បុរសខ្មែរអង្គរ ហាប់ វណ្ណី យក Youtube ជាគ្រូ ទីសាធារណជាកន្លែងហាត់តែសមត្ថភាពមិនធម្មតា

2022-04-18 03:58:29
កីឡាផ្សេងៗ

2022-04-18 03:58:29
ចំនួនមតិ 0 | ចំនួនចែករំលែក 0

ចន្លោះមិនឃើញ

បុរសខ្មែរអង្គរ ឬគេស្គាល់ថា Mr Bee លើហ្វេសបុកគឺមានសមត្ថភាពលោត រលាតត្រលប់ចុះឡើងមិនធម្មតានោះទេ ប៉ុន្តែអ្វីនឹកស្មានមិនដល់នោះមិនមានគ្រូបង្ហាត់បង្រៀនផ្ទាល់អ្វីឡើយមានតែមើលតាម Youtube ប៉ុណ្ណោះ។

Mr Bee ខាងស្ដាំ

Mr Bee មានឈ្មោះដើមថា ហាប់ វណ្ណី វ័យ ២៤ឆ្នាំជាអ្នកភូមិវត្តបូព៌ សង្កាត់សាលាកំរើក ក្រុងសៀមរាប ខេត្តសៀមរាប។ យុវជនរូបនេះចាប់ផ្ដើមស្រឡាញ់ និងចូលចិត្តកីឡាហក់លោត ឬរលាតនេះតាំងពីឆ្នាំ ២០១៥ មកម្ល៉េះ និងបានជម្នះឧបសគ្គជាច្រើនមានទាំងគ្រួសារ មិត្តភ័ក្ដិក៏ដូចជាកត្តាសម្ភារជាដើម។

បុរសសម្បុរស្រអែមរូបនេះលើកឡើងទៀតថា ខ្លួនមិនមាននរណាបង្ហាត់បង្រៀនលេងកីឡាលោតរលាតនេះទេ ពោលគឺមើលតាម Youtube និងរៀនធ្វើតាម។ ដោយសារតែឃើញបរទេសគេចេះលោត មានសមត្ថភាពលោតអស្ចារ្យទើបជំរុញចិត្តខ្លួនឲ្យចង់ហាត់រៀន និងបំពេញក្ដីស្រមៃចេញទៅប្រកួតប្រជែងប្រភេទកីឡាមួយនេះនៅឯបរទេសផងដែរ។

Mr Bee លោតកន្លងទៅ(រូបភាពហ្វេសបុក)

Mr Bee បញ្ជាក់ថាក្ដីស្រមៃគឺចង់បង្ហាញបរទេសថាកម្ពុជាក៏មានអ្នកដែលមានសមត្ថភាពផ្នែកកីឡាលោតនេះដែរ និងអាចកាន់ទង់ជាតិបង្ហាញបរទេសនៅពេលណាមួយ។ ដូច្នេះហើយទើបរូបគេបន្តខំប្រឹងបន្ថែមទៀតដើម្បីសម្រេចក្ដីស្រមៃក៏ធំមួយនេះ។

Mr Bee លោតកន្លងទៅ(រូបភាពហ្វេសបុក)

ងាកទៅនិយាយពីឧបសគ្គវិញបុរសវ័យ២៤ឆ្នាំរូបនេះថាឆ្លងកាត់ច្រើនណាស់ ទី១ ទីលានសម្រាប់ហ្វឹកហាត់ដូចឃើញស្រាប់ហើយរូបគេហ្វឹកហាត់តាមទីសាធារណ មានស្មៅ មានដី ក្នុងទឺកប៉ុណ្ណោះព្រោះវាកាត់បន្ថយបានខ្លះពេលគ្រោះថ្នាក់អំឡុងហាត់។ ទី២ ក្រុមគ្រួសារ មិត្តភ័ក្ដិ មិនលើកទឹកចិត្តចំពោះការហាត់លេងកីឡានេះទេ ព្រោះមើលឃើញពីកត្តាគ្រោះថ្នាក់ខ្លាំង។

Mr Bee (រូបភាពហ្វេសបុក)

យ៉ាងណា Mr Bee មិនបានបោះបង់កីឡាមួយនេះទេគឺបន្តប្រឹងប្រែងហ្វឹកហាត់ដោយខ្លួនឯងដដែល។ អ្វីដែលរូបគេចង់បានបំផុតនោះគឺការទិញកម្រាលលោត ទិញពូក សម្រាប់ជំនួយដល់ការហ្វឹកហាត់។ រូបគេរីករាយបំផុតប្រសិនបើប្រិយមិត្តចូលចិត្ត ចង់ឃើញរូបគេលោត និងចង់ជួយឧបត្ថម្ភជាសម្ភារ ថវិកាក្ដីអាចធ្វើបានតាមរយៈលេខទូរស័ព្ទ 081 241 388 ABA: 002 502 986 ហ្វេសបុក Flip Bee ជាដើម។