កីឡាករខ្មែរលើកពានក្នុងការប្រកួតទល់នឹងកីឡាករថៃនៅសង្វៀន "Krud គុនខ្មែរ" របស់ទូរទស្សន៍ជាតិ

2022-12-05 11:01:44
ប្រដាល់

2022-12-05 11:01:44
ចំនួនមតិ 0 | ចំនួនចែករំលែក 0

ចន្លោះមិនឃើញ

កីឡាករខ្មែរ ៤ រូប បានលើកពានមិត្តភាព នៅក្នុងការប្រកួតទល់នឹងកីឡាករមកពីប្រទេសថៃ៤រូបដែរ នៅថ្ងៃដំណើរការសង្វៀនថ្មីដំបូងរបស់ស្ថានីយទូរទស្សន៍ជាតិកម្ពុជា(ទទក) កាលពីចុងសប្ដាហ៍មុន។

កីឡាករកម្ពុជាទាំង ៤ មានកីឡាករ ប៊ុន សុធា ប៉ះជាមួយកីឡាករ ភេតថូ ឆឆាំពាន។ កីឡាករ ពេជ្រ ប៊ុនសិទ្ធ ប៉ះកីឡាករ យ៉មផុន គ្រូដានយីម កីឡាករ អេវិរៈ ខាំឈីត ភូថង(ម៉ឺន មេឃា) ប៉ះកីឡាករ ខៃវ៉ានថៃ គៀតឆ័ត្រឆៃ និងកីឡាករ អេ អាំម៉ារិន ភូថង ប៉ះកីឡាករ កៅ អេ។ ជាលទ្ធផលក្នុងមានតែកីឡាករ ពេជ្រ ប៊ុនសិទ្ធ ម្នាក់ប៉ុណ្ណោះ បានភ្លាត់ចាញ់ពិន្ទុកីឡាករថៃ។

ដោយឡែកកីឡាករកម្ពុជា ៣រូបទៀត គឺ ប៊ុន សុធា អេវិរៈ ខាំឈីត ភូថង និងកីឡាករ អេ អាំម៉ារិន ភូថង សុទ្ធតែធ្វើឲ្យដៃគូសន្លប់ និងបោះបង់ការប្រកួតមុនទឹកទី៥។ លទ្ធផលនេះ កីឡាករ កម្ពុជាបានលើកពានមិត្តភាពរបស់សង្វៀនប្រដាល់របស់ ទទក ដោយយោងលើលក្ខខណ្ឌដែលបានចែងរបស់កម្ពុជា។

រាប់ពីឆ្វេង៖ លោក ម៉ុល នី ប្រធានអ្នកផ្គូរផ្គងប្រចាំសង្វៀនប្រដាល់របស់ ទទក និងលោក នៅ លីដា ជាផលិតករកម្មវិធីប្រដាល់ "Krud គុនខ្មែរ" របស់ ទទក

លោក នៅ លីដា ជាផលិតករកម្មវិធីប្រដាល់ខាងលើថ្លែងថា "ពាននេះ ជាពានមិត្តភាព អត់មានប្រាក់រង្វាន់ទេ គឺជាពានសម្រាប់បើកកម្មវិធី តាមលក្ខខណ្ឌ ការប្រកួត ខ្មែរ៤ ទល់ ថៃ៤នេះ បើតាមលក្ខខណ្ឌ បើខាងណាឈ្នះ ចាប់ពី ៣ ទៅ នឹងលើកពាននេះ តែបើឈ្នះ ២ស្មើ គឺគិតទៅលើលក្ខខណ្ឌផ្សេងៗទៀត"។

នេះជាការប្រកួតបើកឆាករបស់សង្វៀនប្រដាល់ "Krud គុនខ្មែរ" របស់ស្ថានីយទូរទស្សន៍ជាតិកម្ពុជា ក្រោយពីបានធ្វើកិច្ចសហការជាមួយភេសជ្ជៈ Krud ថ្មីៗ។ តាមលោក ម៉ុល នី ប្រធានអ្នកផ្គូរផ្គងប្រចាំសង្វៀនប្រដាល់របស់ ទទក ប្រាប់ឲ្យដឹងថា ទទក និងភេសជ្ជៈ Krud បានធ្វើកិច្ចសហការជាមួយគ្នារយៈពេល ១ឆ្នាំ ២០២៣។

ទិសដៅ គឺលើកកម្ពស់ ក៏ដូចជាផ្ដល់ឱកាសកាន់តែច្រើនដល់កីឡាករក្នុងស្រុកបានប្រកួតដកស្រង់សមត្ថភាពទាំងលក្ខណៈជាតិ និងអន្តរជាតិ។ ដូច្នេះហើយ នៅថ្ងៃបើកឆាក កម្មវិធីបានអញ្ជើញកីឡាករថៃ សុទ្ធខ្លាំងៗ និងក្នុងចំណោមនោះ ខ្លះមិនសូវមានអ្នកស្គាល់មកប្រកួត ដើម្បីផ្ដល់ភាពខុសប្លែក ខណៈកន្លងមក ទស្សនិកជនខ្លះរអ៊ូថា កីឡាករមកប្រកួតនៅកម្ពុជា មុខដដែលៗ។

លោកថា នឹងព្យាយាមរកអ្នកខ្លាំង ប្លែកមុខបន្តបន្ទាប់ទៀត។ ជាមួយគ្នា លោកអះអាងទៀតថា សម្រាប់កីឡាករក្នុងស្រុក លោកនឹងបង្កឱកាសឲ្យកីឡាករគ្រប់រូប គ្រប់ក្លឹបមានឱកាសបានប្រកួតបញ្ចេញសមត្ថភាពនៅលើសង្វៀន "Krud គុនខ្មែរ" របស់ ទទក ទាំងអស់គ្នា នៅពេលខាងមុខជាបន្តបន្ទាប់៕

អត្ថបទ៖ ទារិកា