សុទ្ធតែជាជើងខ្លាំងម្នាក់ៗធ្លាប់ដើរស៊ីរាប! សម្រាប់អ្នកចូលប្រកួត LUX98-POOL 9-BALL OPEN 2022

2022-08-13 04:24:16
កីឡាផ្សេងៗ

2022-08-13 04:24:16
ចំនួនមតិ 0 | ចំនួនចែករំលែក 0

ចន្លោះមិនឃើញ

កម្មវិធីប្រកួត LUX98-POOL 9-BALL OPEN 2022 ចម្រាញ់បានកីឡាករឆ្នើមចំនួន១៦រូប មកចូលរួមប្រកួតហើយ ដោយចាប់ផ្ដើមដំណើរការប្រកួតចាប់ពីវេលាម៉ោង១០ ព្រឹកថ្ងៃទី១៣ ខែសីហា ឆ្នាំ២០២២ នៅទីតាំងស្នូកឃ័រ Lux98 សាខាច្បារអំពៅ ដែលកីឡាករកម្ពុជាមាន១២រូប និងកីឡាករបរទេស៤រូប ប៉ុន្តែអ្វីដែលជាការចាប់អារម្មណ៍កីឡាករកម្ពុជាទាំង១២នាក់សុទ្ធតែជាជើងខ្លាំង ធ្លាប់ដើរលេងស៊ីលុយតាមតាបផ្សេងៗស្ទើរតែពេញស្រុកខ្មែរ។

ទាក់ទងការប្រកួតនេះលោក ម៉ារ៉ា សុជាតិ អគ្គលេខាធិការសហព័ន្ធកីឡាប៊ីយ៉ា និងស្នូកឃ័រ កម្ពុជាបានលើកឡើងថា វាជាឱកាសមួយកម្ររកបាន និងរីករាយបំផុត សម្រាប់ថ្ងៃបើកការប្រកួតពាន LUX98-POOL 9-BALL OPEN 2022 ដោយកីឡាករដែលបានចូលរួមសុទ្ធតែជាជើងខ្លាំងក្រោយការចម្រាញ់ជ្រើសរើសជាច្រើនថ្ងៃ។ ថ្ងៃនេះជាថ្ងៃប្រកួតធំមួយក្នុងប្រទេសកម្ពុជា ហើយក៏ជាការប្រកួតលើកដំបូងផងដែរ លោកសង្ឃឹមថា ការប្រកួតនេះប្អូនៗដែលចូលរួមសុទ្ធតែជាអ្នកដែលមានទេពកោសល្យ។

លោកអគ្គលេខាធិការខាងលើបញ្ជាក់បន្ថែមថា កីឡាករបរទេសមាន៤ជាតិសាស្ត្រផ្សេងគ្នា ដែលមានហ្វីលីពីន វៀតណាម ចិន និងបារាំងផងដែរ។ ដោយមានការចូលរួមប្រកួតសុទ្ធតែជាជើងខ្លាំងបែបនេះ នឹងធ្វើឲ្យការប្រកួតកាន់តែល្អមើលខ្លាំងមែនទែន នេះបើតាមការសន្និដ្ឋានរបស់លោក។

ជាមួយគ្នានោះឯកឧត្ដម អ៊ុក សិទ្ធិជាតិ អគ្គនាយកនៃអគ្គនាយកដ្ឋានកីឡារបស់ក្រសួងអប់រំ យុវជន និងកីឡា ក៏បានមានប្រសាសន៍ទាក់ទងការប្រកួតខាងលើនេះដែរថា ឆ្លៀតក្នុងឱកាសបានធ្វើការកោតសរសើរទៅកាន់សហព័ន្ធដែលបានខិតខំប្រឹងប្រែង និងម្ចាស់ក្លឹបដែលបានយកចិត្តទុកដាក់រៀបចំការប្រកួតនេះឡើយ។ មែនទែនទៅវាជាការត្រៀមខ្លួនមួយក្នុងការពង្រឹងសមត្ថភាព ក្នុងទិសដៅសម្រាប់ស៊ីហ្គេមឆ្នាំ២០២៣ ដែលកម្ពុជាធ្វើម្ចាស់ផ្ទះ ដោយធ្វើការប្រមែប្រមូលយកធនធានកីឡាករល្អៗមកហ្វឹកហាត់ដុតខាត់បន្ថែមសមត្ថភាព។

ក្នុងឱកាសនោះដែរកញ្ញា ហេង ចាង អ្នកតំណាងរបស់ក្លឹបក៏បានចូលរួមលើកឡើងដែរថា Lux98 ពិតមានកិត្តិយសមែនទែន ដែលអាចរៀបចំព្រឹត្តិការណ៍ដ៏ធំនេះឡើយ។ កញ្ញាជឿថាការរៀបចំព្រឹត្តិការណ៍នេះ នឹងអាចចូលរួមជួយវិស័យកីឡាប៊ីយ៉ា និងស្នូរឃ័រ ឲ្យកាន់តែមានភាពរីកចម្រើនឡើង។

សម្រាប់ការប្រកួតនេះមានរយៈពេល២ថ្ងៃគឺថ្ងៃទី១៣ និង១៤ នឹងរកឃើញជើងឯកហើយ ខាងក្រោមជារង្វាន់៖

ជយលាភី និង រង្វាន់ការប្រកួតកីឡាប៊ីយ៉ាភូល LUX98-POOL 9-BALL OPEN 2022

លេខ១៖ ទទួលបានមេដាយ ពាន និងទឹកប្រាក់សុទ្ធ២លានរៀល រួមទាំងរង្វាន់ផ្សេងៗ។

លេខ២៖ ទទួលបានមេដាយ និងទឹកប្រាក់សុទ្ធ១លានរៀល រួមទាំងរង្វាន់ផ្សេងៗ ។

លេខ៣៖ ទទួលបានមេដាយ និងទឹកប្រាក់សុទ្ធ៥០ម៉ឺនរៀល រួមទាំងរង្វាន់ផ្សេងៗ ។

លេខ៤៖ ទទួលបានទឹកប្រាក់លើកទឹកចិត្តរួមទាំងរង្វាន់ផ្សេងៗស្មើនឹងទឹកប្រាក់ ២០ម៉ឺនរៀល ។

-ចូលដល់វគ្គពាក់កណ្តាលផ្តាច់ព្រ័ត្រ ទទួលបានទឹកប្រាក់សុទ្ធ រួមទាំងរង្វាន់ផ្សេងៗស្មើនឹង ៨ម៉ឺនរៀល ។

-ចូលដល់វគ្គផ្តាច់ព្រ័ត្រ ទួលបានទឹកប្រាក់សុទ្ធ រួមទាំងរង្វាន់ផ្សេងៗស្មើនឹង ១០ម៉ឺនរៀល ។