- 2016-10-25 20:27:18
- ប្រដាល់
អ៊ុង វីរៈ និងព្រំ សំណាង មានទំនុកចិត្ត៨០%ឡើងវគ្គផ្ដាច់ព្រ័ត្រដូចគ្នា
- 2016-10-25 20:27:18
- ចំនួនមតិ 0 | ចំនួនចែករំលែក 0
អ៊ុង វីរៈ និងព្រំ សំណាង មានទំនុកចិត្ត៨០%ឡើងវគ្គផ្ដាច់ព្រ័ត្រដូចគ្នា
ចន្លោះមិនឃើញ
អ្នកប្រដាល់មកពីក្លឹបទ័ពពិសេសឆត្រយោង ៩១១ អ៊ុង វីរៈ និងព្រំ សំណាង មានទំនុកចិត្តរហូត ៨០%ដូចគ្នាក្នុងការឡើងទៅវគ្គផ្ដាច់ព្រ័ត្រនៃការប្រកួតដណ្ដើមខ្សែក្រវាត់សមរភូមិអ្នកប្រយុទ្ធរបស់សង្វៀន PNN ។
អ៊ុង វីរៈ និងព្រំ សំណាង មាន៦ពិន្ទុពេញដូចគ្នា បន្ទាប់ពីឆ្លងកាត់ការប្រកួត២លើកកន្លងមកឈ្នះទាំងពីរដូចគ្នា។ ប៉ុន្តែចំណុចពិសេស អ៊ុង វីរៈ មានប្រៀបជាងត្រង់កីឡាកររូបនេះផ្ដួលដៃគូឲ្យសន្លប់ទាំងពីរលើកគឺលើកទី១ផ្ដួល Phetbupha ឲ្យសន្លប់ទឹកទី៤ និងលើកទីពីរផ្ដួល Nakrobdam នៅទឹកទី១។ ចំណែក ព្រំ សំណាង ប្រកួតលើកទី១យកឈ្នះ Nakrobdam ដោយពិន្ទុ និងលើកទី២ផ្ដួល Phetbupha ឲ្យបោះបង់ការប្រកួតនៅទឹកទី១។
ក្រោយចប់ការប្រកួតកីឡាករទាំងពីរនាក់ខាងលើបានអះអាងដូចគ្នាថា រូបគេមានជំនឿចិត្ត៨០%ដូចគ្នាក្នុងការឡើងទៅវគ្គផ្ដាច់ព្រ័ត្រ។ កីឡាករកម្ពុជាទាំងពីរនាក់ផ្ដោតសំខាន់ទៅលើកីឡាករថៃ គីមឡៃ ផេត ដែលជាជើងខ្លាំងធ្លាប់ផ្ដួលកីឡាករកម្ពុជាជាច្រើននាក់រួចមកហើយរួមទាំង ឡុង សុភី និងរឿង សោភ័ណ្ឌ ជាដើម។
សិស្សរួមគ្រូទាំងពីរបន្ថែមថា ពួកគេដឹងពីចំណុចខ្លាំងរបស់កីឡាករថៃ គីមឡៃ ផេត ដូចគ្នាគឺពូកែកណ្ដាប់ដៃ និងមានការបំផ្លាស់ទីល្អ ដែលធ្វើឲ្យដៃគូគ្រប់រូបប៉ះកីឡាករថៃរូបនេះពិបាកក្នុងការចូលវាយ។ ចំណែកចំណុចខ្សោយវិញពួកគេបានលើកឡើងស្រដៀងគ្នាថា ហាក់គ្មានចន្លោះប្រហោង ប៉ុន្តែនឹងប្រឹងប្រែងហ្វឹកហាត់ឲ្យបានខ្លាំងជាងធម្មតា ដើម្បីស្វែងរកឱកាសបានឡើងទៅវគ្គផ្ដាច់ព្រ័ត្រដូចគ្នា។
សូមបញ្ជាក់ថា កម្មវិធីប្រកួតដណ្ដើមខ្សែក្រវាត់របស់សង្វៀនខាងលើកីឡាករកម្ពុជា ស្ថិតនៅពូល A ខណៈកីឡាករថៃស្ថិតនៅពូល B ។ រដូវកាលទី៤ នេះនឹងជ្រើសយកកីឡាករថៃ១រូប ព្រមទាំងកីឡាករកម្ពុជាមួយរួបណា ដែលមានពិន្ទុលើសគេក្នុងពូល ដើម្បីឡើងទៅប៉ះគ្នានៅវគ្គផ្ដាច់ព្រ័ត្រដណ្ដើមខ្សែក្រវាត់ និងប្រាក់រង្វាន់ ៥ពាន់ដុល្លារអាមេរិក៕
អត្ថបទ៖ ស្រី សុវណ្ណដារ៉ា
