«WURKZ ប្រដាល់គុនខ្មែរប្រចាំប្រទេស» រកឃើញជើងខ្លាំង១២រូបត្រៀមប្រកួតតាមបណ្តាខេត្តឆាប់ៗនេះ

2022-03-18 04:49:21
ប្រដាល់

2022-03-18 04:49:21
ចំនួនមតិ 0 | ចំនួនចែករំលែក 0

ចន្លោះមិនឃើញ

ជើងខ្លាំងប្រដាល់គុនខ្មែរចំនួន១២រូប បានឈ្នះការប្រកួតជម្រុះកាលពីចុងសប្តាហ៍មុន និងត្រូវឈានជើងចូលរួមក្នុងព្រឹត្តិការណ៍ប្រដាល់គុនខ្មែរដ៏ធំមិនធ្លាប់មានពីមុនមកនៅកម្ពុជាឈ្មោះថា «WURKZ ប្រដាល់គុនខ្មែរប្រចាំប្រទេស» ដែល នឹងចាប់ផ្តើមក្នុងពេលឆាប់ៗខាងមុខនេះ។

បន្ទាប់ពីការប្រកួតយ៉ាងស្វិតស្វាញអស់រយៈពេលជាច្រើនម៉ោងនៅលើស្ថានីយទូរទស្សន៍ ថោន ហ្វូល អេចឌីធីវី (TOWN FULL HDTV) រួចមក ជើងខ្លាំងទម្ងន់ ៦៣.៥គីឡូក្រាម ចំនួន១២រូប នឹងត្រូវត្រៀមខ្លួនដើម្បីដណ្តើមខ្សែក្រវាត់ពិភពលោក IPCC និងប្រាក់លានសរុប ១២០លានរៀល។

ជើងខ្លាំងទាំងនេះរួមមាន៖

១) ម៉ន ព្រហ្មម៉ាញ មកពីក្លឹបកងចក្ររាជសី
២) កន ចន្ថា មកពីក្លឹបអភិរក្សគុនខ្មែររុងរឿង
៣) ចាន់ ប៊ុនហឿន មកពីក្លឹបថ្មគោលខណ្ឌពោធិ៍សែនជ័យ
៤) សោម ពិសិដ្ឋ មកពីក្លឹបអេភូថងកីឡា
៥) ខុន បូឡា មកពីក្លឹបនរាយតេជៈ
៦) រិន សារ័ត្ន មកពីក្លឹបកងទ័ពជើងទឹក
៧) ធន់ ចាន់តាក់ មកពីក្លឹបកងយោធពលខេមរភូមិន្ទ
៨) ឡុង បេនលឿន មកពីក្លឹបសាលវន្តកីឡា
៩) សួន ចាន់នី មកពីក្លឹបបក្សីស្លាបដែក
១០) សោម វិច្ឆ័យ មកពីក្លឹបវិបុលដារិទ្ធ
១១) អេលីត សុខហ៊ុច មកពីក្លឹបនាយកដ្ឋានអង្គរក្ស
១២) ផល សោភ័ណ្ឌ មកពីក្លឹបតាលីដំរីមានរិទ្ធ

ជើងខ្លាំងគុនខ្មែរទាំងនេះសុទ្ធតែជាកីឡាករល្បីៗដែលមានបទពិសោធប្រកួត ច្រើនដងដែលនឹង ធ្វើ ឲ្យកម្មវិធី «WURKZ ប្រដាល់គុនខ្មែរប្រចាំប្រទេស» កាន់តែទាក់ទាញ និងជក់ចិត្តជាខ្លាំង។ កីឡាករប្រដាល់ទាំង១២រូបនេះ នឹងត្រូវបែងចែកជា២ក្រុមផ្សេងគ្នា។ កីឡាករនីមួយៗនឹងធ្វើដំណើរទៅខេត្តកំពង់ស្ពឺ ខេត្តកោះកុង ខេត្តពោធិ៍សាត់ ខេត្តបាត់ដំបង ខេត្តបន្ទាយមានជ័យ ខេត្តសៀមរាប ខេត្តកំពង់ធំ ខេត្តកំពង់ចាម ខេត្តស្វាយរៀង ខេត្តព្រៃវែង និងក្រុងតាខ្មៅនៃខេត្តកណ្តាល ដើម្បីបន្តប្រកួតជម្រុះ និងសន្សំពិន្ទុឈានទៅដណ្តើមខ្សែក្រវាត់ក្នុងវគ្គផ្តាច់ព្រ័ត្រ ដែលនឹងធ្វើឡើងនៅរាជធានីភ្នំពេញ។

គួរបញ្ជាក់ថា ព្រឹត្តិការណ៍ «WURKZ ប្រដាល់គុនខ្មែរប្រចាំប្រទេស» រៀបចំឡើងដោយស្ថានីយទូរទស្សន៍ថោន ក្រោមការឧបត្ថម្ភផ្តាច់មុខពីភេសជ្ជៈប៉ូវកម្លាំង វើក WURKZ ដើម្បីចូលរួមអភិរក្សក្បាច់គុនខ្មែរ ផ្តល់នូវផ្ទាំងទស្សនិយភាពជាការកម្សាន្តជូនដល់ពលរដ្ឋកម្ពុជា និងលើកទឹកចិត្តដល់កីឡាករដែលស្រលាញ់ និងខិតខំថែរក្សាសិល្បៈវប្បធម៌មួយនេះ៕