត្បូងឃ្មុំ និងប្រកួត៤ស្មើពានរង្វាន់ភូមិភាគខាងលើនៅសាលសាលាខេត្តកំពង់ចាម៕

អត្ថបទ៖ Um Sopheak