ក្រុម​មាន់​ខ្នាយ​មាស​ Tottenham Hotspur ​នៅ​តែ​បន្ត​សង្ឃឹម​ប្រជែង​យក​ពាន​ Premier League បន្ទាប់​ពី​បំបាក់​ក្រុម​ Manchester United ៣-០ ដោយ​ប្រើ​ពេល​តែ​៦​នាទី នៅ​តង់​ទី​២ នា​កីឡដ្ឋាន​ White Hart Lane ​យប់​មិញ។

៣​គ្រាប់​របស់​ Spurs រក​បាន​ដោយ​ Dele Alli ​នាទី​៧០, Toby Alderweireld ​នាទី​៧៤ និង​ Erik Lamela ​នាទី​៧៦។ រីឯ​ការ​ប្រកួត​នេះ​ បាន​ពន្យារពេល​កន្លះ​ម៉ោង​ ដោយសារ​រថយន្ត​ក្រុង​ក្រុម​ Man Utd ស្ទះ​ចរាចរណ៍​ក្នុង​ទីក្រុង​ឡុងដុង។

រីឯ​ក្រុម​កំពូល​តារាង​ Leicester City បាន​បន្ត​ជ័យ​ជម្នះ​ ២-០ លើ​ម្ចាស់​ផ្ទះ​​ Sunderland ​ទៀត​ ដែល​រក​បាន​ដោយ​ខ្សែ​ប្រយុទ្ធ​ Jamie Vardy ​ទាំង​២​គ្រាប់​នាទី (៦៦ និង​៩០+៥) ខណៈ​ដែល​ហង្ស​​ក្រហម​ Liverpool បាន​លត់​ Stoke City នៅ​ Anfield ៤-១។ ៤​គ្រាប់​របស់​ហង្ស​ក្រហម រក​បាន​ដោយ​ Alberto Moreno នាទី​ទី​៨, Daniel Sturridge នាទី​៣២ និង​ Divock Origi ​២​គ្រាប់​នៅ​នាទី​៥០ និង​៦៥ ខណៈ​ដែល​​១​គ្រាប់​របស់​ Stoke ​ធ្វើ​បាន​ដោយ​ការ​តែត​របស់​ Bojan Krkić ​នាទី​២២។

លទ្ធផល​នេះ​ មាន​ន័យ​​ថា Spurs នៅ​តែ​តាម​ Leicester ៧​ពិន្ទុ​ដដែល ខណៈ​ដែល​ការ​ប្រកួត​សល់​​៥​ប្រកួត​ទៀត​ នឹង​ចប់​រដូវ​កាល។ រីឯ​ Man Utd ​បាន​ដាច់​​ដល់​ទៅ​៤​ពិន្ទុ ពី​ក្រុម​តំណែង​លេខ​៤ Manchester City៕

​សូម​ទស្សនា​វីដេអូ​ខាង​ក្រោម៖

​ប្រែ​សម្រួល៖ វិន ជីវ័ន្ត ​ប្រភព៖ bbc