ឯកឧត្ដម ថោង ខុន៖ វគ្គសិក្សាសាមគ្គីអូឡាំពិក «ស្តីពីរដ្ឋបាលកីឡា» មានសារសំខាន់ខ្លាំងក្នុងវិស័យកីឡានៅកម្ពុជា

2024-02-16 05:55:47
កីឡាផ្សេងៗ

2024-02-16 05:55:47
ចំនួនមតិ 0 | ចំនួនចែករំលែក 0

ចន្លោះមិនឃើញ

ប្រធានគណៈកម្មាធិការជាតិអូឡាំពិកកម្ពុជា ថា វគ្គសិក្សាសាមគ្គីអូឡាំពិក «ស្ដីពីរដ្ឋបាលកីឡា» ដែលទើបបញ្ចប់ទៅនេះគឺមានសារសំខាន់ខ្លាំងណាស់ក្នុងការអភិវឌ្ឍន៍ និងការគ្រប់គ្រងផ្នែកកីឡានេះឲ្យកាន់តែរីកចម្រើន។

ឯកឧត្ដម ថោង ខុន (អាវខ្មៅ)

ឯកឧត្ដម ថោង ខុន ប្រធានគណៈកម្មាធិការជាតិអូឡាំពិកកម្ពុជា បានឲ្យដឹងថា វគ្គសិក្សាសាមគ្គីអូឡាំពិក «ស្តីពីរដ្ឋបាលកីឡា» ថ្វីត្បិតតែមានរយៈពេលខ្លី ប៉ុន្តែក៏ល្អដែរសម្រាប់សិក្ខាកាម លោកគ្រូ អ្នកគ្រូកីឡាបានសិក្សាបន្ថែមចំណេះដឹង។ NOCC នឹងព្យាយាមបង្កើតឲ្យមានវគ្គសិក្សាបែបនេះឲ្យបានច្រើនបន្ថែមទៀត។

ទិដ្ឋភាពបិទវគ្គ

ថ្នាក់ដឹកនាំកីឡាជើងចាស់ខាងលើលើកឡើងទៀតថា ផ្នែកកីឡានេះមិនអាចចេះត្រឹមលេងកីឡា ឬចេះប្រកួតមួយមុខហើយទទួលបានជោគជ័យនោះទេ ពោលផ្នែកនេះគឺមានការស្មុគស្មាញច្រើន។ ដើម្បីរៀបចំព្រឹត្តិការណ៍កីឡាមួយឲ្យអនុវត្តន៍តាមបទដ្ឋានត្រឹមត្រូវរបស់អន្តរជាតិ ដូច្នេះត្រូវមានអ្នកចេះ ឬអ្នកជំនាញច្បាស់លាស់ទើបអាចធ្វើទៅបាន។ មុនឆ្នាំ ១៩៦០ កីឡានៅកម្ពុជាមានការរីកចម្រើន និងមានអ្នកជំនាញកីឡាជាន់ខ្ពស់ក៏ច្រើនផងដែរ ប៉ុន្តែក្រោយសង្គ្រាម និងរបប ខ្មែរក្រហម ធ្វើឲ្យវិស័យកីឡាកម្ពុជា និងធនធានផ្នែកកីឡាត្រូវបានបាត់បង់ស្ទើរអស់រលីង។

ទិដ្ឋភាពបិទវគ្គ

យ៉ាងណាបច្ចុប្បន្ននេះកម្ពុជាកំពុងព្យាយាមបណ្ដុះបណ្ដាលធនធានជាបន្តបន្ទាប់ ជាក់ស្ដែង វគ្គសិក្សាសាមគ្គីអូឡាំពិក «ស្តីពីរដ្ឋបាលកីឡា» ត្បិតជាវគ្គមូលដ្ឋានគ្រឹះក្ដី ប៉ុន្តែវាមានសារសំខាន់ចំពោះសិក្ខាកាមបានយល់ដឹងជាដំណាក់កាលដើម្បីយកទៅអនុវត្តន៍ និងជំរុញវិស័យកីឡាកម្ពុជាឲ្យកាន់តែល្អប្រសើរឈានដល់កម្រិតអន្តរជាតិនៅពេលខាងមុខ។

ទិដ្ឋភាពបិទវគ្គ

បញ្ជាក់ដែរថា វគ្គសិក្សាសាមគ្គីអូឡាំពិក «ស្តីពីរដ្ឋបាលកីឡា» គឺធ្វើឡើងចាប់ពីថ្ងៃទី១២ ដល់ ១៥ ខែកុម្ភៈ ឆ្នាំ២០២៤ នៅទីស្នាក់ការគណៈកម្មាធិការជាតិអូឡាំពិកកម្ពុជា។ គណៈកម្មាធិការជាតិអូឡាំពិកកម្ពុជា គ្រោងរៀបចំវគ្គសិក្សាគ្រប់គ្រងកីឡាកម្រិតខ្ពស់ (Advanced Sports Management Courses) ចាប់ពីឆ្នាំ២០២៥ តទៅដើម្បីផ្ដល់ឱកាសដល់ថ្នាក់ដឹកនាំសហព័ន្ធកីឡាជាតិ និងថ្នាក់ដឹកនាំស្ថាប័នកីឡាបានពង្រឹងសមត្ថភាព និងចំណេះដឹងរបស់ខ្លួនបន្ថែមទៀតក្នុងការគ្រប់គ្រងស្ថាប័នកីឡារបស់ខ្លួនប្រកបដោយប្រសិទ្ធភាព និងស្របតាមគោលការណ៍ដឹកនាំរបស់ចលនាអូឡាំពិក៕