- 2024-10-09 05:14:34
- ប្រដាល់
អ្នកលេងគុនខ្មែរមកពីកំពង់ឆ្នាំង ខាត់ ទិត្យ ប្ដេជ្ញាយកឈ្នះដៃគូឲ្យបានដើម្បីស្ដារកេរ្តិ៍មកវិញក្រោយចាញ់៣ប្រកួតផ្ទួនៗ
- 2024-10-09 05:14:34
- ចំនួនមតិ 0 | ចំនួនចែករំលែក 0
អ្នកលេងគុនខ្មែរមកពីកំពង់ឆ្នាំង ខាត់ ទិត្យ ប្ដេជ្ញាយកឈ្នះដៃគូឲ្យបានដើម្បីស្ដារកេរ្តិ៍មកវិញក្រោយចាញ់៣ប្រកួតផ្ទួនៗ
ចន្លោះមិនឃើញ
អ្នកលេងគុនខ្មែរចាស់វស្សា និងផ្អាកពីសង្វៀនជាច្រើនឆ្នាំ ខាត់ ទិត្យ ដាក់ការប្ដេជ្ញាចិត្តខ្ពស់ដណ្ដើមយកជ័យជម្នះលើដៃគូដែលត្រូវប្រកួតនៅថ្ងៃសុក្រ ទី១១ ខែតុលា ឆ្នាំ២០២៤ នេះដើម្បីស្ដារមុខមាត់ឡើងវិញបន្ទាប់ពីចាញ់៣ប្រកួតផ្ទួនៗកន្លងទៅនេះ។
កីឡាករ ខាត់ ទិត្យ បានឲ្យដឹងថា រូបគេឈប់ពីវិស័យប្រដាល់តាំងពីឆ្នាំ២០១៨ មកម្ល៉េះទើបតែវិលមកកាន់ការប្រកួតវិញរយៈពេលខ្ទង់៣ខែប៉ុណ្ណោះ។ យ៉ាងណា ៣ប្រកួតដែលទើបចាប់ផ្ដើមឡើងវិញនេះគឺមិនសមប្រកបឡើយពោលចាញ់ទាំងអស់ និងធ្វើឲ្យខ្លួនមិនសូវសប្បាយចិត្តឡើយ។
អតីតកូនសិស្សលោក ឯម ចាន់សុផល រូបនេះបន្ថែមទៀតថា ដោយសាររាងកាយស្ពឹកស្រពោន កម្លាំងធ្លាក់ចុះ ការសម្រក់ទម្ងន់ច្រើន និងខានហ្វឹកហាត់យូរទើបធ្វើឲ្យគេឡើងប្រកួតជាថ្មីនេះមិនអាចទទួលបានជ័យជម្នះ។ ប៉ុន្តែសម្រាប់ប្រកួតទី៤ ថ្ងៃសុក្រនេះ ខាត់ ទិត្យ បានប្ដេជ្ញាចិត្តថានឹងដណ្ដើមយកជ័យជម្នះឲ្យបានដើម្បីស្ដារកេរ្តិ៍ឈ្មោះឡើងវិញចំពោះខ្លួនឯងផង និងក្លឹបផ្ទាល់ផង។
បញ្ជាក់ដែរថា ខាត់ ទិត្យ ជាកីឡាករចាស់វស្សាមួយរូបនៅកម្ពុជា។ រូបគេចាប់ផ្ដើមអាជីពប្រដាល់នេះតាំងពីឆ្នាំ ២០១៤ មកម្ល៉េះដោយកាលនោះហ្វឹកហាត់ជាមួយលោក ឯម ចាន់សុផល នៃក្លឹបប្រដាល់និរោធមានជ័យ។ បច្ចុប្បន្ននេះរូបគេទើបតែវិលចូលប្រកួតប្រដាល់គុនខ្មែរខ្ទង់ ៣ខែនៅក្លឹបប្រដាល់គុនខ្មែរអន្តរជាតិ (KKIF) របស់ឧកញ៉ា ស្រី ចាន់ថន។ ថ្ងៃសុក្រ ទី១១ ខែតុលា ឆ្នាំ២០២៤ នេះរូបគេនឹងប្រកួតនៅសង្វៀន CTN ជាមួយកីឡាករ សឹង្ហ ឡេង លើប្រភេទទម្ងន់ ៥៧គីឡូក្រាម៕
