សម្ដេចតេជោ នៅតែទុកចិត្តខាងប្រដាល់អាចរកមេដាយបានច្រើននៅស៊ីហ្គេម ហ្វីលីពីន

2019-11-19 06:15:00
ប្រដាល់

2019-11-19 06:15:00
ចំនួនមតិ 0 | ចំនួនចែករំលែក 0

ចន្លោះមិនឃើញ

សម្ដេចតេជោ ហ៊ុន សែន នៅតែស្រឡាញ់ និងទុកចិត្តចំពោះវិស័យប្រដាល់គុនខ្មែរជានិច្ច ហើយដាក់ការរំពឹងថាប្រភេទកីឡាមួយនេះនឹងអាចរកមេដាយបានច្រើនក្នុងព្រឹត្តិការណ៍ស៊ីហ្គេម លើកទី៣០នៅ ឯហ្វីលីពីន។

រូបភាព NOCC

សម្ដេចតេជោ មានប្រសាសន៍ម្សិលមិញនាពិធីជួបជុំសំណេះសំណាលជាមួយប្រតិភូកីឡាករ កីឡាការិនី ដែលត្រៀមចេញទៅថា សូមអត្តពលិកដែលនឹងទៅចូលរួមព្រឹត្តិការណ៍កីឡាអាស៊ីអាគ្នេយ៍របស់កម្ពុជាទាំងអស់ ត្រូវមានការប្រុងប្រយ័ត្នឲ្យមែនទែនជាពិសេសការហាមឃាត់ចំពោះសារធាតុប៊ូវកម្លាំង ឬការធ្វើខុសលក្ខន្តិកនៃការប្រកួតផ្សេងៗ។ កុំចង់ឈ្នះរហូតធ្វើឲ្យប្រទេសជាតិបាក់មុខមាត់ ការចាញ់ឈ្នះជារឿងធម្មតារបស់កីឡានោះទេ ជៀសវាងមានសម្ដីថាកីឡាករ កីឡាការិនីកម្ពុជាប្រកួតអាក្រក់ ឬកាច។

រូបភាពហ្វេសបុក វ៉ាន់ វឿន

រូបភាពហ្វេសបុកផេកសម្ដេច

ក្រៅពីការលើកឡើងខាងលើនេះហើយ សម្ដេចក៏សួរនាំឈ្មោះកីឡាករប្រដាល់មួយចំនួនផងដែរ ថែមទាំងដាក់ក្ដីសង្ឃឹមថាប្រភេទកីឡាប្រដាល់គុនខ្មែរនេះនឹងអាចឈ្នះមេដាយបានច្រើនក្នុងព្រឹត្តិការណ៍មួយនេះ។ ព្រោះសម្ដេចបានតាមដាន និងទស្សនាពីការប្រកួតនានានៅចុងសប្ដាហ៍កន្លងមករហូត និងបានជួយឧបត្ថម្ភជាថវិកាដល់អ្នកប្រដាល់ជាច្រើនលើកច្រើនសារមកហើយ។

រូបភាព NOCC

រំលឹកដែរថា កាលពីស៊ីហ្គេមលើកទី២៩នៅឯប្រទេសម៉ាឡេស៊ី ២០១៧ ប្រភេទកីឡាគុនខ្មែរបញ្ជូនកីឡាករចំនួន ៥រូប ក្នុងនោះឈ្នះមេដាយមាស១គ្រឿង ប្រាក់១គ្រឿង សំរឹទ្ធ២គ្រឿង។ សម្រាប់ស៊ីហ្គេម ២០១៩នេះ សហព័ន្ធប្រដាល់គុនខ្មែរបញ្ជូនកីឡាករ៤រូប និងកីឡាការិនី១រូបសរុប៥នាក់។ កីឡាករគុនខ្មែរចំនួន៦រូបផ្សេងទៀតក៏ប្រកួតលើប្រភេទកីឡា Kick Boxing ផងដែរ។ កម្ពុជានឹងចូលរួមលើ៣១ប្រភេទកីឡាក្នុងស៊ីហ្គេមនៅហ្វីលីពីនលើកនេះ៕

អត្ថបទ៖ នួន ស៊ីណា