សម្ដេចតេជោ ដាក់ចេញអនុសាសន៍ស្នើក្រសួងអប់រំពន្យារពេលវិស្សមកាលតូចអំឡុងស៊ីហ្គេម២០២៣

2022-07-11 04:53:36
កីឡាផ្សេងៗ

2022-07-11 04:53:36
ចំនួនមតិ 0 | ចំនួនចែករំលែក 0

ចន្លោះមិនឃើញ

ក្នុងឱកាសចូលរួមកិច្ចប្រជុំក្រុមប្រឹក្សាសហព័ន្ធកីឡាអាស៊ានប៉ារ៉ា និងក្រុមប្រឹក្សាសហព័ន្ធកីឡាអាស៊ីអាគ្នេយ៍ ថ្ងៃចន្ទ ទី១១ ខែកក្កដា ឆ្នាំ២០២២កិច្ច ដើម្បីត្រៀមធ្វើជាម្ចាស់ផ្ទះព្រឹត្តិការណ៍ដ៏ដំជាប្រវត្តិសាស្ត្រធ្វើជាម្ចាស់ផ្ទះស៊ីហ្គេម សម្ដេចអគ្គមហាសេនាបតីតេជោ ហ៊ុន សែន នាយករដ្ឋមន្ត្រីនៃ ព្រះរាជាណាចក្រកម្ពុជា បានដាក់ចេញនូវគោលការណ៍ និងអនុសាសន៍ចំនួន ៤ ក្នុងនោះចំណុចទី៣ នឹងស្នើទៅកាន់ក្រសួងអប់រំយុវជន និងកីឡាឲ្យពន្យារពេលវិស្សមកាលតូច។

រូប CAMBODIA 2023

ក្នុងចំណុចទី៣ សម្ដេចតេជោ បានមានប្រសាសន៍ថា «ខ្ញុំសូមស្នើដល់ក្រសួងអប់រំយុវជន និងកីឡា ពិនិត្យលទ្ធភាព ពន្យារពេលវិស្សមកាលតូចក្នុងអំឡុងពេលចូលឆ្នាំខ្មែរប្រពៃណីជាតិ រហូតដល់ថ្ងៃទី១៨ ខែឧសភា ឆ្នាំ២០២៣ ដើម្បីផ្ដល់ឱកាសឲ្យសិស្ស និស្សិត ចូលរួមបម្រើការងារស្ម័គ្រចិត្ត និងចូលរួមអបអរសាទរ លើកទឹកចិត្តកីឡាករ កីឡាការិនីជាតិ និងអន្តរជាតិ»។

បន្ថែមលើគោលការណ៍ខាងលើសម្ដេចក៏បានបន្ថែមនូវចំណុចសំខាន់ៗមួយចំនួនដូចខាងក្រោម ដើម្បីធ្វើយ៉ាងណាឲ្យការរៀបចំស៊ីហ្គេមនៅកម្ពុជា ឆ្នាំ២០២៣ ទទួលបានជោគជ័យខ្ពស់៖

១-គណៈកម្មការជាតិរៀបចំការប្រកួតកីឡាស៊ីហ្គេម និងអាស៊ាន ប៉ារ៉ាហ្គេម ឆ្នាំ២០២៣ ត្រូវយកចិត្តទុកដាក់លើគ្រប់មុខសញ្ញា គ្រប់គ្រងព្រឹត្តិការណ៍សំខាន់ៗឲ្យបានរួចរាល់ និងទាន់ពេលវេលា ពិសេសការងារ ដែលត្រូវការពេលយូរ ត្រូវចាប់ផ្ដើមពីពេលនេះតទៅ ដូចជាការជួសជុលកំណែលម្អទីលានប្រកួត រៀបចំប្រព័ន្ធគ្រប់គ្រងបច្ចេកវិទ្យា JMS ការរៀបចំពិធីបើក និងពិធីបិទ ព្រមទាំងការរៀបចំកន្លែងស្នាក់នៅ ហូបចុក និងដឹកជញ្ជូនជាដើម។ ជាមួយនេះត្រូវជំរុញឲ្យបានខ្លាំងថែមទៀត ក្នុងការអភិរក្ស កម្រិតបច្ចេកទេសកីឡា រួមទាំងកីឡាល្បុក្កតោខ្មែរ និងកីឡាយុទ្ធគុន ឥណ្ឌូណេស៊ី ដែលមានឈ្មោះថា ស៊ីឡា ដែលទទួលបានការឯកភាពជួយពីឯកឧត្ដមរដ្ឋមន្រ្តីការពារជាតិនៃប្រទេស ឥណ្ឌូណេស៊ី និងកីឡា យូដូ ពីអតីតឯកឧត្ដមអគ្គរដ្ឋទូតជប៉ុន។

២-អំពាវនាវសាជាថ្មីដល់ប្រពន្ធផ្សព្វផ្សាយ រដ្ឋ និងឯកជន ចូលរួមយុទ្ធនាការផ្សព្វផ្សាយ និងយុទ្ធនាការលាងសម្អាតផ្ទះ និងសង្គមយើង តាមរយៈយុទ្ធនាការប្រជាជនម្នាក់ លេងកីឡាមួយមុខយ៉ាងតិចប្រចាំជីវិត កម្ពុជាស្អាត បដិសណ្ឋារកិច្ចល្អ សេវាល្អ កម្ពុជាកាត់បន្ថយគ្រោះថ្នាក់ចរាចរណ៍ និងកាត់បន្ថយឥទ្ធិពលគ្រឿងញៀន និងកីឡារស់ក្នុងសន្តិភាព ឲ្យបានផុលផុសទាំងក្នុង និងក្រៅប្រទេស។

៣-អំពាវនាវបណ្ដាប្រទេសសមាជិកស៊ីហ្គេម និង អាស៊ាន ប៉ារ៉ាហ្គេម មេត្តាផ្ដល់នូវការគាំទ្រនូវគ្រប់ទម្រង់តាមដែលអាចធ្វើទៅបាន ដើម្បីការរៀបចំការប្រកួតកីឡាស៊ីហ្គេម និង អាស៊ាន ប៉ារ៉ាហ្គេម ឲ្យទទួលបានជោគជ័យខ្ពស់៕

អត្ថបទ៖ ស្រី សុវណ្ណដារ៉ា