- 2024-01-03 10:49:29
- កីឡាផ្សេងៗ
Herbalife ប្រកាសឧបត្ថម្ភគាំទ្រជានិច្ចដល់សហព័ន្ធទោចក្រយានចង់ទៅប្រកួតនៅខេត្តណាក៏ដោយ
- 2024-01-03 10:49:29
- ចំនួនមតិ 0 | ចំនួនចែករំលែក 0
Herbalife ប្រកាសឧបត្ថម្ភគាំទ្រជានិច្ចដល់សហព័ន្ធទោចក្រយានចង់ទៅប្រកួតនៅខេត្តណាក៏ដោយ
ចន្លោះមិនឃើញ
អគ្គនាយិកាក្រុមហ៊ុន Herbalife ដែលជាដៃគូសហការជាច្រើនឆ្នាំមកហើយបានប្រកាសជំហរថានឹងបន្តជួយឧបត្ថម្ភគាំទ្រជានិច្ចទោះជាសហព័ន្ធទោចក្រយានកម្ពុជារៀបចំការប្រកួតជើងឯកថ្នាក់ជាតិនៅបណ្ដាខេត្តណាក៏ដោយ។
លោកស្រី ឈុន ណៃឈីវ អគ្គនាយិកាក្រុមហ៊ុន Herbalife បង្ហាញការសប្បាយរីករាយជាខ្លាំងចំពោះលទ្ធផលល្អប្រសើរការឈ្នះមេដាយនៅស៊ីហ្គេម ឆ្នាំ២០២៣ កន្លងទៅបន្ទាប់ពីមានការជួយឧបត្ថម្ភរយៈពេល៣ឆ្នាំសហព័ន្ធទទួលបានផ្លែផ្កាបែបនេះ។ លោកស្រីមានការកោតសរសើរជាខ្លាំងចំពោះកីឡាករ កីឡាការិនី និងសហព័ន្ធផ្ទាល់ដែលបានខំប្រឹងប្រែងអស់កម្លាំងកាយចិត្តលើការហ្វឹកហាត់ និងប្រកួតរហូតឈ្នះមេដាយច្រើនគ្រឿងនៅស៊ីហ្គេមនៅកម្ពុជា។ ដូច្នេះហើយបើក្រុមហ៊ុនជួយឧបត្ថម្ភក្ដី ប៉ុន្តែមិនមានការខំប្រឹងពីសហព័ន្ធ កីឡាករ នោះជ័យជម្នះនេះមិនអាចកើកមានឡើងឡើយ។
អគ្គនាយិកាក្រុមហ៊ុន Herbalife ខាងលើបន្ថែមទៀតថា ការប្រកួតជើងឯកថ្នាក់ជាតិឆ្នាំ២០២៣ នេះក្រុមហ៊ុនឧបត្ថម្ភទឹកប្រាក់ចំនួន ៤២,៧៥០ដុល្លារដើម្បីជួយសម្រួលដល់សហព័ន្ធក្នុងការរៀបចំការប្រកួតនេះឲ្យកាន់តែល្អប្រសើរថែមទៀត។ ជាមួយគ្នានេះដែរលោកស្រីបញ្ជាក់ទៀតថា ការប្រកួតជើងឯកថ្នាក់ជាតិក្រោយៗទៀតសហព័ន្ធរៀបចំនៅក្នុងខេត្តណាក៏ដោយ Herbalife នៅតែបន្តឧបត្ថម្ភគាំទ្រជានិច្ច ព្រោះការឧបត្ថម្ភរបស់ក្រុមហ៊ុនគឺចង់ឲ្យកីឡាជាតិនៅកម្ពុជាមានការរីកចម្រើនពីមួយកម្រិតទៅមួយកម្រិត និងការឈានទៅដណ្ដើមជ័យជម្នះលើឆាកអន្តរជាតិ។
លោក នូ ចំរើន អគ្គលេខាធិការសហព័ន្ធទោចក្រយានបានឲ្យដឹងថា ថ្លែងអំណរគុណជាច្រើនចំពោះការឧបត្ថម្ភពីក្រុមហ៊ុន Herbalife ជាច្រើនឆ្នាំមកនេះ។ ការរីកចម្រើន និងជោគជ័យទាំងអស់នេះគឺជាការរួមចំណែកដ៏ធំរបស់ម្ចាស់ឧបត្ថម្ភដែលបានលើកកម្ពស់ការហ្វឹកហាត់ក៏ដូចជាស្មារតីក្រុមកីឡាទោចក្រយានកម្ពុជា។
បញ្ជាក់ដែរថា សហព័ន្ធកីឡាទោចក្រយានកម្ពុជា នឹងរៀបចំការប្រកួតជើងឯកថ្នាក់ជាតិ ឆ្នាំ២០២៣ របស់ខ្លួននៅខេត្តកំពង់ឆ្នាំង រយៈពេល ២ថ្ងៃចាប់ពីថ្ងៃទី៦ ដល់ ៧ ខែមករា ឆ្នាំ២០២៤។ កីឡាករ កីឡាការិនី ប្រតិភូ សរុប ២៩៨នាក់។ ដោយឡែកសរុបទាំងអ្នកស្ម័គ្រចិត្ត និងការចូលរួមពីមហាជនក្នុងព្រឹត្តិការណ៍នេះមានចន្លោះពី ៥៥០នាក់ទៅ ៦០០នាក់។ ការប្រកួតនេះមាន ៧វិញ្ញាសា (កង់គួកបុរស អាយុ១៨ឆ្នាំចុះក្រោម កង់គួកបុរសពេញវ័យ អាយុចាប់ពី១៨ឆ្នាំឡើង កង់គួកបុរស អាយុចាប់ពី៤០ឆ្នាំឡើង កង់ភ្នំបុរស អាយុ១៨ឆ្នាំចុះក្រោម កង់ភ្នំបុរសពេញវ័យ អាយុ១៨ឆ្នាំឡើង កង់ភ្នំនារី អាយុ១៥ឆ្នាំឡើង វិញ្ញាសា កង់ភ្នំបុរស អាយុ៤០ឆ្នាំឡើង)៕
SabayOne កម្មវិធីកម្សាន្តថ្មីរបស់ Sabay បើកឲ្យប្រើសាកល្បងពីពេលនេះ! ចុះឈ្មោះតាមរយៈតំណភ្ជាប់នេះ https://bit.ly/3QVlYVB
