ទូចអង្គរក្ស ថាបើចាញ់ សឿន ហេង គួន ម៉ុម សួនចាន់ណារ៉ូ ម្ដងទៀតគេឈប់លេង៣ស្មើជាមួយក្រុមនេះទៀតហើយ

2024-04-22 00:30:00
បាល់ទះ

2024-04-22 00:30:00
ចំនួនមតិ 0 | ចំនួនចែករំលែក 0

ចន្លោះមិនឃើញ

កីឡាករបាល់ទះ ផាត សុភ័ក្រ្ត ហៅទូចអង្គរក្ស ថ្មីៗបានទម្លាយឲ្យ Sabay ដឹងថារូបគេចង់សុំសងសឹកបីស្មើលើក្រុមរបស់ សឿន ហេង ដែលមាន គួន ម៉ុម និងអ្នកប៉ះសេឆ្នើម សួន ចាន់ណារ៉ូ ខ្លាំងណាស់។

ការសុំសងសឹកក៏ដោយសារក្រុមរបស់គេដែលមានស្មាត់រាជ និង នួន វិចិត្រ ចាញ់មិនអស់ចិត្ត ហើយបើសិនជាមិនបានសម្រេច នោះកីឡាកររហស្សនាមខ្លាចាស់កំពូលស្មោះនឹងឈប់ប្រកួតបីស្មើជាមួយក្រុមនេះទៀតហើយ។

កីឡាករដែលលេងបាល់ទះផ្លូវការឡើងខ្លាំងបំផុតនាអំឡុងឆ្នាំ២០១១ ដល់ ២០១៦ បានពន្យល់ប្រាប់ដូច្នេះថា ៖«បាទបង! គួន ម៉ុម ត្រឡប់មកវិញ ខ្ញុំណាត់គូលេងទៀតហើយ តែបើខ្ញុំចាញ់គាត់ទៀត អាហ្នឹងគឺអត់អាចលេងជាមួយគាត់បានទៀតទេ»។

កាលពីពេលថ្មីៗកន្លងទៅទូចអង្គរក្ស នួនវិចិត្រ និងអធិរាជប្រអប់ស្មាត់រាជ បានចេញ សឿនហេង គួនម៉ុម និងសួនចាន់ណារ៉ូ ក្នុងការប្រកួតបីស្មើ ហើយគួរបញ្ជាក់ផងដែរថា អតីតកីឡាកររបស់ក្លឹបកងពលធំអន្តរាគមន៍លេខ៣ ផាត សុភ័ក្រ្ត ហៅទូចអង្គរក្ស ជាកីឡាករឆ្នើមមួយរូបនៅកម្ពុជា។ គេលេងបាល់ទះផ្លូវការនិងក្រៅផ្លូវការឡើងកូដខ្លាំងបំផុតនាអំឡុងឆ្នាំ ២០១១ ដល់ ២០១៦។ បើបាល់ក្រៅផ្លូវការវិញ គឺរវាងឆ្នាំ២០១៣ ដល់ ២០១៤ ដោយគ្មានអ្នកលេងហ៊ានលេងបីស្មើជាមួយស្មាត់មកពីខេត្តកំពង់ស្ពឺនេះឡើយ៕

អត្ថបទ៖ Um Sopheak