Ronaldo មានតម្លៃខ្លួនត្រឹម ១៥លានអ៊ឺរ៉ូ ក្នុងវ័យក្បែរ៤០ឆ្នាំ

2024-03-27 11:04:31
ព័ត៌មាន

2024-03-27 11:04:31
ចំនួនមតិ 0 | ចំនួនចែករំលែក 0

ចន្លោះមិនឃើញ

ខ្សែប្រយុទ្ធ Cristiano Ronaldo មានតម្លៃខ្លួនត្រឹម ១៥លានអ៊ឺរ៉ូប៉ុណ្ណោះ ខណៈកីឡាករនេះមានវ័យ៣៩ឆ្នាំ ក្នុងឆ្នាំនេះ។ បើតាមស្ថិតិរបស់ Transfermarkt ក្រោយធ្វើបច្ចុប្បន្នភាពទីផ្សារកីឡាករកាលពីពេលថ្មីៗនេះ។

កីឡាករនេះបានរក្សាតម្លៃខ្លួន ១៥លានអ៊ឺរ៉ូនេះបានជាង ២រដូវកាលហើយ ចាប់ពីរដូវកាលឆ្នាំ២០២២/២៣ មកទល់នឹងពេលនេះដោយនេះមិនមែនជារឿងដែលគួរឲ្យភ្ញាក់ផ្អើលនោះទេសម្រាប់កីឡាករដែលមានវ័យក្បែរ៤០ឆ្នាំបែបនេះ ព្រោះតែជាធម្មតានោះទេនៅក្នុងវិស័យបាល់ទាត់កីឡាករមានវ័យបែបនេះតែងតែមានហានិភ័យខ្ពស់ក្នុងការកើតរបួសនៅលើទីលានប្រកួតក៏ដូចជាទីលានហ្វឹកហាត់។

មួយទៀតវ័យកាន់តែច្រើនជាពិសេសចាប់វ័យ៣៥ឆ្នាំឡើងទៅកីឡាករជាទូទៅនឹងធ្លាក់ទម្រង់លេងឬក៏ទម្រង់លេងមានការថមថយព្រោះតែកាយសម្បទាចាប់ផ្ដើមធ្វើការធ្លាក់ចុះ ដូច្នេះហើយកីឡាករមួយចំនួនធំរៀបចំខ្លួនចូលនិវត្តន៍នៅក្នុងវ័យក្បែរ ឬក៏នៅពេលវ័យ៤០ឆ្នាំឡើងបែបនេះ។

យ៉ាងណាចំពោះ Ronaldo ទោះក្នុងវ័យក្បែរ៤០ឆ្នាំទៅហើយក្ដីប៉ុន្តែកីឡាករនេះធ្លាប់លើកឡើងក្នុងការសម្ភាសន៍មួយចំនួនថា គេមិនចង់ចូលនិវត្តន៍នៅក្នុងពេលឆាប់ៗនោះទេ ដោយគេនឹងសម្រេចចិត្តចូលនិវត្តន៍ប្រហែលនៅក្នុងពេល ៣-៥ឆ្នាំ ប៉ុន្តែគេធ្លាប់លើកឡើងជាច្រើនដងដោយចង់នៅលេងបាល់ទាត់បន្តទៀត។

តម្លៃខ្លួនខ្ពស់បំផុតរបស់ Ronaldo នៅអាជីពបាល់ទាត់របស់ខ្លួនគឺឡើងរហូតទៅដល់ ១៣៦លានដុល្លារ នៅឆ្នាំ២០១៤ ឆ្នាំ២០១៥ និងឆ្នាំ២០១៨ កាលនៅលេងឲ្យ Real Madrid ប៉ុន្តែក្រោយមកក៏ចាប់ផ្ដើមធ្លាក់ ក្រោយវ័យរបស់គេកាន់តែច្រើន។ ទោះបីតម្លៃខ្លួនរបស់គេត្រឹម ១៥លានអ៊ឺរ៉ូប៉ុន្តែប្រាក់ពលកម្មរបស់ Ronaldo នៅ Al Nassr ត្រូវបានគេដឹងថាទទួលបាន ៤.‌១លានដុល្លារក្នុង ១សប្ដាហ៍។

Ronaldo ត្រូវបានគេចាត់ស្ថិតក្នុងកំពូលវីរបុរសនៅក្នុងប្រវត្តិសាស្ត្របាល់ទាត់។ អ្នកគាំទ្របាល់ទាត់ទូទាំងពិភពលោកសុទ្ធតែទទួលស្គាល់ពីសមត្ថភាពកីឡាកររូបនេះ។ កីឡាករត្រូវបានគេដឹងថាមានការតស៊ូខ្ពស់ក្នុងអាជីពជាអ្នកបាល់ទាត់នេះតាំងពីវ័យក្មេងមក។

កីឡាកររូបនេះបានកសាងកេរ្តិ៍ឈ្មោះរបស់ខ្លួនដែលធ្វើឲ្យមនុស្សគ្រប់គ្នាស្គាល់ពីសមត្ថភាពរបស់គេនៅពេលគេលេងឲ្យក្លឹប Manchester United និងក្រោយមកគឺ Real Madrid ចន្លោះពីឆ្នាំ២០០៣-២០១៨ ជាពិសេសគឺឆ្នាំ២០០៧-២០១៨ គឺពេលដែលគេពេញឡើងជើងខ្លាំង។

Ronaldo ចូលក្នុងវិស័យបាល់ទាត់តាំងពីឆ្នាំ២០០២មកដោយចូលលេងបាន ១,០១១ប្រកួត និងស៊ុតចូល ៧៥៧គ្រាប់។ នៅក្នុងជីវិតជាកីឡាករបាល់ទាត់គេបានឈ្នះពានតូចធំអស់ហើយដូចជា ពាន Ballon D'or ពាន UEFA Champions League ពានលីគកំពូល និងពាននានាលើកលែងតែពាន FIFA World Cup ប៉ុណ្ណោះដែលកីឡាករនេះនឹងមិនអាចយក៕

ប្រភព៖ transfermarkt អត្ថបទ៖ សេរី មង្គល