- 2018-06-22 06:51:13
- បាល់ទះ
គ្រូបាល់ទះវិសាខាថា ពាននៅថៃលើកនេះដៃគូសុទ្ធតែកីឡាករលំដាប់ប្រទេស
- 2018-06-22 06:51:13
- ចំនួនមតិ 0 | ចំនួនចែករំលែក 0
គ្រូបាល់ទះវិសាខាថា ពាននៅថៃលើកនេះដៃគូសុទ្ធតែកីឡាករលំដាប់ប្រទេស
ចន្លោះមិនឃើញ
លោក សាន សុក្រិត គ្រូបង្វឹកបាល់ទះក្រុមវិសាខាបានអះអាងថា ការទៅលេងពានកម្រិត A ចន្លោះពីថ្ងៃទី២៧ ខែមិថុនា ឆ្នាំ២០១៨ ដល់ថ្ងៃទី១ ខែកក្កដា ឆ្នាំ២០១៨ នៅទឹកដីថៃខាងមុខនេះ មិនមែនជារឿងងាយស្រួលឡើយ។
គ្រូបង្វឹកមានបទពិសោធក្រាស់ក្រែល ក្នុងការដឹកនាំសិស្សទៅប្រកួតនៅថៃរូបនេះ បានឲ្យដឹងថា កីឡាករដែលចូលរួមលេងតំណាងក្លឹបចំនួន ៤ របស់ថៃ ក្នុងពានខាងលើ សុទ្ធសឹងតែជាកីឡាករលំដាប់ខ្ពស់របស់ថៃ។ ប៉ុន្តែលោកយល់ថា ក្លឹបរបស់ខ្លួននៅតែអាចប្រកួតប្រជែងបាន។
ជាមួយគ្នានោះលោកក៏មិនអាចអះអាងក្នុងការបានឡើងទៅវគ្គ ៤ ក្រុមចុងក្រោយឬយ៉ាងណានោះដែរ ពីព្រោះក្រុមទាំង ៦ ដែលចូលរួមលេងពាននេះសុទ្ធសឹងតែខ្លាំងៗប្រហាក់ប្រហែលគ្នា។ ក្រុមវិសាខាអាចទៅលេងពានខាងលើ ដោយសារឈ្នះពានកម្រិត B កាលពីខែឧសភា ហើយការចូលរួមពានខាងលើ ពួកគេនឹងចេញដំណើរទៅថៃនៅម៉ោង ១០យប់ថ្ងៃទី២៤ ខែមិថុនា ឆ្នាំ២០១៨។
ក្រុមវិសាខានៅពូល A ជាមួយក្រុម Army របស់ថៃ និង Rachanavi របស់ថៃ ដែលគ្រោងប៉ះ Army ថ្ងៃទី២៨ ខែមិថុនា ហើយប៉ះក្រុម Rachanavi ថ្ងៃទី២៩ ខែមិថុនា ឆ្នាំ២០១៨។ ចំណែកពូល A គឺមាន Air Force , Saruburi និង Fiji (មកពីអូស្ត្រាលី) ។
ក្រុមនៅតាមពូលនីមួយៗ នឹងធ្វើការប្រកួត ដើម្បីសន្សំពិន្ទុឡើងទៅវគ្គ ៤ ក្រុមចុងក្រោយ ដែលមួយពូលមាន ២ ក្រុមបានឡើងទៅវគ្គបន្តគឺលេខ ១ និងលេខ ២។ ក្រុមលេខ ១នៅពូល A ប៉ះលេខ ២ មកពីពូល B ស្របពេលក្រុមលេខ ២ ពូល A ជួបក្រុមលេខ ១ ពូល B នៅវគ្គ ៤ ក្រុមចុងក្រោយ។ ចំណែកក្រុមលេខ ៣ នៅតាមពូលនីមួយៗ នឹងធ្វើការប្រកួតគ្នាបន្តទៀត ដើម្បីដណ្ដើមចំណាត់ថ្នាក់លេខ៥ ៕
