ឡើងខ្លាំង! ទូត ដេវីត ផ្ដួល ឡុង ជិន ឲ្យសន្លប់បានឡើងទៅវគ្គបន្តខ្សែក្រវាត់ PNN

2022-02-21 00:30:00
ប្រដាល់

2022-02-21 00:30:00
ចំនួនមតិ 0 | ចំនួនចែករំលែក 0

ចន្លោះមិនឃើញ

អ្នកប្រដាល់ល្អកណ្ដាប់ដៃ ទូត ដេវីត កាន់តែកើនឡើងសមត្ថភាពខ្លាំងម្សិលមិញនេះផ្ដួលជើងចាស់ ឡុង ជិន ឲ្យសន្លប់នៅទឹកទី៣ បានឱកាសឡើងទៅជុំទី២ កម្មវិធីដណ្ដើមខ្សែក្រវាត់ Ganzberg One Strike ដែលទើបចាប់ផ្ដើមសប្ដាហ៍ទី១នេះ។

កីឡាករ ទូត ដេវីត

ដូចអ្នកតាមដានគុនខ្មែរបានដឹងហើយថា ដេវីត ជាកីឡាករសកលជម្រើសជាតិ ដូច្នេះកណ្ដាប់ដៃ បទពិសោធពីមួយប្រកួតទៅមួយប្រកួតធ្វើឲ្យរូបគេកាន់តែរីកចម្រើន និងកាន់តែគ្រោះថ្នាក់ដល់ដៃគូ។ ជាក់ស្ដែងការព្យាយាមចេញកណ្ដាប់ដៃរបស់គេតាំងពីទឹកទី១ មកនេះធ្វើឲ្យ ឡុង ជិន សន្លប់ត្រូវអាជ្ញាកណ្ដាលបញ្ឈប់ការប្រកួតត្រឹមទឹក៣។

ទូត ដេវីត (ក្រហម)

បន្ទាប់ពីទទួលបានជោគជ័យ និងមានការគាំទ្រច្រើននាពេលកន្លងទៅនេះ បានធ្វើឲ្យសង្វៀន PNN បន្តកម្មវិធីដណ្ដើមខ្សែក្រវាត់រដូវកាលទី២ ជាថ្មីទៀតដោយអមដោយប្រាក់រង្វាន់ ៤០លានរៀល(១ម៉ឺនដុល្លារ)។ កម្មវិធីដណ្ដើមខ្សែក្រវាត់នេះដែរគឺពោរពេញដោយកីឡាករដែលមានសមត្ថភាពខ្លាំង និងកំពុងឡើងកូដនាពេលបច្ចុប្បន្ន។

ឡុង ជិន ពេលអាជ្ញាកណ្ដាលរាប់

ខ្សែក្រវាត់ Ganzberg One Strike របស់សង្វៀន PNN គឺចាប់ផ្ដើមពីថ្ងៃទី២០ ខែកុម្ភៈ នឹងគ្រោងបញ្ចប់នៅថ្ងៃទី២៦ ខែមិថុនា ២០២២។ រូបមន្តប្រកួតកីឡាករទាំង១៦រូបចាប់ឆ្នោតប៉ះគ្នា និងធ្វើការប្រកួតចាញ់ធ្លាក់ ចំពោះអ្នកឈ្នះបានឡើងទៅជុំបន្ត។ អ្នកទាំង១៦រូបនោះរួមមាន កីឡាករ ព្រឿង សុជាតិ សេក ចៅជូន ទូច ដេវីត ឡុង ជិន រិន ដាវីត រឿម វណ្ណៈ ឯម សុធី វៀត ប៊ុនឌឿន ម៉ន សាម៉េត សៀវ ង៉ុយ ធន់ ផានិត អេលីត សាន់ លាភ រដ្ឋា ផាន់ សុផាត ឆង ថងសិទ្ធ និង នៅ ដារ៉ូ។ ដោយឡែក ទូត ដេវីត គឺបានឡើងទៅជុំបន្តមុនគេក្រោយឈ្នះ ឡុង ជិន ថ្ងៃបើកឆាកនេះ៕

វីដេអូប្រកួត៖