- 2023-10-18 08:04:57
- កីឡាផ្សេងៗ
កម្ពុជា នឹងជ្រើសរើសអត្តពលិកមានទេពកោសល្យបំផុត ៧រូបទៅហ្វឹកហាត់នៅប្រទេសចិន ៣ឆ្នាំ
- 2023-10-18 08:04:57
- ចំនួនមតិ 0 | ចំនួនចែករំលែក 0
កម្ពុជា នឹងជ្រើសរើសអត្តពលិកមានទេពកោសល្យបំផុត ៧រូបទៅហ្វឹកហាត់នៅប្រទេសចិន ៣ឆ្នាំ
ចន្លោះមិនឃើញ
អគ្គលេខាធិការនៃគណៈកម្មាធិការជាតិអូឡាំពិកកម្ពុជា ថានឹងជ្រើសរើសអត្តពលិកឆ្នើមដែលមានសមត្ថភាព សក្ដានុពលខ្លាំងជាងគេចំនួន ៧រូបទៅហ្វឹកហាត់នៅខេត្តយូណាន ប្រទេសចិន ក្រោមជំនួយរយៈពេល ៣ឆ្នាំនៅទីនោះ។
ឯកឧត្ដម វ៉ាត់ ចំរើន អគ្គលេខាធិការនៃគណៈកម្មាធិការជាតិអូឡាំពិកកម្ពុជាបានឲ្យដឹងថា ជាការឆ្លើយតបនិងកម្ពុជាអំពីការស្នើសុំឧបត្ថម្ភលើការហ្វឹកហាត់ និងសម្ភារហ្វឹកហាត់ភាគីខាងចិនគាំទ្រពេញទំហឹងក្នុងការជួយជានិច្ចចំពោះវិស័យកីឡារបស់កម្ពុជា។ ជាក់ស្ដែងគ្រាន់តែខេត្តយូណាន (Yunan) គេមានកញ្ចប់ថវិកាពិសេសរយៈពេល ៣ឆ្នាំសម្រាប់ផ្ដល់ជូនអត្តពលិកដែលមានទេពកោសល្យបំផុត ៧នាក់ទៅហ្វឹកហាត់ដើម្បីឲ្យសមត្ថភាពឈានឡើងបន្ថែមទៀត។
អ្នកជំនាញផ្នែកកីឡារូបនេះបន្ថែមទៀតថា កម្ពុជានឹងជ្រើសរើសអត្តពលិកដែលមានទេពកោសល្យ និងសមត្ថភាពលេចធ្លោជាងគេបំផុត ឧទាហរណ៍ដូចជាកីឡាករអត្តពលកម្ម ឈុន ប៊ុនថន ជាដើមដែលមានសមត្ថភាពកើនឡើងខ្លាំង និងមានស្ថិតិជិតកៀកមេដាយកីឡាអាស៊ី កីឡាអូឡាំពិក។ ទាំងនេះហើយដែលថ្នាក់ដឹកនាំកីឡាកម្ពុជាព្យាយាមជំរុញបន្ថែមដល់អត្តពលិក។ ជាមួយគ្នានោះដែរខាងភាគីចិននឹងជួយជាសម្ភារហ្វឹកហាត់ដល់កម្ពុជាទៀតផងនៅពេលខាងមុខ។
បញ្ជាក់ដែរថា ការលើកឡើងរបស់ឯកឧត្ដម វ៉ាត់ ចំរើន អគ្គលេខាធិការនៃគណៈកម្មាធិការជាតិអូឡាំពិកកម្ពុជា និងជារដ្ឋលេខាធិការក្រសួងអប់រំគឺក្រោយពីឯកឧត្ដមវិលត្រលប់ពីដឹកនាំកីឡាករ កីឡាការិនីមកពីប្រកួតកីឡាអាស៊ី លើកទី១៩ នៅប្រទេសចិន។ ចំពោះគម្រោងជ្រើសរើសអត្តពលិកមានទេពកោសល្យបំផុតបញ្ជូនទៅចិននេះគឺចាប់ពី ២០២៤ ឆ្នាំក្រោយនេះដោយត្រូវហាត់រយៈពេល៣ឆ្នាំជាប់តែម្ដង៕
