- 2024-10-07 03:51:47
- ប្រដាល់
ជុន កក្កដា៖ លើកម្រាម ១០ អរគុណ និងដឹងគុណបំផុតដល់ទូរទស្សន៍បាយ័នតែងតែផ្តល់ឱកាសជាបន្តបន្ទាប់
- 2024-10-07 03:51:47
- ចំនួនមតិ 0 | ចំនួនចែករំលែក 0
ជុន កក្កដា៖ លើកម្រាម ១០ អរគុណ និងដឹងគុណបំផុតដល់ទូរទស្សន៍បាយ័នតែងតែផ្តល់ឱកាសជាបន្តបន្ទាប់
ចន្លោះមិនឃើញ
អ្នកលេងគុនខ្មែរ ជុន កក្កដា ឱកាសឡើងសង្វៀនជាបន្តបន្ទាប់ លេងពាន និងខ្សែក្រវាត់ខារ៉ាប៉ាវ លើកនេះទៀតរូបគេមិនភ្លេចគុណស្ថានីយទូរទស្សន៍បាយ័នឡើយ និងប្ដេជ្ញាប្រឹងប្រែងហ្វឹកហាត់ ប្រកួតឲ្យល្អជាការតបស្នងជូនស្ថានីយវិញ។
កីឡាករ ជុន កក្កដា បានឲ្យដឹងកាលពីម្សិលមិញនេះថា រូបគេទើបចូលប្រឡូកក្នុងវិស័យប្រដាល់គុនខ្មែររយៈពេលខ្ទង់៣ឆ្នាំនោះទេ។ យ៉ាងណាទាំងពេលវេលា និងបទពិសោធហាក់នៅខ្ចី ប៉ុន្តែខាងស្ថានីយទូរទស្សន៍បាយ័នតែងតែផ្ដល់ឱកាសដល់ខ្លួនលេងពានរង្វាន់ ប្រកួតអន្តរជាតិ និងលេងខ្សែក្រវាត់ជាលើកទី២ ថែមទៀតផង។
បេក្ខភាពខ្សែក្រវាត់ខារ៉ាប៉ាវរូបនេះលើកម្រាមដៃ ១០ ថ្លែងអំណរគុណដល់ខាងស្ថានីយចំពោះគុណបំណាច់មួយនេះហើយប្ដេជ្ញាថានឹងខំប្រឹងប្រែងហ្វឹកហាត់ និងប្រកួតឲ្យបានល្អអស់ពីសមត្ថភាពពិសេសការប្រកួតខ្សែក្រវាត់រដូវកាលទី១២ នេះដើម្បីបង្ហាញពីការដឹងគុណ និងជាការតបស្នង។
ចំណែកលោក នាង ស៊ីវុត្ថា អ្នកគ្រប់គ្រងផ្នែកប្រដាល់នៅសង្វៀនបាយ័ន លើកឡើងក្នុងសន្និសីទសារព័ត៌មានកាលពីម្សិលមិញនេះថា បាយ័នជាថ្នាលបណ្ដុះធនធានគុនខ្មែរជាច្រើនមកហើយឲ្យល្បីមានកេរ្តិ៍ឈ្មោះប្រចាំប្រទេស និងនៅតែបន្តផ្ដល់ឱកាសដល់កីឡាករថ្មីៗបានឡើងប្រកួតពង្រឹងសមត្ថភាពសន្សំបទពិសោធ។ ប៉ុន្តែកីឡាករខ្លួនឯងក៏ត្រូវខំប្រឹងប្រែងផងដែរលើការហ្វឹកហាត់ និងគោរពវិន័យ។
បញ្ជាក់ដែរថា ស្ថានីយទូរទស្សន៍បាយ័ន កាលពីម្សិលមិញនេះបានធ្វើសន្និសីទសារព័ត៌មាន និងបើកការប្រកួតដណ្ដើមខ្សែក្រវាត់ខារ៉ាប៉ាវ រដូវកាលទី១២ សប្ដាហ៍ទី១ ហើយលើប្រភេទទម្ងន់ ៦៣,៥គីឡូក្រាម។ កីឡាករជើងថ្មីមកពីក្លឹបកងពលតូចដឹកជញ្ជូនលេខ៩០ ជុន កក្កដា ក៏ជាបេក្ខភាពខ្មែរមួយរូបផងដែរក្នុងការប្រជែងខ្សែក្រវាត់ខារ៉ាប៉ាវនេះ៕
