គ្រូតេក្វាន់ដូ ITF៖ វគ្គបណ្ដុះបណ្ដាលកាយសម្បទាគឺផ្ដល់សារប្រយោជន៍ ២យ៉ាងដល់គ្រូៗ និងសិស្ស

2024-02-12 03:16:01
កីឡាផ្សេងៗ

2024-02-12 03:16:01
ចំនួនមតិ 0 | ចំនួនចែករំលែក 0

ចន្លោះមិនឃើញ

គ្រូជម្រើសជាតិតេក្វាន់ដូ ITF ថាវគ្គបណ្ដុះបណ្ដាលផ្នែកកាយសម្បទាដែលទើបបញ្ចប់ទៅនេះជាសមិទ្ធិផលថ្មីសម្រាប់សហព័ន្ធក្នុងឆ្នាំ២០២៤ ហើយវាពិតជាមានសារសំខាន់ចំពោះគ្រូៗបង្វឹក និងកីឡាករដែលបានចូលរួមវគ្គនេះ។

ឯកឧត្ដម ប៊ួន ហ៊ីងសុធីយ៉ា (កណ្ដាល)

លោក ប៉ាល់ ជីវ័ន គ្រូជម្រើសជាតិតេក្វាន់ដូ ITF បានលើកឡើងក្នុងថ្ងៃបិទវគ្គបណ្ដុះបណ្ដាលថា វគ្គនេះគឺពិតជាមានសារសំខាន់ចំពោះសិក្ខាកាមចូលរួមមិនថាគ្រូ ឬសិស្សៗនោះឡើយ។ ទី១ សម្រាប់គ្រូៗ គឺចេះធ្វើផែនការហ្វឹកហាត់ហើយមួយទៀតនោះចេះដាក់នូវលំហាត់ទៅឲ្យសិស្សៗហាត់។ ទី២ កីឡាករគឺដឹងពីរបៀបហ្វឹកហាត់រាងកាយតាមបែបលក្ខណៈស្តង់ដារ។ បន្ថែមពីនេះទៀតគឺដឹងបរិបទរាងកាយ នៃការហ្វឹកហាត់កាយសម្បទា របួសសន្លាក់ដៃ សន្លាក់ជើង និងរបៀបព្យាបាលផងដែរ។

គ្រូឧបទេស

ឯកឧត្ដម ប៊ួន ហ៊ីងសុធីយ៉ា អគ្គលេខាធិការសហព័ន្ធបានឲ្យដឹងថា កីឡាប្រសិនបើកាយសម្បទាមិនរឹងមាំ កាយសម្បទាខ្សោយនោះសមត្ថភាពក្នុងកីឡាក៏មិនសូវជាល្អ ឬខ្លាំងពូកែនោះដែរ។ ដោយឡែកប្រសិនបើកីឡាករ កីឡាការិនីមានកាយសម្បទាល្អហើយនោះទម្រង់នៃការហ្វឹកហាត់ ឬលេងកីឡានោះនិងល្អប្រសើរតាមហ្នឹងដូចគ្នា។ មួយវិញទៀតកាលណាកាយសម្បទារឹងមាំអត្រារបួសក្នុងការហ្វឹកហាត់ ឬប្រកួតក៏កាត់បន្ថយនោះដែរ ដូច្នេះហើយវគ្គបណ្ដុះបណ្ដាលនេះគឺល្អណាស់សម្រាប់សិក្ខាកាម។ បន្ទាប់ពីបញ្ចប់វគ្គនេះទៅសូមសិក្ខាកាមចូលរួមបន្តហ្វឹកហាត់តាមអ្វីដែលគ្រូជំនាញបានបង្ហាត់បង្រៀនកន្លងទៅ។

ទិដ្ឋភាពបិទវគ្គ

បញ្ជាក់ដែរថា វគ្គបណ្ដុះបណ្ដាលផ្នែកកាយសម្បទាដែលរៀបចំឡើងដោយសហព័ន្ធតេក្វាន់ដូ ITF នេះបានធ្វើឡើងរយៈពេល ៦ថ្ងៃគឺចាប់ពីថ្ងៃទី៤ ដល់ ៩ ខែកុម្ភៈ ឆ្នាំ២០២៤ នៅក្នុងពហុកីឡដ្ឋានជាតិ។ សិក្ខាកាមចូលរួមសរុប ២០នាក់ក្នុងនោះស្រី២នាក់។ គ្រូឧបទេសមាន២រូបជាជនជាតិបរទេសជំនាញផ្នែកកាយសម្បទាសាច់ដុំនេះតែម្ដង៕