- 2015-12-08 15:33:53
- ប្រដាល់
សរ សី ប្រឹងប្រែងរហូតឈ្នះ ជីម ចិត្រា ដណ្ដើមបានប្រាក់ ២ពាន់ដុល្លារនៅ One Championship
- 2015-12-08 15:33:53
- ចំនួនមតិ 0 | ចំនួនចែករំលែក 0
សរ សី ប្រឹងប្រែងរហូតឈ្នះ ជីម ចិត្រា ដណ្ដើមបានប្រាក់ ២ពាន់ដុល្លារនៅ One Championship
ចន្លោះមិនឃើញ
អ្នកលេងគុនខ្មែរចាស់វស្សា សរ សី ប្រឹងប្រែងអស់ពីកម្លាំងកាយចិត្តរហូតឈ្នះការប្រកួត ដើម្បីទឹកប្រាក់ ២បាន់ដុល្លារអាមេរិកសម្រាប់អ្នកឈ្នះពី ជីម ចិត្រា ក្នុងកម្មវិធី One: Kingdom of Khmer កាលពីថ្ងៃសៅរ៍ ទី៥ ខែធ្នូ ឆ្នាំ២០១៥ នៅសាលមហោរស្រពកោះពេជ្រ។
កូនសិស្សរបស់លោក ហ៊ុន ច័ន្ទរាជ រូបនេះបានបង្ហាញពីអារម្មណ៍ក្រោយឈ្នះការប្រកួតលើអ្នកប្រដាល់ក្បាច់គុនចម្រុះវ័យក្មេង ជីម ចិត្រាថា ៖« ខ្ញុំពិតជាសប្បាយចិត្តខ្លាំងបំផុត មិននឹកស្មានដល់ ថាបានប្រាក់ច្រើនបែបនេះឡើយ។ ខ្ញុំគ្រាន់តែដឹងថា អ្នកឈ្នះទទួលបានលុយ២ពាន់ដុល្លារ ហើយអ្នកចាញ់ទទួលបាន១ពាន់ដុល្លារ...ខ្ញុំប្រឹងប្រែងហ្វឹកហាត់យ៉ាងខ្លាំង រហូតធ្វើឲ្យខ្ញុំជឿថា ខ្ញុំមានក្ដីសង្ឃឹមយ៉ាងខ្លាំង។ គ្រាន់តែឡើងសើសង្វៀនភ្លាមខ្ញុំដឹងថា ខ្ញុំឈ្នះបាត់ហើយ ទោះគេវ៉ៃខ្ញុំខ្លាំងប៉ុណ្ណាក៏ខ្ញុំនៅតែទ្រាំបាន រាងកាយរបស់ខ្ញុំពោរពេញដោយកម្លាំង និងអំណត់មិនមានការឈឺចាប់ ព្រោះលុយច្រើន» ។
អ្នកប្រដាល់ចិត្តអំណត់បានបន្ថែមថា លោកមិនធ្លាប់ទទួលបានប្រាក់រង្វាន់ច្រើនបែបនេះឡើយគឺបានត្រឹមតែ៤០ទៅ៥០ម៉ឺនរៀលប៉ុណ្ណោះ។ ការប្រកួតនេះឈ្នះជារឿងចាំបាច់បំផុតសម្រាប់លោកពីព្រោះអាចទទួលបានប្រាក់ច្រើនយកទៅផ្គត់ផ្គង់ជីវភាពគ្រួសារដែលកំពុងខ្វះខាត។ ប្រកួតប្រដាល់សេរីកន្លងមកអ្នកលេងគុនខ្មែររូបនេះចំណាយពេលហ្វឹកហាត់តែ៣ឬ៤ថ្ងៃប៉ុណ្ណោះពីព្រោះយល់ថាបានប្រាក់រង្វាន់តិច។ ចំណែកជំនួបនៅ One Championshipដែលទទួលបានប្រាក់រង្វាន់២ពាន់ដុល្លារសម្រាប់អ្នកឈ្នះ ស សី បានហ្វឹកហាត់យ៉ាងខ្លាំងអស់រយៈពេល ១ខែពេញ។
សរ សី បានផ្ដួល ជីម ចិត្រា ក្នុងទឹកទី២ ។ បន្តទៅមុខទៀតរូបគេមានបំណងចង់ចូលរួមប្រកួតក្នុងកម្មវិធីធំៗ បែបនេះបន្តទៀត ដើម្បីទទួលបានប្រាក់គ្រប់គ្រាន់ផ្គត់ផ្គង់ជីវភាពគ្រួសារ។ ប្រសិនបើមានឱកាសមែននោះរូបគេ នឹងហ្វឹកហាត់ឲ្យបានខ្លាំងជាងនេះបន្ថែមទៀតដើម្បីឈ្នះគូប្រកួត ជួយលើកកម្ពស់វិស័យប្រដាល់ខ្មែរ៕
អត្ថបទ៖ ស្រី សុវណ្ណដារ៉ា
