- 2019-11-10 06:54:20
- ប្រដាល់
ឡុង ជិន ភ្លាត់ចាញ់សិស្សប្អូនធ្លាក់ចេញពីពានរង្វាន់ TV5 និងត្រូវអាជ្ញាកណ្ដាលរាប់២ដងទៀត
- 2019-11-10 06:54:20
- ចំនួនមតិ 0 | ចំនួនចែករំលែក 0
ឡុង ជិន ភ្លាត់ចាញ់សិស្សប្អូនធ្លាក់ចេញពីពានរង្វាន់ TV5 និងត្រូវអាជ្ញាកណ្ដាលរាប់២ដងទៀត
ចន្លោះមិនឃើញ
អ្នកប្រដាល់ល្បីឈ្មោះ ឡុង ជិន ភ្លាត់ស្នៀតចាញ់កីឡាករជំនាន់ក្រោយ ទូច ដេវីត ធ្លាក់ចេញពីកម្មវិធីប្រកួតជម្រុះពានរង្វាន់ TV5 ទម្ងន់៦០គីឡូក្រាមម្សិលមិញនេះ។
ជើងខ្លាំងមកពីក្លឹប ខ្លារខិន ឡុង ជិន ម្សិលមិញនេះភ្លាត់ស្នៀតក្នុងកម្មវិធីសំខាន់ជម្រុះពានរង្វាន់ TV5 ចាញ់អ្នកប្រដាល់ជំនាន់ក្រោយ ទូច ដេវីត អស់ឱកាសត្រឹមវគ្គទី៣ ដែលធ្វើឲ្យអ្នកគាំទ្រប្រដាល់មួយចំនួនហួសចិត្ត។ ទូច ដេវិត បើគិតពីការចូលប្រឡូកក្នុងវិស័យប្រដាល់គឺបានត្រឹមមួយឆ្នាំប៉ុណ្ណោះ ខណៈការចូលលេងពានរង្វាន់លើកនេះជាលើកដំបូងរបស់គេផងដែរ។ ឡុង ជិន មិនត្រឹមតែចាញ់ការប្រកួតមួយនេះទេ ប៉ុន្តែអ្នកប្រដាល់រូបនេះត្រូវអាជ្ញាកណ្ដាលរាប់ចំនួន២ដងថែមទៀតក្នុងទឹកទី២ ដោយសាររងកណ្ដាប់ដៃច្រើនពេក។
ចូលទឹកទី១ ឡុង ជិន វ៉ៃតាមស្ដាយរបស់ខ្លួនដូចពីមុនៗ គឺចេញមួយៗប៉ុណ្ណោះ មិនថាកណ្ដាប់ដៃ ការទាត់នោះទេ ដោយគិតថាជាទឹកដំបូងនៅស្ទាបស្ទង់សិន តែយ៉ាងណា ទូច ដេវីត មិនគិតដូច្នេះទេទាត់ជើងសិស្សច្បងខ្លាំងៗរហូតចង់ខូចភ្លៅទៅហើយ។ ចូលទឹកទី២ កូនសិស្សលោក អាត សំរឺទ្ធ រូបនេះក៏ចូលវ៉ៃសម្រុកកណ្ដាប់ដៃជាច្រើនរហូតដល់ ឡុង ជិន គាំងក្បាច់ធ្វើអ្វីមិនចេញហើយក៏ត្រូវអាជ្ញាកណ្ដាលតែម្ដង ក្រោយមកបន្តិចទៀតក៏ត្រូវអាជ្ញាកណ្ដាលរាប់ម្ដង។
ការប្រកួតឈានដល់ទឹក៣ ឡុង ជិន ប្រមូលស្មារតី និងវ៉ៃសម្រុក ចាប់វ៉ៃជង្គង់ និងគាំកែងរហូតអាជ្ញាកណ្ដាលរាប់១ដងលើ ទូច ដេវីត វិញប៉ុន្តែគេនៅតែអាចបន្តការប្រកួតរហូតបញ្ជាប់ និងឈ្នះពិន្ទុលើសិស្សច្បងរូបនេះតែម្ដង។
ការចាញ់របស់ ឡុង ជិន នេះក៏មានការស្រែកឡូឡា និងមិនពេញចិត្តពីសំណាក់អ្នកគ្រូ ឡុង រ៉ាវី ដែលជាម្ចាស់ក្លឹបខ្លារខិនផងដែរ ដោយសារតែគិតថាអាជ្ញាកណ្ដាលលោក អូត ភូថង គិតតែចាប់បំបែកមិនឲ្យសិស្សខ្លួនមានឱកាសវ៉ៃជង្គង់ ហាក់ដូចជាជួយកីឡាករម្ខាងទៀត។ នៅពេលនោះដែរ ផុន ផាន់ណា ដែលជាអ្នកឲ្យទឹក ឡុង ជិន ក៏មិនពេញចិត្តសម្រាប់ការប្រកួតនេះដែរ ដោយគិតថាក្រុមអាជ្ញាកណ្ដាល ចៅក្រមជួយកីឡាករម្ខាងៗ យ៉ាងណាមិញ គណៈកម្មការប្រកួតនៅតែឲ្យ ទូច ដេវីត ឈ្នះដដែល។ រំលឹកដែរថា ការប្រកួតជម្រុះជុំទី៣ នៃកម្មវិធីដណ្ដើមពានរង្វាន់៦០គីឡូក្រាម ម្សិលមិញនេះគឺ ឡុង ជិន ចាញ់ពិន្ទុ ទូច ដេវីត ខណៈ កូយ ឡាយ ឈ្នះស្វ័យប្រវត្តិលើ ស៊ន រ៉ាគីម៕
