Liverpool កំពុងតែចរចាជាមួយគ្រូហុល្លង់ម្នាក់ ដើម្បីមកជំនួស Klopp

2024-04-26 11:15:35
ព័ត៌មាន

2024-04-26 11:15:35
ចំនួនមតិ 0 | ចំនួនចែករំលែក 0

ចន្លោះមិនឃើញ

ក្លឹបហង្សក្រហម Liverpool កំពុងតែចរចាជាមួយលោក Arne Slot គ្រូបង្គោលរបស់ក្លឹបហុល្លង់ Feyenoord ដើម្បីមកជំនួសតំណែងអ្នកចាត់ការក្លឹបរបស់លោក Jurgen Klopp ដែលនឹងលាលែងនៅចុងរដូវកាលនេះ។ នេះបើតាមការអះអាងរបស់លោក Slot ផ្ទាល់តែម្ដងកាលពីពេលថ្មីៗនេះ។

បុរសជនជាតិអាល្លឺម៉ង់លោក Jurgen Klopp បានប្រកាសថាលោកនឹងឈប់បន្តការងារជាអ្នកដឹកនាំក្លឹប Liverpool នៅដំណាច់រដូវកាល ២០២៣/២៤នេះ ក្រោយពេលដែលអ្នកចាត់ការរូបនេះដឹកនាំហង្សក្រហមអស់រយៈពេល ៩ឆ្នាំ។

ចាប់តាំងពីការប្រកាសដ៏ភ្ញាក់ផ្អើលរបស់លោក Klopp នេះមក ខាងក្លឹបក៏បានប្រញាប់ប្រញាល់ក្នុងការស្វែងរកអ្នកបន្តវេន។ ចំណោមបេក្ខជនទាំងអស់ក៏មាន បុរសជនជាតិហុល្លង់លោក Slot នេះឯង។

និយាយប្រាប់សារព័ត៌មាន ESPN លោក Slot បានលើកឡើងថា៖ «ច្បាស់ណាស់ ខ្ញុំចង់ធ្វើការនៅកន្លែងហ្នឹង [Liverpoo]»។

យ៉ាងណាមិញ លោកបានបន្ថែមថា នៅពេលនេះដែរ ខាងក្លឹប Liverpool និងក្លឹបរបស់លោកកំពុងតែចរចាជាមួយគ្នា ហើយលោកជឿជាក់ថា កិច្ចព្រមព្រៀងណាមួយនឹងលេចចេញជារូបរាងនៅពេលឆាប់ៗ។

សូមជម្រាបផងដែរថា លោក Slot បានមកដឹកនាំ Feyenoord កាលពីឆ្នាំ២០២១។ បុរសវ័យ ៤៥ឆ្នាំរូបនេះបានដឹកនាំឱ្យក្លឹបមួយនេះឈ្នះពានលីគកំពូលហុល្លង់ កាលពីរដូវកាលមុន ហើយនៅរដូវកាលនេះ លោកបានជួយឱ្យក្លឹបនេះឈ្នះពានហុល្លង់ (ពានដែលមានតម្លៃស្មើ FA Cup)។

កន្លងមក លោកត្រូវបានខាង Tottenham Hotspur និងក្លឹប Leeds ទាក់ទងទៅដែរ តែលោកមិនព្រម៕

ប្រភព៖ BBC អត្ថបទ៖ សេរី មង្គល