ហួសចិត្ត! ជិតដល់ថ្ងៃប្រកួតទៅហើយ Logan ទើបដឹងច្បាស់ពីច្បាប់ប្រកួតជាមួយ Floyd

2021-06-04 04:22:49
ប្រដាល់

2021-06-04 04:22:49
ចំនួនមតិ 0 | ចំនួនចែករំលែក 0

ចន្លោះមិនឃើញ

មុន៥ថ្ងៃនៃការប្រកួតមកដល់ Logan Paul បាននិយាយថា គេមិនទាន់ដឹងច្បាស់ពីច្បាប់ប្រកួតជាមួយ Floyd Mayweather ពោលទើបតែដឹងពេលថ្មីៗនេះឯង។

តារាយូធូបរូបនេះមានបំណងចង់ផ្ដល់មេរៀនចាញ់ទៅដល់ Floyd ខណៈការប្រកួតរវាងអ្នកទាំងពីរគ្រោងរៀបចំនៅថ្ងៃទី ៦ ខែ មិថុនាខាងមុខនេះក្នុងទីក្រុង Miami។ តាមការរៀបចំជំនួបនេះត្រូវវាយចំនួន៨ទឹក ក្នុងមួយទឹកមាន៣នាទី ប៉ុន្តែ Logan នៅស្រពិចស្រពិលរឿងច្បាប់ប្រកួតកាលពី៥ថ្ងៃមុនការប្រកួត។

កាលពីថ្ងៃទី ១ ខែ មិថុនា Logan បាននិយាយថា៖ “ខ្ញុំដូចជាឮត្រូវពាក់ហ្គង់ទំហំ10oz, 12oz។ ខ្ញុំឮថាវាយ៨ទឹក ហើយឮទៀតថាវាយ៣នាទី ឬ២នាទី។ និយាយទៅខ្ញុំអត់ច្បាស់ទេ។” យ៉ាងណាមិញច្បាប់នៃការប្រកួតរវាង Floyd និង Logan ត្រូវបានប្រកាសផ្លូវការជាសាធារណៈកាលពីម្សិលមិញ។

ពួកគេត្រូវវាយ៨ទឹក មួយទឹកមាន៣នាទី និងមិនមានអាជ្ញាកណ្ដាលផ្ដល់ពិន្ទុសម្រាប់មួយទឹកៗឡើយ ហើយក៏គ្មានការប្រកាសឈ្នះដែរ លុះត្រាកីឡាករណាម្នាក់ផ្ដួលដៃគូឲ្យសន្លប់ទើបដឹកចាញ់ឈ្នះ។ ដោយសារនេះជាការប្រកួតបែបមិត្តភាព លទ្ធផលចាញ់ឈ្នះយ៉ាងណានោះគឺមិនរាប់បញ្ចូលក្នុងកំណត់ត្រាប្រកួតអាជីពរបស់ពួកគេឡើយ។ ការប្រកួតក៏មិនមានពាក់ស្រោមមួកដើម្បីការពារដែរ ប្រើស្រោមដៃប្រភេទ12oz និងមានអាជ្ញាកណ្ដាលម្នាក់នៅលើរេញ៕

ប្រភព៖ Dailymail ប្រែសម្រួល៖ ហេង សុធារិទ្ធិ