ក្រុម​ស្ដេច​ស Real Madrid ​បាន​ធ្វើ​ដំណើរ​ទៅ​ដល់​កីឡដ្ឋាន​ Etihad ​ទឹក​ដី​អង់គ្លេស​ហើយ ដើម្បី​ប៉ះ​ Manchester City ក្នុង​ការ​ប្រកួត​ UEFA Champions League​​ ​វគ្គ​ពាក់​កណ្ដាល​ផ្ដាច់ព្រ័ត្រ ជើង​ទី​១ នា​វេលា​ម៉ោង​០១:៤៥​នាទី​រំលង​អាធ្រាត្រ​​យប់​នេះ។

Man City ទើប​តែ​ឡើង​ដល់​វគ្គ​ពាក់​កណ្ដាល​ផ្ដាច់ព្រ័ត្រ​​ UEFA Champions League ​​ជា​លើក​ដំបូង​ក្នុង​ប្រវត្តិសាស្ត្រ​ក្លឹប​​រដូវ​កាល​នេះ​ទេ ដូច្នេះ​ចាំ​មើល​ថា​ពួកគេ​ អាច​ត​តាំង​ជាមួយ​ម្ចាស់​ជើង​ឯក​ ១០​សម័យ​កាល​ Real បាន​ឬ​យ៉ាង​ណា?

សម្ដី​អ្នកចាត់ការ៖

​​Manuel Pellegrini អ្នកចាត់ការ​ក្រុម​ Man City៖ "វា​ពិត​ជា​សំខាន់​ខ្លាំង​ណាស់​ ​ដែល​យើង​អាច​ឡើង​ដល់​វគ្គ​ Semi-Final ហើយ​វា​មិន​មែន​​ជា​រឿង​ ដែល​យើង​អាច​ធ្វើ​បាន​រាល់​ឆ្នាំ​នោះ​ទេ។ កីឡាករ​ទាំង​អស់​យល់​ច្បាស់​ហើយ ដូច្នេះ​គ្រប់​គ្នា​​សុទ្ធ​តែ​ចង់​ឡើង​ទៅ​វគ្គ​បន្ត​លេង​ផ្ដាច់ព្រ័ត្រ។ យើង​នឹង​ឃើញ​ក្រុម​ Man City ដែល​លេង​ដើម្បី​ឈ្នះ”។

Zinédine Zidane អ្នកចាត់ការ​ Real Madrid៖ "យើង​កំពុង​មាន​ទម្រង់​លេង​ល្អ​ ប្រហែល​ជា​ល្អ​បំផុត​នៅ​រដូវ​កាល​នេះ។ យើង​នឹង​ព្យាយាម​លេង​ឲ្យ​បាន​ល្អ​បំផុត​ ​ដើម្បី​​រក​គ្រាប់​ឲ្យ​បាន និង​ព្យាយាម​​កុំ​ឲ្យ​របូត​គ្រាប់​បាល់។ ​វា​ជា​ការ​ប្រកួត​ដែល​សង្ឃឹម​៥០/៥០។ រឿង​ដ៏​សំខាន់​បំផុត​ ការ​ប្រកួត​​ធំ​ដូច​នេះ កីឡាករ​ត្រូវ​តែ​ខំ​ ១៥០%”។

ជើង​កីឡាករ៖

ម្ចាស់​ផ្ទះ​ Man City នឹង​អវត្តមាន​ខ្សែ​បម្រើ​ឆ្នើម​ Yaya Toure ​ដោយសារ​របួស​ភ្លៅ ប៉ុន្តែ​ប្រធាន​ក្រុម​ Vincent Kompany ​ដែល​ទើប​តែ​ត្រឡប់​ពី​របួស​កំភួន​ជើង​កាល​ថ្មីៗ​នេះ​ Fit ១០០%​វិញ​ហើយ។ ដូច្នេះ​១១​នាក់​ដំបូង​របស់​ក្រុម​មេឃ​ខៀវ​ ​អាច​ជា៖ Hart; Sagna, Otamendi, Kompany, Clichy; Fernando, Fernandinho; Navas, De Bruyne, Silva; Agüero។

រីឯ​ក្រុម​ភ្ញៀវ​ Real ​អ្នកចាត់ការ​ Zidane សង្ឃឹម​ថា​ខ្សែ​ប្រយុទ្ធ​ Karim Benzema និង​ Cristiano Ronaldo ​អាច​ Fit ១០០%  វិញ បន្ទាប់​ពី​មាន​បញ្ហា​របួស ក្រៅ​ពី​នោះ​ក្រុម​ស្ដេច​ស ពុំ​មាន​កីឡាករ​សំខាន់​ណា​របួស​គួរ​ឲ្យ​បារម្ភ​​ទៀត​ឡើយ។ ដូច្នេះ​១១​នាក់​ដំបូង​ក្រុម​យក្ស​អេស្ប៉ាញ​ អាច​ជា៖ Navas; Carvajal, Ramos, Pepe, Marcelo; Modrić, Casemiro, Kroos; Bale, Jesé (Lucas Vázquez), Ronaldo។

ប្រវត្តិ​ជួប​គ្នា និង​ស្ថិតិ៖

• ក្រុម​ទាំង​២​នេះ​ ធ្លាប់​ប៉ះ​គ្នា​២​ដង ​កាល​ឆ្នាំ​២០១២​​​នៅ​វគ្គ​សន្សំ​ពិន្ទុ​តាម​ពូល​ UEFA Champions League ខណៈ​ដែល​ពេល​នោះ​ Real ឈ្នះ​ ៣-២ នៅ​កីឡដ្ឋាន​ Bernabeu ​និង​ស្មើ​គ្នា ១-១ នៅ​​កីឡដ្ឋាន​ Etihad។

• Ronaldo ​ស៊ុត​ និង​ Assists ៧៧% នៃ​គ្រាប់​បាល់​របស់​ក្រុម​ Real Madrid ​នៅ​ UEFA Champions League រដូវ​កាល​នេះ​ (ស៊ុត​១៦, Assists ៤)។

• Sergio Aguero ​ខក​ខាន​ស៊ុត​បញ្ចូល​ទី​នៅ​ UEFA Champions League ៣​ប្រកួត​មក​ហើយ។

• Real Madrid មិន​ដែល​ចាញ់​ក្រុម​អង់គ្លេស​ទេ នៅ​៨​ប្រកួត​ចុង​ក្រោយ​ UEFA Champions League (ឈ្នះ​៦, ស្មើ​២)។ ប៉ុន្តែ​ក្រុម​អង់គ្លេស​ដែល​ធ្លាប់​​ទម្លាក់​​ Real ​ពី​ UEFA Champions League​ បាន​ចុង​ក្រោយ​នោះ​គឺ Liverpool ​នៅ​រដូវ​កាល​២០០៨/០៩ ខណៈ​ដែល​ពេល​នោះ​ហង្ស​ក្រហម លត់​ Real ទាំង​២​ជើង​ ៥-០ នៅ​វគ្គ​១៦​ក្រុម៕

ព្យាករ​គូ​នេះ​គឺ៖ Manchester City ២-២ Real Madrid , ចុះ​ប្រិយ​មិត្ត​យល់​យ៉ាង​ណា​ដែរ?

​ប្រែ​សម្រួល៖ វិន ជីវ័ន្ត ​ប្រភព៖ UEFA