- 2021-07-09 04:13:39
- ប្រដាល់
កីឡាករឥណ្ឌូណេស៊ី Eko Roni ប្រកាសចង់ជួប ចាន់ រតនា សងសឹកឲ្យមិត្តរួមជាតិ
- 2021-07-09 04:13:39
- ចំនួនមតិ 0 | ចំនួនចែករំលែក 0
កីឡាករឥណ្ឌូណេស៊ី Eko Roni ប្រកាសចង់ជួប ចាន់ រតនា សងសឹកឲ្យមិត្តរួមជាតិ
ចន្លោះមិនឃើញ
អ្នកលេងគុនចម្រុះឥណ្ឌូណេស៊ី Eko Roni Saputra ប្រកាសចង់ជួបអ្នកលេងគុនចម្រុះកម្ពុជា ចាន់ រតនា នៅលើឆាកសង្វៀនពិភពលោក ONE Championship។
ការប្រកាសចង់ជួបនេះ បន្ទាប់ពីកីឡាករខ្លាំងៗឥណ្ឌូណេស៊ីពីរនាក់ហើយបានបរាជ័យក្រោមកណ្តាប់ដៃរបស់តារាក្បាច់គុនដែលជាទូតសុច្ឆន្ទៈរបស់ Cellcard។
ក្នុងចំណោមជ័យជម្នះ៦លើកនៅសង្វៀន ONE ចាន់ រតនា បានឈ្នះកីឡាករឥណ្ឌូណេស៊ី២នាក់គឺឆ្នាំ២០១៨ បានផ្តួលជើងខ្លាំងឥណ្ឌូណេស៊ី Abro Fernandes ក្នុងទឹកទី២ និងឆ្នាំ២០១៩បានបន្តផ្តួលជើងខ្លាំងឥណ្ឌូណេស៊ី Rudy Agustian នៅក្នុងទឹកទី២ទៀត។
Saputra បានលើកហេតុផលថា ៖«ចាន់ រតនា បានផ្តួលកីឡាករឥណ្ឌូណេស៊ីច្រើននាក់ហើយ ដូច្នេះគាត់នឹងក្លាយជាដៃគូលំបាកសម្រាប់ខ្ញុំ»។ តារាគុនចម្រុះឥណ្ឌូណេស៊ីបាននិយាយថា ៖«ចាន់ រតនា មានជំនាញវ៉ៃឈរល្អ ដូច្នេះខ្ញុំចង់ជួបគាត់។ បើបានជួបមែន ខ្ញុំប្រហែលជាលេងល្បាច់ក្រោមជាមួយគាត់។ សម្រាប់ខ្ញុំ បើជួបគ្នាមែននឹងក្លាយជាការប្រកួតគួរឲ្យចាប់អារម្មណ៍រវាងអ្នកជំនាញវ៉ៃឈរ ប៉ះអ្នកពូកែក្បាច់ក្រោម»។
មុនពេលប្រកាសជួបជើងខ្លាំងកម្ពុជា Eko Roni Saputra ក៏មានបទពិសោធច្រើនដែរនៅសង្វៀនអន្តរជាតិ ONE គឺធ្លាប់វ៉ៃបាន៥លើកក្នុងនោះឈ្នះ៤ដង និងចាញ់១។ ក្នុងចំណោមជ័យជម្នះទាំង៤ដងនោះ រូបគេក៏ធ្លាប់ផ្តួលកីឡាករកម្ពុជា ខុន ស៊ីចាន់ នៅក្នុងទឹកទី១កាលពីខែកុម្ភៈ ឆ្នាំ២០២០។
អ្វីគួរឲ្យចាប់អារម្មណ៍ក្រៅពីមានបំណងសងសឹកឲ្យមិត្តរួមជាតិរៀងៗខ្លួន អ្នកទាំងពីរក៏ប្តេជ្ញាបង្កើតកំណត់ត្រាដែរក្នុងនោះ Eko Roni ចង់ក្លាយជាកីឡាករឥណ្ឌូណេស៊ីទី១អាចយកឈ្នះ ចាន់ រតនា បន្ទាប់ពីកីឡាករឥណ្ឌូណេស៊ីពីរនាក់បរាជ័យ។ ចំណែក ចាន់ រតនា ចង់រក្សាកំណត់ត្រាមិនដែលចាញ់កីឡាករឥណ្ឌូណេស៊ីរបស់ខ្លួន។
តាមរយៈការដង្ហោយហៅរកដៃគូនេះ ជើងខ្លាំង Saputra ទន្ទឹងរង់ចាំការឆ្លើយតបរបស់ជើងខ្លាំងគុនខ្មែរ ចាន់ រតនា ថាតើទទួលយកឬចង់ជួបដៃគូផ្សេង៕
