ទីបំផុតធ្លាយរឿង Messi យល់ព្រមបន្ដកុងត្រា២ឆ្នាំនៅ Barcelona ទៀត

2021-06-02 08:13:20
បាល់ទាត់

2021-06-02 08:13:20
ចំនួនមតិ 0 | ចំនួនចែករំលែក 0

ចន្លោះមិនឃើញ

ប្រភពនៅអេស្ប៉ាញ បានបង្ហើបថាពេលនេះ Lionel Messi បានយល់ព្រមបន្ដកុងត្រាជាមួយក្រុម FC Barcelona ទៀតទៅហើយ ដោយមានរយៈពេលដល់ទៅ២ឆ្នាំឯណោះ។

ការយល់ព្រមនេះ កើតឡើងបន្ទាប់ពីក្លឹបបានព្យាយាមបញ្ចុះបញ្ចូលរូបគេ និងពន្យល់ពីគោលដៅ ក៏ដូចជាបញ្ហាហិរញ្ញវត្ថុនានាដែលក្លឹបកំពុងជួបប្រទះ។ មួយវិញទៀត ក្រុមការងាររបស់លោក Laporte ដែលជាប្រធានក្លឹបនោះ ក៏បានបកស្រាយនិងបង្ហាញផែនការច្បាស់លាស់សម្រាប់ប្រាក់ឈ្នួលកីឡាករ និងការចំណាយនានានៅរដូវកាលថ្មីខាងមុខផងដែរ។

ក្រៅពីរឿងទាំងនេះហើយ កាសែតនៅអេស្ប៉ាញ ក៏បានអះអាងទៀតថាការយក Sergio Aguero មករួមក្រុមបានរបស់ Barcelona ក៏ជាចំណែកមួយធ្វើឱ្យ Messi យល់ព្រមបន្ដលេង២ឆ្នាំទៀតដែរ។ Aguero ជាមិត្តល្អរបស់ Messi តាំងពីតូចមក ហើយពួកគេទាំងពីរនាក់នេះតែងតែមានទំនាក់ទំនងជាមួយគ្នាជានិច្ច។ អតីតកីឡាករ Manchester City បាននិយាយថ្ងៃចុះកុងត្រាថា រូបគេក៏សង្ឃឹម Messi បន្ដលេងនៅទឹកដី Camp Nou ជាមួយខ្លួនទៀតដែរ។

សូមបញ្ជាក់ថាកុងត្រាចាស់របស់ Messi នៅក្លឹប Barcelona គឺទទួលបាន៧១លានអឺរ៉ូក្នុងមួយឆ្នាំ ដែលនេះជាតម្លៃខ្លួនខ្ពស់បំផុតមួយ។ ដោយឡែកសម្រាប់កុងត្រាថ្មីដែលត្រៀមនឹងចុះខាងមុខនេះ គេមិនទាន់ដឹងច្បាស់ថានឹងតំឡើងប៉ុន្មានទៀត ឬលក្ខខណ្ឌអ្វីបន្ថែមនោះទេ៕

ប្រភព៖ Dailymail អត្ថបទ៖ វិធាវី