សហព័ន្ធកីឡាអេឡិចត្រូនិក៖ ប្រកាសពីការប្រកួតជើងឯកថ្នាក់ជាតិឆ្នាំ ២០២៤ របស់ខ្លួន

2024-11-13 04:51:38
កីឡាផ្សេងៗ

2024-11-13 04:51:38
ចំនួនមតិ 0 | ចំនួនចែករំលែក 0

ចន្លោះមិនឃើញ

សហព័ន្ធកីឡាអេឡិចត្រូនិកកម្ពុជា កាលពីម្សិលមិញនេះធ្វើសន្និសីទសារព័ត៌មានប្រកាសពីការប្រកួតជ្រើសរើសជើងឯកថ្នាក់ជាតិ ឆ្នាំ២០២៤ របស់ខ្លួនហើយដោយក្នុងនោះវិញ្ញាសា eFootball ប្រកួតនៅថ្ងៃទី១៩-២០ វិច្ឆិកា ខណៈវិញ្ញាសា MLBB ប្រកួតនៅថ្ងៃទី២៣-២៤ ខែវិច្ឆិកា នៅ T.Y Center។

ទិដ្ឋភាពសន្និសីទសារព័ត៌មាន

ថ្លែងក្នុងសន្និសីទសារព័ត៌មាន ឯកឧត្ដម ជា ច័ន្ទបរិបូរណ៍ ប្រធានសហព័ន្ធកីឡាអេឡិចត្រូនិកកម្ពុជា លើកឡើងថា កីឡាករ កីឡាការិនីដែលនឹងចូលរួមប្រកួតប្រជែងត្រូវប្រឹងប្រែងពង្រឹងសមត្ថភាព បច្ចេកទេស ឲ្យបានល្អគ្រប់គ្រាន់ ត្រៀមខ្លួនលក្ខណៈឲ្យបានពេញលេញ។

ទិដ្ឋភាពសន្និសីទសារព័ត៌មាន

ជាមួយគ្នានោះដែរប្រធានសហព័ន្ធខាងលើបានផ្ដល់អនុសាសន៍សង្កត់ធ្ងន់ដល់មន្ត្រីបច្ចេកទេស គណៈកម្មការរៀបចំការប្រកួតឲ្យប្រកាន់ភ្ជាប់នូវយុត្តិធម៌ និងធ្វើការដោយប្រុងប្រយ័ត្នបំផុតដើម្បីទទួលបាននូវលទ្ធផលការងារកាន់តែប្រសើរជាងមុនៗទៅទៀត។ ដោយសារប្រភេទកីឡានេះជាកីឡាអេឡិចត្រូនិកប្រើបច្ចេកវិទ្យា ដូច្នេះហើយគណៈកម្មការរៀបចំត្រូវផ្ដោតខ្លាំងលើតម្លាភាព នៃការប្រកួតដើម្បីឈានទៅរកបាននូវកីឡាករដែលមានសមត្ថភាពពិតប្រាកដត្រៀមតំណាងកម្ពុជា។

ទិដ្ឋភាពសន្និសីទសារព័ត៌មាន

បញ្ជាក់ដែរថា សន្និសីទសារព័ត៌មានរបស់សហព័ន្ធកីឡាអេឡិចត្រូនិកកម្ពុជា ដែលបានធ្វើឡើងនេះគឺនៅថ្ងៃទី១២ ខែវិច្ឆិកា ឆ្នាំ២០២៤ នៅក្រសួងព័ត៌មាន ដោយបានការអញ្ជើញចូលរួមពីឯកឧត្ដម ជា ច័ន្ទបរិបូរណ៍ ប្រធានសហព័ន្ធ និងតំណាងក្រសួងអប់រំ យុវជន និងកីឡា តំណាង NOCC រួមទាំងកីឡាករ កីឡាការិនី ម្ចាស់ឧបត្ថម្ភនានាផងដែរ៕