- 2020-12-29 03:05:29
- ប្រដាល់
មិនធម្មតា! រិន ដេវីត សង្ឃឹមរហូត ៧០% យកឈ្នះ ឡាំងកូស៊ីន យកខ្សែក្រវាត់ PNN
- 2020-12-29 03:05:29
- ចំនួនមតិ 0 | ចំនួនចែករំលែក 0
មិនធម្មតា! រិន ដេវីត សង្ឃឹមរហូត ៧០% យកឈ្នះ ឡាំងកូស៊ីន យកខ្សែក្រវាត់ PNN
ចន្លោះមិនឃើញ
អ្នកលេងគុនខ្មែរវ័យក្មេង រិន ដេវីត ថាខ្លួនមានក្ដីសង្ឃឹមរហូតដល់ទៅ ៧០% ឯណោះអាចនឹងឈ្នះ ឃួន ឡាំងកូស៊ីន គ្រង់ខ្សែក្រវាត់ទម្ងន់ ៥៤គីឡូក្រាមរបស់សង្វៀន PNN នៅចុងខែមករា ឆ្នាំ២០២១។
រិន ដេវីត បានលើកឡើងក្រោយឈ្នះ ខេម ចាន់ ថាជ័យជម្នះមួយនេះ គឺរឹតតែធ្វើឲ្យខ្លួនមានទំនុកចិត្តកាន់តែខ្លាំងក្នុងការឈានទៅរកគ្រងខ្សែក្រវាត់របស់ PNN រដូវកាលទី៣ ទម្ងន់ ៥៤គីឡូក្រាមនេះ។ ព្រោះថាការឈ្នះជើងខ្លាំង ខេម ចាន់ នេះជាការបញ្ជាក់ឲ្យឃើញពីការរីកចម្រើននៃសមត្ថភាពរបស់ខ្លួនបន្ថែមទៀត។
សិស្សគុនមកពីក្លឹបនាគរាជចតុមុខខាងលើនេះបន្ថែមទៀតថា ប៉ះ ឃួន ឡាំងកូស៊ីន ៣ដងគឺមិនទាន់ស្គាល់ពាក្យថាចាញ់នោះទេ ពោលមានឈ្នះ២ និងស្មើ១ ចំណុចទាំងនេះហើយដែលធ្វើឲ្យរូបគេមានក្ដីសង្ឃឹមខ្ពស់ដល់ទៅ ៧០% បែបនេះ។ មួយវិញទៀតរូបគេធ្លាប់ប៉ះគ្នារួចហើយ ដូច្នេះបានដឹងពីសមត្ថភាព និងរបៀបវ៉ៃដៃគូផងដែរ។
រំលឹកដែរថា រិន ដេវីត កាលពីវគ្គពាក់កណ្ដាលផ្ដាច់ព្រ័ត្រថ្ងៃអាទិត្យ ទី២៧ ខែធ្នូ ឆ្នាំ២០២០ ប៉ុន្មានថ្ងៃមុននេះបានយកឈ្នះ ខេម ចាន់ បន្តដំណើរឡើងវគ្គផ្ដាច់ព្រ័ត្រជាមួយ ឃួន ឡាំងកូស៊ីន។ វគ្គផ្ដាច់ព្រ័ត្រនឹងធ្វើឡើងនៅថ្ងៃទី២៤ ខែមករា ឆ្នាំ២០២១ អ្នកឈ្នះបានខ្សែក្រវាត់១គ្រឿង និងទឹកប្រាក់អម ៣០លានរៀល៕