- 2018-09-28 03:11:52
- កីឡាផ្សេងៗ
ការប្រកួត E-Sports ជើងឯកជាតិ២០១៨ប្រកាសថ្ងៃចុះឈ្មោះប្រកួត
- 2018-09-28 03:11:52
- ចំនួនមតិ 0 | ចំនួនចែករំលែក 0
ការប្រកួត E-Sports ជើងឯកជាតិ២០១៨ប្រកាសថ្ងៃចុះឈ្មោះប្រកួត
ចន្លោះមិនឃើញ
ការប្រកួតជើងឯកកីឡាអេឡិចត្រូនិកថ្នាក់ជាតិ (National E-Sport Championship) ប្រចាំឆ្នាំ២០១៨នឹងចាប់ផ្តើមបើកការចុះឈ្មោះចូលរួមប្រកួតនៅថ្ងៃទី១ ខែតុលា ឆ្នាំ២០១៨ ខាងមុខនេះហើយ។
ព័ត៌មានជាបឋមពីសហព័ន្ធកីឡាអេឡិចត្រូនិកកម្ពុជាថា រហូតដល់ពេលនេះ សហព័ន្ធទទួលបានការឧបត្ថម្ភពីក្រុមហ៊ុន Sabay រៀបចំការប្រកួតលើវិញ្ញាសា AK2។ សម្រាប់វិញ្ញាសាផ្សេងៗទៀត សហព័ន្ធកំពុងស្វះស្វែងរកម្ចាស់ឧបត្ថម្ភដើម្បីធ្វើឲ្យយ៉ាងណាឲ្យមានការប្រកួតជើងឯកថ្នាក់ជាតិដូចជា Dota 2 និង League of Legends។ បើក្រុមហ៊ុនឯកជនណាចង់ចូលរួមឧបត្ថម្ភសម្រាប់វិញ្ញាសាប្រកួតផ្សេងៗ សូមទាក់ទងមកសហព័ន្ធកីឡាអេឡិចត្រូនិកកម្ពុជាតាមរយៈផេកផ្លូវការ E-Sport Federation Cambodia ។
តាមការឲ្យដឹងពីគណៈកម្មការរៀបចំការប្រកួតនៃសហព័ន្ធកីឡាអេឡិចត្រូនិកកម្ពុជា (EFC) បានប្រាប់ថា ការប្រកួតនឹងធ្វើឡើងទូទាំងប្រទេសដោយបែងចែកជា៥តំបន់ដើម្បីស្វែងរកក្រុមខ្លាំងប្រចាំតំបន់ឡើងមកប្រកួតជុំផ្តាច់ព្រ័ត្រនៅរាជធានីភ្នំពេញ។
តំបន់ទាំង៥បើកការចុះឈ្មោះនៅថ្ងៃទី១ ខែតុលា ឆ្នាំ២០១៨នេះតទៅ។
តំបន់ទី១៖ ខេត្តកំពង់ចាម ក្រចេះ ស្ទឹងត្រែង រតនគីរី និងមណ្ឌលគីរី បិទការចុះឈ្មោះថ្ងៃទី២៥ ខែតុលា និងប្រកួតថ្ងៃទី២៧ ខែតុលា។
តំបន់ទី២៖ ខេត្តកំពង់ធំ ព្រះវិហារ សៀមរាប និងឧត្តរមានជ័យ បិទការចុះឈ្មោះថ្ងៃទី១ ខែវិច្ឆិកា និងប្រកួតថ្ងៃទី៣ ខែវិច្ឆិកា។
តំបន់ទី៣៖ ខេត្តកំពង់ឆ្នាំង ពោធិ៍សាត់ បាត់ដំបង ប៉ៃលិន និងបន្ទាយមានជ័យ បិទការចុះឈ្មោះថ្ងៃទី៨ ខែវិច្ឆិកា និងប្រកួតថ្ងៃទី១០ ខែវិច្ឆិកា។
តំបន់ទី៤៖ ខេត្តតាកែវ កំពត ក្រុងព្រះសីហនុ កោះកុង និងកំពង់ស្ពឺ បិទការចុះឈ្មោះថ្ងៃទី២៥ ខែវិច្ឆិកា និងប្រកួតថ្ងៃទី២៧ ខែវិច្ឆិកា។
តំបន់ទី៥៖ រាជធានីភ្នំពេញ ខេត្តកណ្តាល ព្រៃវែង និងស្វាយរៀង បិទការចុះឈ្មោះថ្ងៃទី២៩ ខែវិច្ឆិកា និងប្រកួតថ្ងៃទី១ ខែធ្នូ។
ការប្រកួតជុំផ្តាច់ព្រ័ត្រធ្វើនៅ ខែមករា ឆ្នាំ២០១៩
ប្រាក់រង្វាន់សរុបក្នុងការប្រកួតវិញ្ញាសា AK2 ឆ្នាំ២០១៨នេះគឺ ១០០ ០០០ ០០០ រៀល។ គណៈកម្មការរៀបចំការប្រកួតនឹងផ្សាយជូនលំអិតបន្ថែមទៀតអំពីប្រាក់រង្វាន់ប្រចាំតំបន់នីមួយៗ ប្រាក់រង្វាន់ជើងឯក ជើងឯករងទូទាំងប្រទេស និងវិញ្ញាសាផ្សេងៗទៀត៕
