- 2024-07-10 09:42:43
- កីឡាផ្សេងៗ
ផ្ដោតលើការអភិវឌ្ឍន៍! សហព័ន្ធបញ្ចស៊ីឡាត់កម្ពុជាបញ្ជូនកីឡាករ កីឡាការិនី ១៥រូបចូលរួមប្រកួតលក្ខណៈអន្តរជាតិនៅឥណ្ឌូណេស៊ី
- 2024-07-10 09:42:43
- ចំនួនមតិ 0 | ចំនួនចែករំលែក 0
ផ្ដោតលើការអភិវឌ្ឍន៍! សហព័ន្ធបញ្ចស៊ីឡាត់កម្ពុជាបញ្ជូនកីឡាករ កីឡាការិនី ១៥រូបចូលរួមប្រកួតលក្ខណៈអន្តរជាតិនៅឥណ្ឌូណេស៊ី
ចន្លោះមិនឃើញ
សហព័ន្ធកីឡាបញ្ចស៊ីឡាត់កម្ពុជា រសៀលថ្ងៃទី១០ ខែកក្កដា ឆ្នាំ២០២៤ នេះបានបញ្ជូនកីឡាករ កីឡាការិនីសរុប ១៥នាក់ចូលរួមប្រកួតព្រឹត្តិការណ៍អន្តរជាតិនៅប្រទេសឥណ្ឌូណេស៊ី ខណៈប្រទេសខ្លាំងៗប្រកួតប្រជែងទាំងអស់ ៧ ប្រទេសរួមទាំងអាមេរិកទៀតផង។
ថ្លែងក្នុងសន្និសីទសារព័ត៌មានរសៀលថ្ងៃមិញនេះឯកឧត្ដម សេង ធារិន ប្រធានសហព័ន្ធបញ្ចស៊ីឡាត់បានឲ្យដឹងថា សហព័ន្ធកីឡាមួយនេះទើបបង្កើតបានរយៈពេលខ្លី ដូច្នេះកីឡាករ កីឡាការិនី សមត្ថភាពនៅមានកម្រិត ឬមិនទាន់ឈានដល់កម្រិតខ្ពស់ដូចទៅហ្នឹងបណ្ដាប្រទេសមួយចំនួននោះឡើយ។
តាមរយៈការហ្វឹកហាត់ និងដណ្ដើមមេដាយស៊ីហ្គេម នៅកម្ពុជា ឆ្នាំ២០២៣ កន្លងទៅនេះមែន ប៉ុន្តែសហព័ន្ធមើលឃើញថាក្រុមបញ្ចស៊ីឡាត់កម្ពុជាត្រូវស្វែងរកបទពិសោធឲ្យបានច្រើនបន្ថែមទៀតពិសេសការប្រកួតកម្រិតអន្តរជាតិតែម្ដង។ ដូច្នេះហើយជាអ្វីដែលសហព័ន្ធតែងតែគិតគូរ និងផ្ដោតអាទិភាពនោះគឺការអភិវឌ្ឍន៍សមត្ថភាពកីឡាករ កីឡាការិនី គ្រូបង្វឹកក៏ដូចជាចៅក្រមឲ្យបានចេញទៅប្រកួត ឬទៅសិក្សាស្វែងយល់នៅឯក្រៅប្រទេសពិសេសនៅឯប្រទេសដែលជាម្ចាស់ដើមក្បាច់គុននេះ។
ឯកឧត្ដម សេង ធារិន បន្ថែមទៀតថា សម្រាប់ការប្រកួតនៅប្រទេសឥណ្ឌូណេស៊ី លើកនេះក្រុមបញ្ចស៊ីឡាត់កម្ពុជានឹងមានភាពរីកចម្រើន និងទទួលបានចំណេះជំនាញកាន់តែប្រសើរជាងមុនទៅទៀត។ តាមរយៈការខំប្រឹងហ្វឹកហាត់យ៉ាងជាប់លាប់កន្លងទៅនេះ និងទឹកចិត្តមោះមុតរបស់កីឡាករ កីឡាការិនីកម្ពុជា ឯកឧត្ដមជឿជាក់ថានឹងទទួលបានលទ្ធផលល្អក្នុងការប្រកួតនៅប្រទេសឥណ្ឌូណេស៊ីលើកនេះ។
បញ្ជាក់ដែរថា សហព័ន្ធកីឡាបញ្ចស៊ីឡាត់កម្ពុជា បានបញ្ជូនកីឡាករ កីឡាការិនី សរុប ១៥រូបទៅចូលរួមការប្រកួតអន្តរជាតិនៅប្រទេសឥណ្ឌូណេស៊ី ដែលនឹងចាប់ផ្ដើមធ្វើឡើងពីថ្ងៃទី១២ ដល់ ១៦ ខែកក្កដា ឆ្នាំ២០២៤។ ប្រទេសដែលនឹងចូលរួមការប្រកួតឯប្រទេសឥណ្ឌូណេស៊ី រួមមានកម្ពុជា សិង្ហបុរី ម៉ាឡេស៊ី ប្រ៊ុយណេ ថៃ សហរដ្ឋអាមេរិក៕
