- 2022-12-16 08:32:35
- ព័ត៌មាន
គណៈកម្មាធិការជាតិរៀបចំកីឡាអាស៊ានប៉ារ៉ាហ្គេម លើកទី១២ ចុះ MOUជាមួយសហព័ន្ធកីឡាជនពិការអាស៊ីអាគ្នេយ៍
- 2022-12-16 08:32:35
- ចំនួនមតិ 0 | ចំនួនចែករំលែក 0
គណៈកម្មាធិការជាតិរៀបចំកីឡាអាស៊ានប៉ារ៉ាហ្គេម លើកទី១២ ចុះ MOUជាមួយសហព័ន្ធកីឡាជនពិការអាស៊ីអាគ្នេយ៍
ចន្លោះមិនឃើញ
ខណៈព្រឹត្តិការណ៍កីឡាករជនពិការ ឬ អាស៊ានប៉ារ៉ាហ្គមេ កាន់តែជិតមកដល់ គណៈកម្មាធិការជាតិរៀបចំកីឡាអាស៊ានប៉ារ៉ាហ្គេម លើកទី១២ (CAMAPGOC) បានចុះ MOUជាមួយសហព័ន្ធកីឡាជនពិការអាស៊ីអាគ្នេយ៍ ដើម្បីធ្វើសហប្រតិបត្តិការធ្វើយ៉ាងណារៀបចំព្រឹត្តិការណ៍ឲ្យដំណើរការជោគជ័យ និងរលូន។
តាមឯកឧត្តម យី វាសនា អគ្គលេខាធិការ គណៈកម្មាធិការជាតិប៉ារ៉ាឡាំពិក កម្ពុជា បានឲ្យដឹងថាកម្មវិធី "អាស៊ានប៉ារ៉ាហ្គេម" គឺធ្វើឡើង ២ឆ្នាំម្ដង និងផ្លាស់ប្ដូរតាមឈ្មោះប្រទេស។ ដោយឡែកឆ្នាំ ២០២៣នេះ ដល់វេនកម្ពុជាធ្វើម្ចាស់ផ្ទះរៀបចំម្ដង បន្ទាប់ពីបានខកខានរៀបចំកីឡាស៊ីហ្គេម ៦៣ឆ្នាំហើយដោយសារសង្គ្រាម។
យ៉ាងឯកឧត្តម បន្តថា សម្ដេចតេជោ ហ៊ុន សែន ថាយើងត្រូវតែទទួលយកសិទ្ធិមករៀបចំ និងធ្វើឲ្យបានល្អ។ ដូច្នេះហើយ ទើបមានការចុះហត្ថាលេខាលើអនុស្សរណៈយោគយល់គ្នានេះជាមួយ សហព័ន្ធកីឡាជនពិការអាស៊ីអាគ្នេយ៍ ហៅកាត់ថា APSF នៅថ្ងៃនេះ ដើម្បីធ្វើសហប្រតិបត្តិការរៀបចំព្រឹត្តិការណ៍កីឡាដ៏ធំនេះឲ្យបានល្អ ព្រោះថា APSF មានបទពិសោធន៍ ២០ឆ្នាំមកហើយលើការងារនេះ។ ជុំវិញបញ្ហានេះ លោក Osoth Bhavilai ប្រធានសហព័ន្ធកីឡាជនពិការអាស៊ាន (APSF) បានប្តេជ្ញាជួយកម្ពុជាក្នុងការរៀបចំការប្រកួតកីឡាអាស៊ានប៉ារ៉ាហ្គេម លើកទី១២ ឆ្នាំ២០២៣ ឲ្យទទួលបានជោគជ័យ និងល្អបំផុត។ លោកថា លោកសូមអរគុណដែលសម្តេចតេជោ ហ៊ុន សែន នាយករដ្ឋមន្ត្រីនៃកម្ពុជា និងអរគុណដល់សម្តេចពិជ័យសេនា ទៀ បាញ់ ដែលដែលបានគាំទ្រពេញទំហឹងឲ្យរៀបចំការប្រកួតកីឡាអាស៊ានប៉ារ៉ាហ្គេម នៅកម្ពុជា។
ជាមួយគ្នានេះលោកពិតជារីករាយដែលឃើញកម្ពុជាកំពុងត្រៀមខ្លួនបានយ៉ាងល្អ និងស្ទើរតែរួចរាល់១០០%ទៅហើយ។ លោកមានប្រសាសន៍ថា ការចុះអនុស្សរណៈយោគយល់គ្នាពេលនេះ រវាង CAMAPGOC និង APSF គឺជួយសម្រួលដល់សមាជិកអាស៊ានទាំងអស់ពីរបៀបដែលពួកគាត់មកទៅនេះដើម្បីចូលរួមប្រកួត។ APSF បានផ្តល់សិទ្ធិឲ្យកម្ពុជារៀបចំធ្វើម្ចាស់ផ្ទះអាស៊ានប៉ារ៉ាហ្គេម ហើយ ទើបលោកមកទីនេះដើម្បីជួយ និងសម្របសម្រួលកម្ពុជាឲ្យទទួលបានជោគជ័យ។
"យើងត្រូវធ្វើការរួមគ្នា ពីព្រោះយើងត្រូវទទួលខុសត្រូវក្នុងការអនុវត្តដើម្បីរៀបចំសៀវភៅបច្ចេកទេស Handbook។ ពីព្រោះសៀវភៅបច្ចេកទេស គឺជាកិច្ចព្រមព្រៀងមួយក្នុងចំណោមសមាជិកអាស៊ានទាំង១០ប្រទេស។ ក្នុងនាមខ្ញុំជាប្រធាន ខ្ញុំមានបេសកកម្មតាមដាន និងសម្របសម្រួលអ្វីៗទាំងអស់ឲ្យមាននៅក្នុងសៀវភៅបច្ចេកទេស"។ លោកបន្ថែម។
ជាមួយគ្នានេះ លោកស្រី Wandee Tosuwan អគ្គលេខាធិការសហព័ន្ធកីឡាជនពិការអាស៊ានជឿជាក់ថា កម្ពុជានឹងរៀបចំការប្រកួតកីឡាអាស៊ានប៉ារ៉ាហ្គេម ឆ្នាំ២០២៣ បានល្អជាងប្រទេសឥណ្ឌូនេស៊ីដែលបានរៀបចំអាស៊ានប៉ារ៉ាហ្គេម លើកទី១១ ឆ្នាំ២០២២ កាលពីប៉ុន្មានខែមុននេះ។
លោកស្រី Wandee Tosuwan បានលើកឡើងថា ៖«យើងរៀបចំអាស៊ានប៉ារ៉ាហ្គេម លើកទី១១ នៅទីក្រុងសូឡូ ប្រទេសឥណ្ឌូនេស៊ី ក្នុងរយៈពេលខ្លី តែទទួលបានជោគជ័យ។ នៅទីនេះ (កម្ពុជា) ដោយមានការទទួលខុសត្រូវ មានសមត្ថភាព ទាំងរាជរដ្ឋាភិបាល ទាំងគណៈកម្មាធិការជាតិ CAMAPGOC និងមានគាំទ្រពីប្រជាជន យើងជឿជាក់ថា យើងអាចធ្វើបាន និងអាចល្អជាងតិចតួចកាលនៅឥណ្ឌូនេស៊ីផង»។
សូមបញ្ជាក់ថា ពិធីចុះហត្ថលេខាលើលិខិតអនុស្សរណៈនៃការយោគយល់គ្នារវាង គណៈកម្មាធិការជាតិរៀបចំកីឡាជនពិការអាស៊ីអាគ្នេយ៍ លើកទី១២ និងសហព័ន្ធកីឡាជនពិការអាស៊ីអាគ្នេយ៍ នៅព្រឹកថ្ងៃទី១៦ ធ្នូ នេះធ្វើនៅសណ្ឋាគារ Hyatt Regency Phnom Penh ក្រោមអធិបតីភាពឯកឧត្តមបណ្ឌិត ថោង ខុន រដ្ឋមន្ត្រីក្រសួងទេសចរណ៍ និងជាអនុប្រធានអចិន្ត្រៃយ៍គណៈកម្មាធិការជាតិ CAMAPGOC ដោយមានឯកឧត្តម វ៉ាត់ ចំរើន អគ្គលេខាធិការ CAMAPGOC និងលោកណ្ឌិត Osoth Bhavilai ប្រធាន APSF ជាភាគីហត្ថលេខី។
តាមផែនការ កីឡាអាស៊ានប៉ារ៉ាហ្គេម លើកទី១២ ដែលកម្ពុជាធ្វើជាម្ចាស់ផ្ទះ គ្រោងចាប់ផ្ដើមពីថ្ងៃទី៣ ដល់ទី៩ ខែមិថុនា ឆ្នាំ២០២៣ នៅពហុកីឡដ្ឋានជាតិមរតកតេជោ៕