Vinicius ជាកីឡាករប្រេស៊ីលដែលមានតម្លៃខ្លួនខ្ពស់ជាងគេបំផុត

2024-03-29 12:35:16
បាល់ទាត់

2024-03-29 12:35:16
ចំនួនមតិ 0 | ចំនួនចែករំលែក 0

ចន្លោះមិនឃើញ

ខ្សែប្រយុទ្ធ Vinicius Jr ជាកីឡាករប្រេស៊ីលដែលមានតម្លៃខ្លួនខ្ពស់ជាងគេបំផុតនៅក្នុងពេលនេះ បន្ទាប់ពីទីផ្សារកីឡាករត្រូវបានធ្វើបច្ចុប្បន្នភាពកាលពីពេលថ្មីៗនេះ ខណៈទើបមានវ័យ២៣ឆ្នាំប៉ុណ្ណោះកីឡាកររូបនេះមានតម្លៃខ្លួនប្រមាណរហូតទៅដល់ ១៥០លានអ៊ឺរ៉ូ ។

នៅក្នុងវ័យប្រហាក់ប្រហែល ឬក៏ក្រោមនឹង Vinicius នេះមិនមានច្រើនកីឡាករច្រើនរូបនោះទេ ដែលអាចមានតម្លៃខ្លួនរហូតទៅដល់រាប់រយលានដូចគេបែបនេះ ដែលនេះបានបង្ហាញឲ្យឃើញយ៉ាងច្បាស់ពីសមត្ថភាពរបស់ខ្សែប្រយុទ្ធរូបនេះ ដោយគេស័ក្ដិសមនឹងទទួលឈ្មោះជាកីឡាករឆ្នើមវ័យក្មេងបំផុតរបស់ Real Madrid។

អ្នកដែលមានវ័យក្បែរ Vinicius ហើយមានតម្លៃខ្លួនលើសពី ១០០លានអ៊ឺរ៉ូក្រោយធ្វើបច្ចុប្បន្នភាពតម្លៃខ្លួនកីឡាករកាលពីពេលថ្មីៗនេះគឺ ខ្សែប្រយុទ្ធ Rodrygo ដែលមកពីក្លឹប Real Madrid និងជាសញ្ជាតិប្រេស៊ីលដូចជាតែមានតម្លៃខ្លួនត្រឹម ១០០លានអ៊ឺរ៉ូប៉ុណ្ណោះក្នុងពេលនេះ។

នេះមិនមែនជាលើកទីមួយនោះទេដែលខ្សែប្រយុទ្ធសញ្ជាតិប្រេស៊ីល Vinicius រូបនេះបានគ្រងតំណែងជាកីឡាករវ័យក្មេងដែលមានតម្លៃខ្លួនខ្ពស់បំផុតបែបនេះដោយជិត២ឆ្នាំមកនេះគេជាប់ក្នុងលំដាប់តារាងនេះរហូតមក។

នេះបញ្ជាក់ឲ្យឃើញថាកីឡាកររូបនេះពិតជាខ្សែប្រយុទ្ធឆ្នើមប្រចាំក្លឹប Real Madrid ពិតមែនដោយនៅរដូវកាលនេះចូលលេងបាន២៨ប្រកួត និងស៊ុតចូលបាន ១៨គ្រាប់។

យ៉ាងណាងាកមកមើលពីដំណើរជីវិតបាល់ទាត់របស់គេពីដើមមកទល់នឹងសព្វថ្ងៃនេះវិញ Vinicius បានចាប់អាជីពបាល់ទាត់តាំងពីវ័យក្មេងមកដោយចូលលេងឲ្យក្រុមថ្នាល Flamengo ពីឆ្នាំ២០០៥-២០១៧ ហើយក៏ផ្លាស់មកក្រុមឈុតនៅក្លឹបនេះពីឆ្នាំ២០១៧-២០១៨ ដោយចូលលេងបាន ៦៩ប្រកួត និងស៊ុតចូល ១០គ្រាប់។

បន្ទាប់មកគេក៏ផ្លាស់មកកាន់ Real Madrid Castilla ដោយចូលលេងមិនបានប៉ុន្មានក៏បានផ្លាស់មកកាន់ Real Madrid ក្រុមឈុតធំនៅក្នុងរដូវកាលឆ្នាំ២០១៨-២០១៩។ នៅពេលផ្លាស់មកកាន់ក្លឹប Real Madrid ២-៣រដូវកាលដំបូងៗ កីឡាករនេះមិនអាចរកគ្រាប់បាល់បានច្រើននោះទេ ប៉ុន្តែគេចាប់ផ្ដើមឡើងជើងចាប់ពីរដូវកាលឆ្នាំ២០២១-២២ រហូតមកដែលធ្វើឲ្យក្លឹប និងអ្នកគាំទ្រជឿជាក់ និងគាំទ្រលើសមត្ថភាពរបស់គេ។

ចាប់តាំងពីលេងឲ្យក្លឹប Real Madrid មក Vinicius ចូលលេងបាន ២៥៣ប្រកួត និងស៊ុតចូល ៧៧គ្រាប់។ កីឡាករនេះឈ្នះពានជាក្លឹបអធិរាជស Real Madrid នេះដូចជាពាន UEFA Champions League, FIFA Club World Cup, Spanish Champion, UEFA Super Cup, Spanish Cup និង Spanish Super Cup។

ក្លឹប ក៏ដូចជាកីឡាកររូបនេះផ្ទាល់ខ្លួនបានបង្ហាញចំណាប់អារម្មណ៍នឹងនៅបន្តលេងឲ្យក្លឹប Real Madrid យូរដោយកីឡាករនេះចង់បណ្ដុះសមត្ថភាពឲ្យកាន់តែប្រសើរជាងនេះទៀតសម្រាប់ខ្លួននៅពេលអនាគត៕

ប្រភព៖ transfermarkt អត្ថបទ៖ សេរី មង្គល