MC Vutha បង្ហាញការសប្បាយចិត្តជាខ្លាំងក្នុងនាមកូនខ្មែរម្នាក់បានចូលរួមលើកស្ទួយគុនខ្មែរឲ្យល្បីរន្ទឺ

2023-12-21 10:29:10
ប្រដាល់

2023-12-21 10:29:10
ចំនួនមតិ 0 | ចំនួនចែករំលែក 0

ចន្លោះមិនឃើញ

លោក ជួប វុត្ថា ឬគេស្គាល់ថា MC Vutha បង្ហាញការសប្បាយរីករាយជាខ្លាំងដែលក្នុងនាមជាកូនខ្មែរមួយរូបបានចូលរួមផ្សព្វផ្សាយ និងលើកស្ទួយវិស័យប្រដាល់គុនខ្មែរឲ្យល្បីរន្ទឺទាំងឆាកជាតិ និងអន្តរជាតិកន្លងទៅជាមួយ TOWN។

លោក ជួប វុត្ថា

លោក ជួប វុត្ថា ឲ្យដឹងថា ការប្រឡូកក្នុងវិស័យប្រដាល់ និងការអធិប្បាយជាមួយកីឡាមួយនេះមិនក្រោម ៥ឆ្នាំនោះទេគិតមកដល់ពេលនេះ។ តាមរយៈការអធិប្បាយជូនប្រិយមិត្តទស្សនា និងការផ្សព្វផ្សាយគុនខ្មែរគឺពិតជារួមចំណែកលើកស្ទួយវិស័យប្រដាល់ដែលជាកេរ្តិ៍មរតកដូនតាឲ្យមានភាពល្បីល្បាញពីមួយកម្រិតទៅមួយកម្រិតរហូតដល់បរទេស ឬពិភពលោកស្គាល់គុនខ្មែរ។

លោក ជួប វុត្ថា (ខាងឆ្វេង)

ជាការជំរុញមួយផ្នែកបន្ថែមពីអាជីពពិធីករហើយនោះ MC ដែលមានថ្វីមាត់ខាងលើក៏ជាផលិតករ និងជាអ្នកផ្គូផ្គងកីឡាករមួយរូបនៅសង្វៀន TOWN ផងដែរ។ សកម្មភាពទាំងនេះហើយលោកពិតជាសប្បាយរីករាយក្នុងនាមកូនខ្មែរមួយរូបបានតបស្នងសងគុណដល់បុព្វបុរសដែលបានបន្សល់នូវកេរ្តិ៍មរតកក្បាច់មួយនេះដល់អ្នកជំនាន់ក្រោយ។

លោក ជួប វុត្ថា និង ធារ៉ា

ពិធីករមានដើមកំណើតពីខេត្តកណ្ដាលរូបនេះបន្ថែមទៀតថា ដើម្បីឲ្យគុនខ្មែរល្បីល្បាញបន្ថែមទៀតគឺមហាជនត្រូវរួមគ្នាធ្វើ រួមគ្នាគិត និងរួមគ្នាផ្សព្វផ្សាយបន្តទៀត។ ជួយគ្នាបង្ហាញនូវអ្វីដែលខ្មែរមានដូចជាតឹកតាងចម្លាក់លើប្រាសាទនានាឲ្យបរទេសដឹងកាន់តែច្បាស់។ ជាមួយគ្នានេះដែរលោកក៏មានមហិច្ឆតាជំរុញគុនខ្មែរឲ្យពិភពលោកស្គាល់ច្បាស់ថាក្បាច់គុននេះជារបស់ខ្មែរពិតប្រាកដ និងចង់ឲ្យទង់ជាតិខ្មែរបក់ក្នុងកម្មវិធីធំៗលើពិភពលោកផងដែរ។

លោក ជួប វុត្ថា (ខាងឆ្វេង)

រំលឹកដែរថា លោក ជួប វុត្ថា ឬ MC Vutha ជាពិធីករប្រដាល់នៅសង្វៀន TOWN និងជាអ្នកផ្គូផ្គងប្រដាល់មួយរូបផងដែរនាពេលបច្ចុប្បន្ននេះ។ លោកតែងតែបង្ហាញមុខក្នុងកម្មវិធីប្រដាល់ធំៗរបស់សង្វៀន TOWN ដូចជាព្រឹត្តិការណ៍ ព្រំ សំណាង ប៉ះ ដាវ លីឌុច និងការប្រកួតតាមបណ្ដាខេត្តនាពេលកន្លងទៅ។ មិនត្រឹមតែប៉ុណ្ណឹងលោកជាពិធីករដែលមានប្រជាប្រិយមួយរូបខាងផ្នែកប្រដាល់នេះនៅកម្ពុជាផងដែរ៕

អត្ថបទ៖ នួន ស៊ីណា