ប្រធានក្លឹប Barca ទទូចចង់ឱ្យប្រកួត El Clasico លេងឡើងវិញ

2024-04-23 11:23:37
ព័ត៌មាន

2024-04-23 11:23:37
ចំនួនមតិ 0 | ចំនួនចែករំលែក 0

ចន្លោះមិនឃើញ

ប្រធានក្លឹប Barcelona លោក Juan Laporta ទទូចចង់ឱ្យប្រកួត El Clasico លេងឡើងវិញ ប្រសិនបើគេរកឃើញថា វីដេអូជំនួយអាជ្ញាកណ្ដាល ឬ ហៅជាភាសាអង់គ្លេសថា VAR បង្កកំហុស ដោយមិនអនុញ្ញាតឱ្យគ្រាប់បាល់របស់ខ្សែប្រយុទ្ធវ័យ ១៦ឆ្នាំរបស់ក្លឹបគឺ កីឡាករ Lamine Yamal យកជាការបាន។ នេះបើតាមវីដេអូ ៤នាទីរបស់លោកបង្ហោះកាលពីថ្ងៃច័ន្ទ។

លោក Laporta បានតវ៉ាថា «គ្រាប់បាល់ខ្មោច» របស់ Yamal គួរតែយកជាការបាន ដោយសារតែគ្រាប់បាល់នេះបានចូលក្នុងសំណាញ់ទីទៅហើយ។ ខ្សែប្រយុទ្ធ Yamal បានស៊ុតបាល់ ដែលហាក់បីដូចជាចូលសំណាញ់ទី អំឡុងពេលដែល Real Madrid និង Barcelona ស្មើគ្នាក្នុងលទ្ធផល ១-១។

យ៉ាងណាមិញ ខាង VAR បានបដិសេធមិនឱ្យយកគ្រាប់នេះជាការនោះទេ។ លីគកំពូលអេស្ប៉ាញ La Liga ក៏មិនបានប្រើប្រាស់បច្ចេកវិទ្យាខ្សែចូលទីនោះដែរ។

ក្រោយមក ខាង Real Madrid បានយកឈ្នះ Barcelona ក្នុងលទ្ធផល ៣ ទល់នឹង ២។

ទាក់ទិននឹងរឿងនេះដែរ លោក Laporta បាននិយាយថា៖ «ក្នុងប្រកួតនេះ មានរឿងរ៉ាវក្ដីក្ដាំជាច្រើន ប៉ុន្តែមានរឿងមួយ ដែលផ្លាស់ប្ដូរលទ្ធផលនៃការប្រកួត»។ លោកបានបន្ថែមថា «ខ្ញុំសំដៅលើ «គ្រាប់បាល់ខ្មោច» ដោយកីឡាករ Lamine Yamal»។

លោកបានអះអាងថា ខាងក្លឹបបានស្នើសុំឱ្យមន្ត្រីបាល់ទាត់ត្រួតពិនិត្យឡើងវិញលើបញ្ហានេះ ហើយប្រសិនបើគេរកឃើញថា ខាង VAR បង្កកំហុសមែន នោះខាង Barcelona នឹងស្នើសុំឱ្យលេងការប្រកួត El Clasico ឡើងវិញ។

សូមជម្រាបផងដែរ កន្លងមកនៅក្នុងក្របខណ្ឌលីគអេស្ប៉ាញ ក៏ដូចជាលីគអឺរ៉ុបក៏មានករណីបែបនេះផងដែរ។ ធ្លាប់មានម្ដងនៅលីគប៊ែលហ្សិកនៅដើមរដូវកាលនេះ ដែលស្ថាប័នបាល់ទាត់បានអនុញ្ញាតឱ្យមានការប្រកួតលេងឡើងវិញរវាងក្លឹប Anderlecht និង Genk។ ប៉ុន្តែការប្រកួតនេះមិនបានកើតឡើងទេ ក្រោយពេលដែលតុលាការមជ្ឈិត្តកម្មកីឡាប៊ែលហ្សិកកាត់ក្ដីរួចរាល់៕

ប្រភព៖ ESPN FC អត្ថបទ៖ សេរី មង្គល