- 2024-12-26 17:14:30
- កីឡាផ្សេងៗ
សហព័ន្ធខ្មែរកីឡាហាប់គីដូ៖ យើងពិតជាលំបាកក្នុងរៀបចំជើងឯកថ្នាក់ជាតិ ប៉ុន្តែការខំប្រឹងរបស់យើងថ្ងៃណាមួយគេនឹងមើលឃើញ
- 2024-12-26 17:14:30
- ចំនួនមតិ 0 | ចំនួនចែករំលែក 0
សហព័ន្ធខ្មែរកីឡាហាប់គីដូ៖ យើងពិតជាលំបាកក្នុងរៀបចំជើងឯកថ្នាក់ជាតិ ប៉ុន្តែការខំប្រឹងរបស់យើងថ្ងៃណាមួយគេនឹងមើលឃើញ
ចន្លោះមិនឃើញ
អនុប្រធានសហព័ន្ធខ្មែរកីឡាហាប់គីដូ ថាទម្រាំអាចរៀបចំការប្រកួតជើងឯកថ្នាក់ជាតិនេះបានគឺពិតជាលំបាកសម្រាប់ម្នាក់ៗ និងត្រូវជួបប្រជុំបន្តបន្ទាប់ពិសេសការប្រមូលថវិកាទ្រទ្រង់តែម្ដង យ៉ាងណាព្រឹត្តិការណ៍នេះក៏បានប្រារឰរួចរាល់ប្រកបដោយជោគជ័យផងដែរ។
លោក គួច ហុកជៀក អនុប្រធានសហព័ន្ធខ្មែរកីឡាហាប់គីដូ បានឲ្យដឹងថា តាមការទស្សនាផ្ទាល់មើលឃើញថា កីឡាករ កីឡាការិនី មានសមត្ថភាពរីកចម្រើនជាងមុន និងបានបង្ហាញពីបច្ចេកទេស ភាពរហ័សរហួនដែលបញ្ជាក់ពីការខំប្រឹងហ្វឹកហាត់បានល្អត្រឹមត្រូវ។
ឆ្លើយតបជាមួយអ្នកសារព័ត៌មានដែលសួរថា មុនឈានដល់ការរៀបចំជើងឯកថ្នាក់ជាតិ ឆ្នាំ២០២៤ នេះសហព័ន្ធមានផលលំបាកអ្វីខ្លះ? លោកអនុប្រធានខាងលើបាននិយាយដោយមិនលាក់លៀមនោះឡើយ ពោលពិតជាលំបាកមែន។ ការលំបាកធំជាងគេនោះគឺការរកថវិកាសម្រាប់ទ្រទ្រង់ការប្រកួតនេះ។
គណៈកម្មាធិការប្រតិបត្តិរួមទាំងថ្នាក់ដឹកនាំត្រូវប្រជុំជាច្រើនលើក ខណៈថវិកាដែលទទួលបាននេះមួយភាគបានមកពីការប្រមូលគ្នាក្នុងសហព័ន្ធហើយក្រៅពីនោះគឺលើប្រធាន និងអនុប្រធានតែម្ដង។ លោក គួច ហុកជៀក បន្ថែមទៀតថា ការខំប្រឹងរៀបចំឲ្យមានការប្រកួតនេះកើកឡើងទាំងលំបាកនេះជឿជាក់ថាថ្ងៃណាមួយនឹងមានបណ្ដាក្រុមហ៊ុនឯកជនតូច-ធំ ពិសេសអាចឈានទទួលជាកញ្ចប់ថវិកាសម្រាប់អភិវឌ្ឍន៍ រៀបចំជើងឯក វគ្គបណ្ដុះបណ្ដាល ពីក្រសួងអប់រំ យុវជន និងកីឡា ដូចបណ្ដាសហព័ន្ធកីឡាជាតិដទៃទៀតជាមិនខាន។
បញ្ជាក់ដែរថា សហព័ន្ធខ្មែរកីឡាហាប់គីដូ បានរៀបចំការប្រកួតជើងឯកថ្នាក់ជាតិរបស់ខ្លួនជាលើកទី២ កាលពីថ្ងៃទី២១ ដល់ ២២ ខែធ្នូ ឆ្នាំ២០២៤ នៅក្នុងពហុកីឡដ្ឋានជាតិ។ ក្នុងពិធីបិទការប្រកួតនោះដែរមានការអញ្ជើញចូលរួមពីលោក គួច ហុកជៀក អនុប្រធាន និងតំណាងក្រសួងអប់រំ យុវជន និងកីឡា រួមទាំងដៃគូសហការឧបត្ថម្ភ ក្រុមហ៊ុនដឹកអ្នកដំណើរ ឡារីតា ក្រុមហ៊ុន ISI។ ចំណាត់ថ្នាក់លេខ១ បានលើក្លឹបហាប់គីដូក្រសួងមហាផ្ទៃ ឈ្នះមេដាយសរុប ២៦ មាស១២ ប្រាក់៧ សំរឹទ្ធ៧។ លេខ២ ក្លឹបហាប់គីដូធីណា ឈ្នះមេដាយសរុប ២២ មាស៥ ប្រាក់៩ សំរឹទ្ធ៨។ លេខ៣ ក្លឹបអូឡាំពិក ឈ្នះមេដាយសរុប ១៨ មាស៤ ប្រាក់៣ សំរឹទ្ធ១១៕
