- 2023-10-23 05:51:46
- ប្រដាល់
សង្វៀនបាយ័ន ចាប់ផ្ដើមខ្សែក្រវាត់ខារ៉ាបាវរដូវកាលទី១០ ខណៈចំណងមិត្តភាពជាមួយក្រុមហ៊ុនមានជាង១០ឆ្នាំហើយ
- 2023-10-23 05:51:46
- ចំនួនមតិ 0 | ចំនួនចែករំលែក 0
សង្វៀនបាយ័ន ចាប់ផ្ដើមខ្សែក្រវាត់ខារ៉ាបាវរដូវកាលទី១០ ខណៈចំណងមិត្តភាពជាមួយក្រុមហ៊ុនមានជាង១០ឆ្នាំហើយ
ចន្លោះមិនឃើញ
សង្វៀនប្រដាល់បាយ័ន បានប្រកាសបើកការប្រកួតដណ្ដើមខ្សែក្រវាត់ខារ៉ាបាវ រដូវកាលទី១០ របស់ខ្លួនហើយកាលពីយប់មិញនេះ ខណៈកិច្ចសហការជាមួយម្ចាស់ឧបត្ថម្ភមួយនេះមានរយៈពេល ១០ឆ្នាំមកហើយក្នុងការលើកស្ទួយវិស័យគុនខ្មែរ។
លោក នាង ស៊ីវុត្ថា ប្រធានគ្រប់គ្រងប្រដាល់សង្វៀនបាយ័ន បានឲ្យដឹងថា បើគិតមកដល់ពេលនេះបាយ័ន និងខារ៉ាបាវបានសហការបង្កើតឲ្យមានជាការប្រកួត ឬដណ្ដើមខ្សែក្រវាត់ជាមួយគ្នារយៈពេលជាង ៤០០សប្ដាហ៍ខ្ទង់ជាង ១០ឆ្នាំហើយ។ ក្នុងនោះមានម្ចាស់ខ្សែក្រវាត់ខ្លះក៏បានចូលនិវត្តន៍ និងខ្លះទៀតធ្វើជាគ្រូ ចៅក្រមប្រដាល់ទៅហើយ។
ប្រធានគ្រប់គ្រងប្រដាល់បាយ័នរូបនេះបន្ថែមទៀតថា រយៈពេលដ៏យូរនេះស្ថានីយរួមនិងម្ចាស់ឧបត្ថម្ភបានជួយបណ្ដុះធនធាន និងលើកស្ទួយកីឡាករឲ្យមានកេរ្តិ៍ឈ្មោះល្បីជាច្រើនរូប។ ពិសេសក្រោយកូវីដនេះកីឡាករខ្លះឡើងដល់កំពូលល្បីពេញប្រទេស និងក្លឹបខ្លះទៀតទទួលបានខ្សែក្រវាត់ជាបន្តបន្ទាប់។ ទាំងនេះគឺបានមកពីការផ្ដល់ឱកាសរបស់ស្ថានីយ និងម្ចាស់ឧបត្ថម្ភ។
លោកថ្លែងអំណរគុណអ្នកគាំទ្រដែលតែងតែចូលទស្សនាផ្ទាល់ពេញៗ និងទស្សនាតាមការឡាយមានចំនួនច្រើនជាបន្តបន្ទាប់នេះហើយជាកម្លាំងចិត្ត និងជាការរួមចំណែកលើកស្ទួយប្រដាល់គុនខ្មែររបស់មហាជនជាមួយខាងស្ថានីយ។ សូមបន្តគាំទ្រដល់បាយ័នដើម្បីបន្តដំណើរការប្រកួតពិសេសខ្សែក្រវាត់រដូវកាលទី១០ នេះរឹតតែទទួលភាពជោគជ័យ។
បញ្ជាក់ដែរថា ការប្រកួតខ្សែក្រវាត់ខារ៉ាបាវរដូវកាលទី១០ នេះគឺចាប់ផ្ដើមហើយកាលពីយប់មិញនេះ។ បេក្ខភាពគឺមានកម្ពុជា ៤រូប និងថៃ ៤រូបដែលត្រូវប្រកួតសន្សំពិន្ទុដើម្បីឈានទៅវគ្គបន្ត។ កម្ពុជា៤រូបរួមមាន អេលីត សម្ផស្ស ធន់ ចាន់តាក់ ឡុង ប៉េងលឿន និង នូវ ដារ៉ូ។ បើកឆាកសប្ដាហ៍ទី១ យប់មិញគឺ ធន់ ចាន់តាក់ និង សម្ផស្ស ឈ្នះដៃគូដូចគ្នាទទួលបាន៣ពិន្ទុ៕
