- 2024-03-27 03:41:08
- កីឡាផ្សេងៗ
សហព័ន្ធតេក្វាន់ដូ ITF៖ អាណត្តិថ្មីដាក់គោលដៅតឹងរ៉ឹងឆ្ពោះទៅដណ្ដើមមេដាយនៅឥណ្ឌា និងកម្រិតអន្តរជាតិផ្សេងទៀត
- 2024-03-27 03:41:08
- ចំនួនមតិ 0 | ចំនួនចែករំលែក 0
សហព័ន្ធតេក្វាន់ដូ ITF៖ អាណត្តិថ្មីដាក់គោលដៅតឹងរ៉ឹងឆ្ពោះទៅដណ្ដើមមេដាយនៅឥណ្ឌា និងកម្រិតអន្តរជាតិផ្សេងទៀត
ចន្លោះមិនឃើញ
សហព័ន្ធតេក្វាន់ដូ ITF កម្ពុជា បានធ្វើមហាសន្និបាតបញ្ចប់អាណត្តិទី៦ និងបន្តដំណើរការងារអភិវឌ្ឍន៍អាណត្តិទី៧ ឆ្នាំ២០២៤ ដល់ ២០២៨ ខណៈអាណត្តិថ្មីនេះប្រធានសហព័ន្ធដាក់គោលដៅរឹតតែតឹងរ៉ឹងចំពោះសិស្សគុនឲ្យខំប្រឹងដើម្បីដណ្ដើមមេដាយនៅប្រទេសឥណ្ឌាពេលខាងមុខ។
ឯកឧត្ដម កែវ រ៉េមី ប្រធានសហព័ន្ធតេក្វាន់ដូ ITF កម្ពុជា បានឲ្យដឹងក្នុងថ្ងៃមហាសន្និបាតថា ក្រោយអាក់ខានចូលរួមប្រកួតលក្ខណៈអន្តរជាតិយូរខែកន្លងទៅនេះដោយហេតុផលផ្សេងៗនោះ ឥលូវជាពេលសមស្របចំពោះសិស្សចេញទៅដណ្ដើមមេដាយ និងលើកទង់ជាតិជូនមាតុភូមិទៀតហើយ។
ទេសរដ្ឋមន្ត្រីសកម្មក្នុងវិស័យកីឡាខាងលើឲ្យដឹងទៀតថា ឥលូវនេះបញ្ហាថវិកាសម្រាប់ទៅចូលរួមប្រកួតព្រឹត្តិការណ៍ជើងឯកអាស៊ី នៅប្រទេសឥណ្ឌានោះគឺលោកបានរកគ្រប់ចំនួនហើយដោយមានការឧបត្ថម្ភធំពីឯកឧត្ដម ផាន់ វណ្ណរ័ត្ន និងសប្បុរសជាតិផ្សេងៗ។ ដូច្នេះសិស្សគុនដែលជាជម្រើសជាតិដែលត្រូវចេញទៅនោះគឺត្រូវប្ដេជ្ញាចិត្តខ្ពស់ និងខំប្រឹងប្រែងហាត់ឲ្យអស់ពីសមត្ថភាពដើម្បីជាការតបស្នងដែលថ្នាក់ដឹកនាំសហព័ន្ធបានជួយ និងគោលដៅសំខាន់យកមេដាយជូនប្រទេសកម្ពុជាលើឆាកអន្តរជាតិពិសេសនៅឥណ្ឌានេះតែម្ដង។
បញ្ជាក់ដែរថា សហព័ន្ធតេក្វាន់ដូ ITF បានធ្វើមហាសន្និបាតបញ្ចប់អាណត្តិទី៦ របស់ខ្លួនកាលពីថ្ងៃទី២៤ ខែមីនា ឆ្នាំ២០២៤ នៅទីស្នាក់ការគណៈកម្មាធិការជាតិអូឡាំពិកកម្ពុជា(NOCC)។ សម្រាប់សមាសភាពថ្នាក់ដឹកនាំអាណត្តិទី៧ ឆ្នាំ២០២៤ ដល់ ២០២៨ នេះរួមមាន ឯកឧត្ដម កែវ រ៉េមី ប្រធាន ឯកឧត្ដម ផាន់ វណ្ណរ័ត្ន អនុប្រធានទី១ ឯកឧត្ដម បួនហ៊ីង សុធីយ៉ា អគ្គលេខាធិការ ឯកឧត្ដម នូស្ថា សត្យា អគ្គហេរញ្ញិក និងថ្នាក់ដឹកនាំជាច្រើនរូបទៀត៕
