- 2022-04-19 03:46:32
- បាល់ទះ
ដឹងតែកក្រើកហើយ! ក្រុមបាល់ទះបុរី ឃាម បញ្ញា សង្ឃឹមខ្ពស់ឡើងវគ្គផ្ដាច់ព្រ័ត្រពាន ISI
- 2022-04-19 03:46:32
- ចំនួនមតិ 0 | ចំនួនចែករំលែក 0
ដឹងតែកក្រើកហើយ! ក្រុមបាល់ទះបុរី ឃាម បញ្ញា សង្ឃឹមខ្ពស់ឡើងវគ្គផ្ដាច់ព្រ័ត្រពាន ISI
ចន្លោះមិនឃើញ
ក្នុងការប្រកួតដណ្ដើមមេដាយមាសពានរង្វាន់ «ក្រុមអធិរាជបាល់ទះ ISI PIPE-ISI PALM» ប្រចាំខែទី៥ដែលជាខែបញ្ចប់កម្មវិធី ក្រុមបាល់ទះបុរី ឃាម បញ្ញា មានសង្ឃឹមខ្ពស់ឡើងទៅកាន់វគ្គផ្ដាច់ព្រ័ត្រ ដ្បិតពួកគេបានត្រៀមខ្លួនរួចជាស្រេចហើយ ដើម្បីក្ដាប់យកពានមួយនេះ។
លោក សំ រឹទ្ធ សេរី ដែលជាតំណាងក្រុមបាល់ទះបុរីឃាមបញ្ញា បានលើកឡើងថា ក្រុមលោកមានជំនឿចិត្តឈ្នះច្រើន ប៉ុន្តែក៏មិនធ្វេសប្រហែសដែរព្រោះបីក្រុមទៀតដែលឡើងមកវគ្គពាក់កណ្ដាលផ្ដាច់ព្រ័ត្រនេះ សុទ្ធតែមានសមត្ថភាពខ្លាំងមិនធម្មតា។
បួនក្រុមដែលឡើងមកកាន់វគ្គនេះមាន ក្រុមក្រសួងមហាផ្ទៃ A ក្រុមក្រសួងមហាផ្ទៃ B ក្រុមឥន្ទ្រីស្លាបដែកក្រុងកំពង់សោម និងក្រុមបុរី ឃាម បញ្ញា។ ក្រុមធ្លាក់មានក្រុមអធិរាជប្រអប់ ក្រុមខនតាកែវ ក្រុមរដ្ឋបាលរាជធានីភ្នំពេញ និងក្រុម Sport KPC កំពង់ចាម។ នៅថ្ងៃព្រហស្បតិ័ទី២១ ខែមេសា ឆ្នាំ២០២២ខាងមុខ ក្រុមរបស់លោក សំរឹទ្ធ សេរី នឹងត្រូវប្រកួតជាមួយក្រុមជើងខ្លាំងឥន្ទ្រីស្លាបដែកក្រុងកំពង់សោម ខណៈថ្ងៃ២២ ក្រុមក្រសួងមហាផ្ទៃ A ជួបក្រុមក្រសួងមហាផ្ទៃ B។
មុនជំនួបមកដល់លោក សេរី ដែលជាតំណាងនិងដើរតួជាគ្រូបង្វឹកផងនោះ បានឱ្យដឹងយ៉ាងជឿជាក់ថា ក្រុមលោកនឹងអាចយកឈ្នះក្រុមឥន្ទ្រីស្លាបដែកក្រុងកំពង់សោម ឡើងទៅកាន់វគ្គផ្ដាច់ព្រ័ត្រ។
អតីតលីប៊័រ៉ូរបស់ក្លឹបកងពលធំអន្តរាគមន៍លេខ៣ បានបញ្ជាក់បែបនេះ ៖«ដោយសារពួកគាត់ (កីឡាករ) បានប្រមូលផ្ដុំហ្វឹកហាត់ យើងមានសង្ឃឹមជាងមុន កាលមុនអត់សូវបានហាត់ទេ ហើយមួយរយៈនេះកីឡាករមុនប្រកួតគ្រូគាត់ត្រៀមប្រមូលម្ដុំហ្វឹកហាត់អី សមត្ថភាពយើងវាគ្រាន់បើជាងមុន តែយ៉ាងណាយើងមិនអាចមើលងាយសមត្ថភាពគេបានដែរ ព្រោះអីបាល់មូលបាល់ប្រកួតយើងពិបាកវាយតម្លៃណាស់ ប៉ុន្តែយើងនៅមានសង្ឃឹម សង្ឃឹមជួបមហាផ្ទៃនៅវគ្គផ្ដាច់ព្រ័ត្រ ហើយណាមួយប្អូនៗក្រុមកីឡាគាត់តាំងចិត្ត គាត់មានជំនឿចិត្តខ្លួនគាត់ ថាអាចធ្វើបានក្នុងជំនួបជាមួយកំពង់សោម»។
សមាជិកដែលលេងឱ្យក្រុមបាល់ទះបុរី ឃាម បញ្ញា សុទ្ធតែជាកីឡាកររបស់ក្លឹបកងពលធំអន្តរាគមន៍លេខ៣ដូចជា ជុក សោភា ហៅឥន្ទ្រីពិឃាដឌូក សុខ រ៉ាដូ ហៅឥន្ទ្រីស្លាបដែក, សំ សាមីត, សៀ កុសល និង មុំ រតនៈ ហៅទង់ប៉ះសេ។ បើតាមការឱ្យដឹងពីលោក សំរឹទ្ធ សេរី ការបង្កើតឱ្យមានក្រុមនេះឡើងដោយសារលោកឧកញ៉ា ឃាម បញ្ញា ម្ចាស់បុរីស្រលាញ់ចូលចិត្តកីឡាបាល់ទះ និងចង់ឱ្យប្អូនៗកីឡាករបានបង្ហាញក៏ដូចជាសម្រួចសមត្ថភាព ដ្បិតកន្លងមកលីគបាល់ទះកម្ពុជាត្រូវបានផ្អាកអស់រយៈពេលជាច្រើនឆ្នាំ។
គួរបញ្ជាក់ថា ការប្រកួតដណ្ដើមពានរង្វាន់មេដាយមាស «ក្រុមអធិរាជបាល់ទះ ISI PIPE-ISI PALM» ឈានដល់វគ្គពាក់កណ្ដាលផ្ដាច់ព្រ័ត្រហើយ។ ការប្រកួតក្នុងសប្ដាហ៍នេះនឹងធ្វើឡើងនៅថ្ងៃព្រហស្បតិ័ទី២១ ខែមេសា ឆ្នាំ២០២២ និងថ្ងៃសុក្រទី២២ ខែមេសា ឆ្នាំ២០២២។ ក្រុមឈ្នះនឹងត្រូវប្រកួតវគ្គផ្ដាច់ព្រ័ត្រនៅសប្ដាហ៍បន្ទាប់។ ជ័យលាភីលេខ១ ទទួលបានមេដាយមាស១ នឹងប្រាក់ចំនួន២០លានរៀល លេខ២ ៨លានរៀល លេខ៣ទទួលបាន២លាន៨០ម៉ឺនរៀល និងទី៤ទទួលបានប្រាក់លើកទឹកចិត្ត៕