• 2023-01-04 08:05:56
  • ប្រដាល់

សហព័ន្ធ​គុន​ខ្មែរ៖​ រឿង​ក្របខ័ណ្ឌ​ ធឿន​ ធារ៉ា​ កុំ​និយាយ​ថា​គេ​មិន​ជួយ​មក​ពី​ខ្លួន​ឯង​ និង​ក្លឹប​ទេ​មិន​ព្រម​

  • 2023-01-04 08:05:56
  • ចំនួនមតិ 0 | ចំនួនចែករំលែក 0

ចន្លោះមិនឃើញ

អគ្គលេខាធិការ​សហព័ន្ធ​ប្រដាល់​គុន​ខ្មែរ​ បាន​បកស្រាយ​ចំៗ​រឿង​ថា​ សហព័ន្ធ​មិន​បាន​ជួយ​អ្វី​ដល់​កីឡាករ​ ធឿន​ ធារ៉ា​ ពិសេស​ក្របខ័ណ្ឌ​រដ្ឋ​ណា​មួយ​នោះ​មិន​ពិត​ទេ​ ពោល​ការ​ចង់​ជួយ​ ការ​សម្របសម្រួល​ឲ្យ​ចូល​កីឡាករ​ជម្រើស​ជាតិ​ ឬ​ក្របខ័ណ្ឌ​នេះ​តាំង​ពី​ឆ្នាំ​២០១៧​ មក​ម្ល៉េះ។​

រូបភាពហ្វេសបុកលោក អេ ភូថង

ឯកឧត្ដម​ ហេង​ សុឃន​ អគ្គលេខាធិការ​សហព័ន្ធ​គុន​ខ្មែរ​បាន​ឲ្យ​ដឹង​ថា​ ចំពោះ​ជ័យជម្នះ​របស់​កីឡាករ​ ការ​ចេញ​ទៅ​ប្រកួត​នៅ​ក្រៅ​ប្រទេស​នានា​ គឺ​សហព័ន្ធ​តែងតែ​មាន​ការ​គាំទ្រ​ និង​មាន​ការ​យោគយល់​ច្រើន។​ ប៉ុន្តែ​បើការ​ត្រៀម​ខ្លួន​ ឬ​ការហ្វឹកហាត់​មិន​បាន​ល្អ ​គឺ​សហព័ន្ធ​មិន​គាំទ្រ​ចំពោះ​ការ​ចេញ​ទៅ​នោះ​ឡើយ។​

ចំពោះ​ការ​ទទូច​ ឬ​ការ​ស្នើសុំ​របស់​មហាជន​អំពី​ការ​ជួយ​ឲ្យ​បាន​ក្របខ័ណ្ឌ​រដ្ឋ​ដល់​ ធឿន​ ធារ៉ា​ នោះ​ឯកឧត្ដម​ ហេង​ សុឃន​ បាន​បញ្ជាក់​ថា​ សហព័ន្ធ​បាន​ជួប​កីឡាករ​ផ្ទាល់​តាំង​ពី​ឆ្នាំ​២០១៧​ អំឡុង​ការ​ប្រកួត​ជើងឯក​ថ្នាក់​ជាតិ​នៅ​ 7NG​ មក​ម្ល៉េះ​សុំ​ឲ្យ​ចូល​ជា​កីឡាករ​ជម្រើស​ជាតិ​ និង​ស្នើ​ដល់​ថ្នាក់​ដឹកនាំ​ផ្ដល់​ក្របខ័ណ្ឌ​ជូន​ ប៉ុន្តែ​សាមីខ្លួន​មិន​ទាន់​សម្រេច​ចិត្ត និង​រង់ចាំ​ពី​ប្រធាន​ក្លឹប ឬ​គ្រូ​សិន។​

ឯកឧត្ដម​ ហេង​ សុឃន​

បន្ទាប់​មក​ទៀត​សហព័ន្ធ​បាន​ជួប​ទាំង​ ធឿន​ ធារ៉ា​ និង​លោក​ អេភូថង​ រួម​ទាំង​ភរិយា​របស់​លោក​ជជែក​ និង​ស្នើសុំ​ឲ្យរូបគេចូល​ក្រុម​ជម្រើស​ជាតិ​ និង​សន្យា​ផ្ដល់​ជូន​ក្របខ័ណ្ឌ​ទៀត​ ប៉ុន្តែមិន​មាន​ការ​យល់​ព្រម​ពី​ក្លឹប​នោះ​ឡើយ។​ ឈាន​ដល់​ដើម​ឆ្នាំ​ ២០២២​ សហព័ន្ធ​បាន​ជួប​ចរចា​ជា​ថ្មី​ទៀត​ដើម្បី​យក​ ធឿន​ ធារ៉ា​ ចូល​ជម្រើស​ជាតិ​ និង​ស្នើសុំ​ផ្ដល់​ក្របខ័ណ្ឌ​ជា​ថ្មី​ ប៉ុន្តែ​នៅ​តែ​បរាជ័យ។​ ដែល​ការ​ទទួច​ចង់​ហៅ​ ធឿន​ ធារ៉ា​ មក​នេះ​ដោយ​សារ​តែ​ស្ដាយ​សមត្ថភាព​ ទេពកោសល​ និង​កាយសម្បទា​ ពិសេស​ប្រកួត​តំណាង​កម្ពុជា​នៅ​ស៊ីហ្គេម​ លើក​ទី៣២​ អំឡុង​ខែ​ឧសភា ខាង​មុខ។​

រូបភាពហ្វេសបុក Thai Fight

បើ​ទោះ​ជា​មិន​សម្រេច​ក្នុង​ការ​នាំ​យក​ ធឿន​ ធារ៉ា​ ចូល​ក្រុមជម្រើសជាតិ​ក្ដី​ សហព័ន្ធ​គុន​ខ្មែរ​នៅ​តែ​បើក​ភ្លើង​ខៀវ​ចំពោះ​រូប​គេ​ និង​ក្លឹប​ក្នុង​​ពេល​ឥឡូវនេះ​ផង​ដែរ​ដើម្បី​បាន​ប្រកួត​ដណ្ដើម​មេដាយ​ពេល​ស៊ីហ្គេម​ ប្រវត្តិសាស្ត្រ​របស់​កម្ពុជា​ ឆ្នាំ​២០២៣​ នេះ ។​

រូបភាពហ្វេសបុក Thai Fight

រំលឹក​ដែរ​ថា​ ព្រឹកមិញ​នេះ​សហព័ន្ធ​ប្រដាល់​គុន​ខ្មែរ​បាន​ធ្វើ​សន្និសិត​សារព័ត៌មាន​មួយ​នៅ​ស្តាត​ចាស់​ បង្ហាញ​ពី​សមិទិផល​ដែល​សហព័ន្ធ​ទទួល​បាន​នា​ពេល​ថ្មីៗ​នេះ​។​ ជា​មួយ​គ្នា​នេះ​ដែរ​សហព័ន្ធ​ក៏​បាន​បកស្រាយ​ឆ្លើយ​តប​ចំពោះ​រឿង​ ធឿន​ ធារ៉ា​ ដែល​អ្នក​គាំទ្រ​ចង់​ឲ្យ​បាន​ក្របខ័ណ្ឌ​ ឬ​ការ​អើពើ​ណា​មួយ​ពី​សហព័ន្ធដល់រូបគេ​ផង​ដែរ។​ កាល​ពី​ថ្ងៃ​ទី២៤​ ខែ​ធ្នូ​ ឆ្នាំ​២០២២​ ថ្មីៗ​នេះ​ ធឿន​ ធារ៉ា​ បាន​ប្រកួត​ឈ្នះ​ខ្សែក្រវាត់​ Thai Fight​ ១គ្រឿង​ បន្ទាប់​ពី​គ្រូ​ពេទ្យ​បញ្ឈប់​ការ​ប្រកួត​ត្រឹម​១​ ដោយ​សារ​កីឡាករ​ថៃ​ សៃយុគ​ របួស​បែក​ធំ​ពេក៕​

អត្ថបទ៖ នួន ស៊ីណា​

មតិយោបល់