- 2015-06-16 16:10:32
- ប្រវត្តិ
កម្ពុជាឈរលេខ៨ខ្ពស់ជាងស៊ីហ្គេម២០១៣ តែបាត់បង់មេដាយហួសពីការស្មាន
- 2015-06-16 16:10:32
- ចំនួនមតិ 0 | ចំនួនចែករំលែក 0
កម្ពុជាឈរលេខ៨ខ្ពស់ជាងស៊ីហ្គេម២០១៣ តែបាត់បង់មេដាយហួសពីការស្មាន
ចន្លោះមិនឃើញ
ក្រុមកីឡាកម្ពុជាស្ថិតលេខរៀងទី៨ក្នុងព្រឹត្តិការណ៍កីឡាស៊ីហ្គេមលើកទី២៨ ឆ្នាំ២០១៥ នៅប្រទេសសិង្ហបុរីដែលចំណាត់ថ្នាក់នេះខ្ពស់ជាងកីឡាស៊ីហ្គេមឆ្នាំ២០១៣នៅប្រទេសមីយ៉ាន់ម៉ា ប៉ុន្តែបើនិយាយពីមេដាយវិញធ្លាក់ចុះច្រើនហួសពីការរំពឹងទុក។
បន្ទាប់ពីបញ្ចប់ការប្រកួតរបស់ខ្លួនកាលពីល្ងាចថ្ងៃទី១៥ ខែមិថុនា ម្សិលមិញ ក្រុមកម្ពុជាទទួលបានមេដាយសរុបចំនួន១៥គ្រឿងក្នុងនោះមេដាយមាស១ ប្រាក់៥ និងសំរឹទ្ធ៩ដែលឈរនៅចំណាត់ថ្នាក់លេខ៨ពោលគឺនៅលើប្រទេសឡាវ ប្រ៊ុយណេ និងទីម័រខាងកើត។ ការឈរលេខរៀងទី៨នេះដោយសារប្រទេសឡាវក៏បាត់បង់មេដាយច្រើនដែរ សូម្បីតែមេដាយមាស១គ្រឿងក៏អត់បានផង។
ក្នុងចំណោមកីឡា២២ប្រភេទដែលកម្ពុជាបញ្ជូនទៅចូលរួមប្រកួតនៅស៊ីហ្គេមឆ្នាំនេះមានតែ៥ប្រភេទកីឡាប៉ុណ្ណោះដែលបានឈ្នះមេដាយជូនជាតិ។ កីឡាសីប៉ាក់តាក្រឈ្នះបានមេដាយ២គ្រឿងគឺមាស១ និងសំរឹទ្ធ១ដែលបានក្លាយជាប្រភេទកីឡាតែមួយគត់ដែលឈ្នះមេដាយមាសសម្រាប់ស៊ីហ្គេមឆ្នាំនេះ។ កីឡាប៉េតង់ឈ្នះបានមេដាយច្រើនជាងគេគឺ៩គ្រឿងក្នុងនោះប្រាក់៤ និងសំរឹទ្ធ៥ ហើយប្រដាល់សាកលឈ្នះមេដាយប្រាក់១ កីឡាតេក្វាន់ដូឈ្នះមេដាយសំរឹទ្ធ២ និងកីឡាវាយកូនបាល់ឈ្នះមេដាយសំរឹទ្ធ១។
កាលកីឡាស៊ីហ្គេមឆ្នាំ២០១៣ កម្ពុជាឈ្នះបានមេដាយសរុបចំនួន៤៧គ្រឿងគឺមាស៨ ប្រាក់១១ និងសំរឹទ្ធ២៨ដោយឈរនៅលេខរៀងទី៩គឺនៅលើប្រទេសទីម័រខាងកើត និងប្រ៊ុយណេ។
និយាយជារួមសម្រាប់ព្រឹត្តិការណ៍កីឡាស៊ីហ្គេមឆ្នាំនេះ មិនមែនតែប្រទេសកម្ពុជានោះទេដែលធ្លាក់ចុះមេដាយច្រើន សូម្បីតែប្រទេសមួយចំនួនទៀតក៏ធ្លាក់ចុះមេដាយដែរ ប៉ុន្តែម្ចាស់ផ្ទះសិង្ហបុរីកើនមេដាយច្រើន បើធៀបនឹងស៊ីហ្គេមឆ្នាំ២០១៣៕
អត្ថបទ៖ ជាន ចាន់រ៉ា
