អនុប្រធានសហព័ន្ធកីឡាហាប់គីដូ៖ការប្រកួតជើងឯកថ្នាក់ជាតិជាការលើកទឹកចិត្តអ្នកកំពុងហ្វឹកហាត់

2023-12-14 05:34:51
កីឡាផ្សេងៗ

2023-12-14 05:34:51
ចំនួនមតិ 0 | ចំនួនចែករំលែក 0

ចន្លោះមិនឃើញ

អនុប្រធានសហព័ន្ធខ្មែរកីឡាហាប់គីដូ ថាការប្រកួតជើងឯកថ្នាក់ជាតិ លើកទី១ នៅចុងខែធ្នូ ឆ្នាំ២០២៣ នេះជាការលើកទឹកចិត្តមួយដ៏សំខាន់សម្រាប់សិស្សគុនហាប់គីដូដែលកំពុងហ្វឹកហាត់នាពេលបច្ចុប្បន្ន។

លោកឧកញ៉ា គួច ហុកជៀក

លោកឧកញ៉ា គួច ហុកជៀក អនុប្រធានសហព័ន្ធខាងលើនេះបានឲ្យដឹងថា ការប្រកួតជើងឯកថ្នាក់ជាតិ ឆ្នាំ២០២៣ និងជាលើកទី១ នេះជាអ្វីដែលសហព័ន្ធជំរុញធ្វើសកម្មភាព និងជាផែនការពង្រីកផ្សព្វផ្សាយដល់មហាជន។

ទិដ្ឋភាពប្រជុំរបស់សហព័ន្ធហាប់គីដូ

អនុប្រធាន និងជាអ្នកផ្ដួចផ្ដើមមួយរូបខាងលើបន្ថែមទៀតថា ជាយូរឆ្នាំមកហើយសហព័ន្ធមិនដែលបានរៀបចំការប្រកួតបែបនេះទេ ដូច្នេះឱកាសនេះជាការលើកទឹកចិត្តដ៏ល្អសម្រាប់សិស្សគុនហាប់គីដូដែលកំពុងហ្វឹកហាត់។ ព្រឹត្តិការណ៍មួយនេះនឹងជំរុញទឹកចិត្តពួកគេឲ្យស្រឡាញ់ហាប់គីដូបន្ថែម និងប្រឹងប្រែងបន្តទៀត។ ការហ្វឹកហាត់កីឡាអាចនិយាយបានថាក៏មានការលំបាកដែរ ដូច្នេះការលើកទឹកចិត្ត លើកពីគុណតម្លៃដល់អ្នកហ្វឹកហាត់ជាការចាំបាច់។

សកម្មភាពហ្វឹកហាត់

បញ្ជាក់ដែរថា ការប្រកួតជើងឯកថ្នាក់ជាតិ លើកទី១ របស់សហព័ន្ធខ្មែរកីឡាហាប់គីដូនេះធ្វើឡើងនៅថ្ងៃទី២៣-២៤ ខែធ្នូ ២០២៣ ក្នុងពហុកីឡដ្ឋានជាតិ។ ក្លឹបចូលរួមមានចំនួន៥ នឹងត្រូវប្រកួតលើ៥វិញ្ញាសា។ សម្រាប់អ្នកចង់ចូលរួមឧបត្ថម្ភដល់ការប្រកួតនេះអាចទំនាក់ទំនងមកកាន់លោក គង់ ចាន់ធីណា បានតាមរយៈលេខទូរស័ព្ទ 012 715 415៕