បាត់មុខពីសង្វៀន៣ឆ្នាំ បឹត ខាំ តាំងចិត្តធ្វើឲ្យល្បីជាងមុន

2015-05-22 15:22:19
ប្រដាល់

2015-05-22 15:22:19
ចំនួនមតិ 0 | ចំនួនចែករំលែក 0

ចន្លោះមិនឃើញ

អ្នកប្រដាល់ជើងខ្លាំង បឹត ខាំ ខកខានឡើងសង្វៀនប្រកួតអស់រយៈពេល៣ឆ្នាំហើយ ប៉ុន្តែនៅពេលនេះរូបគេនឹងប្រឹងស្តារកេរ្តិ៍ឈ្មោះល្បីជាងមុន បន្ទាប់ពីបានឡើងសង្វៀនជាថ្មីដោយបានផ្តួលជើងខ្លាំងថៃនៅទឹកទី៥កាលពីសប្តាហ៍មុននៅសង្វៀនអាស៊ីអាគ្នេយ៍។

កីឡាករ ប៉ឺត ខាំ

អ្នកប្រដាល់មុខស្រស់ បឹត ខាំ បានឲ្យដឹងថា ត្រឡប់មកកម្ពុជាវិញលើកនេះ ពីព្រោះចង់ឲ្យខ្លួនល្បីកាន់តែខ្លាំងជាងមុន ទោះជាពេល នេះមានអ្នកគាំទ្រខ្លះថាកម្រិតក្បាច់គុនរបស់ខ្លួនថយចុះយ៉ាងណាក៏ដោយ។ ប្រសិនបើរូបគេមិនចង់ល្បីទេ រូបគេនឹងមិនត្រឡប់មកពីប្រទេសជប៉ុនឡើយ។

បឹត ខាំ បាននិយាយថា ៖«បើមិនចង់ល្បីទេ ខ្ញុំមិនមកកម្ពុជាវិញទេ។ ខ្ញុំនៅដេកស៊ីប្រាក់ខែនៅជប៉ុនវិញ ខ្ញុំមិនមកប្រកួតទាំងមិនទាន់ជាពីរបួសជើង ស្រួលបួលផង។ ម្យ៉ាងទៀតទោះខានប្រកួត៣ឆ្នាំ ក៏ខ្ញុំតាំងចិត្តធ្វើឲ្យល្បីជាងមុនដែរ»។

អ្នកប្រដាល់ដើមកំណើតបាត់ដំបងរូបនេះបានបន្តថា ពេលនេះទាំងជើង និងដៃនៅមិនទាន់ប្រើបានល្អដូចពីមុនទេ ព្រោះតែខានប្រកួតយូរ។ ទោះជាយ៉ាងណាលោកបញ្ជាក់ថា អាចល្បីដូចពីមុនឬលើសមុន អាស្រ័យលើអ្នកគាំទ្រលើកទឹកចិត្ត ហើយរូបគេផ្ទាល់ក៏ត្រូវប្រឹងប្រែងហ្វឹកហាត់ដែរ។

កីឡាករប្រដាល់ដែលផ្លាស់មករស់នៅកំពុងឆ្នាំងរូបនេះបានបន្ថែមថា ការចង់ល្បីនេះគឺមិនចង់ល្បីដោយសារប្រកួតជាមួយកីឡាករកម្ពុជាដែរ បើទោះស្ថិតក្នុងកាលៈទេសៈបែបណាក៏ដោយ ក៏មិនប្រកួតជាមួយកីឡាករកម្ពុជាឡើយ។ ការមិនប្រកួតជាមួយកីឡាករកម្ពុជាមិនមែនមកពីបញ្ហាអ្នកណាខ្លាំងជាងអ្នកណានោះទេ ឬក៏ខ្លាចកីឡាករកម្ពុជាទេ ប៉ុន្តែមកពីកីឡាករកម្ពុជារូបនេះចង់ឈរឈ្មោះជាកីឡាករដែលប្រកួតជាមួយបរទេសតំណាងឲ្យខ្មែរដោយតាំងនាមជាកីឡាករកម្ពុជាយកក្បាច់គុនខ្មែរបង្អួតឲ្យពិភពលោកបានដឹងពីកម្រិតក្បាច់គុនប្រដាល់សេរីខ្មែរ។

បឹត ខាំ បន្ថែមថា កាលពីពីរបីថ្ងៃមុនមានអ្នករៀបចំកម្មវិធីប្រដាល់ម្នាក់បានទូរសព្ទមកសួរចង់ឲ្យរូបគេប្រកួតជាមួយ វង្ស ណយ ប៉ុន្តែរូបគេបដិសេធ។

បឹត ខាំ បានត្រឡប់មកពីប្រទេសជប៉ុន កាលពីថ្ងៃទី ២០ ខែ មេសា ឆ្នាំ ២០១៥ បន្ទាប់ពីបានទៅបង្ហាត់ប្រដាល់នៅទីនោះអស់រយៈពេលជាច្រើនខែ។ ក្រោយមកដល់កម្ពុជា រូបគេបានឡើងប្រកួតជាមួយកីឡាករប្រដាល់ថៃនៅសង្វៀនអាស៊ីអាគ្នេយ៍ដោយវាយឲ្យលោកអាជ្ញាកណ្តាលបញ្ឈប់ក្នុងទឹកទី៥៕

វីដេអូកីឡាករ ប៉ឺត ខាំ ប្រកួតសប្តាហ៍មុននៅសង្វៀនអាស៊ីអាគ្នេយ៍៖